Kremtimet e 11 Tetorit, ditës së kryengritjes kundër fashizmit, filluan me akademi solemne në Teatrin Kombëtar të Maqedonisë, ku ishte i pranishëm i gjithë kreu shtetëror.

Në fjalimin e tij drejtuar publikut, kryetari i Kuvendit të Maqedonisë, Trajko Veljanovski bëri thirrje për unitet dhe  përgjegjësi për një Maqedoni më të mirë. “Në këtë 11 tetor, kur të gjithë e kujtojmë periudhën e Luftës së Dytë Botërore, të thirremi në shembujt pozitiv të historisë tonë.  Të kujtojmë se nën flamurin e lirisë, barazisë, u sakrifikuan edhe e majta edhe djathta.  Të kujtojmë se së bashku në luftë kundër armikut kanë marrë pjesë maqedonasit, por edhe shqiptarët, turqit, romët, serbët dhe të tjerët. Të kujtojmë se viktima të skllavërisë ishin edhe krishterët, por edhe myslimanët dhe  hebrenjtë”, theksoi Veljanovski.

Veljanovski nuk harroi të cekë edhe krizën momentale politike në të cilën po kalon vendi jonë. Ai tha se qytetarët kanë forcë që ta tejkalojnë edhe këtë krizë. “Qytetarët kanë forcën që të tejkalojnë gjithçka, do të tejkalojnë edhe këtë gjendje. Koha do të kalojë. Tymi do të lëshohet. Bombat do të pushojnë. Emocionet do të tejkalohen. Shumë punë do të kthehen në vendet e tyre të natyrshme.Megjithatë një  punë do të qëndrojë deri në fund të kohës. E ajo është e vërteta”, vlerësoi ai.

Përndryshe, nesër festohet 11 Tetori, dita kur para 74 viteve popujt e Maqedonisë filluan kryengritjen kundër okupatorëve gjatë Luftës së Dytë Botërore.

Furkan Saliu

Në dy aksidente trafiku që kanë ndodhur gjatë natës në komunën e Manastirit kanë humbur jetën dy persona. Siç njoftuan nga policia e Manastirit, aksidenti i parë es dy automjeteve ka ndodhur rreth orës tre pas mesnate në rrugën Manastir – Mogillë, tek ura e lumit Shemnicë.  Jetën ka humbur 32 vjeçari Pece K. nga Manastiri. Aksidenti i dytë ka ndodhur në mëngjes në hyrje të fshatit Llopaticë, ku shofer 23vjeçar i automjetit Golf 3 nga arsye të panjohura ka dalë nga rruga dhe e ka humbur jetën.

Ndërkohë, gjashtë persona, mes së cilëve edhe një fëmijë njëvjeçar, janë të lënduar në tre aksidente trafiku që kanë ndodhur në Tetovë. Pas aksidentit të parë, babë e bir janë dërguar në Spitalin Klinik të Tetovës, ku janë mbajtur për trajtim të mëtejmë. Sipas informatave të Sektorit të Punëve të Brendshme të Tetovës, arsyeja e aksidentit ka qenë shpejtësia e pa përshtatur me kushtet e rrugës. Të lënduarit në aksidentet tjera të trafikut pas ndihmës mjekësore janë lëshuar në mjekim shtëpiak.

Viti shkollor ka filluar me problemet e vjetra në shkollën fillore “Dituria” në fshatin Goshincë të komunës së Likovës. Arsimtarët e kësaj shkolle po vazhdojnë ende ti praktikojnë vetëm ditarët e zakontë, edhe pse me sistemin e ri, e kanë të obliguar ta plotësojnë edhe atë elektronik.

Për shkak të mungesës së rrjetit të internetit në ditarët elektronik janë të shënuara vetëm të dhënat e nxënësve tha arsimtari i kësaj shkolle Qerim Zymberi.“I kemi plotësuar në fillim gati një muaj kur u sjell vendimi të plotësojmë përmes kompjuterëve, mirëpo atë e kemi plotësuar te shkollat qendrore në fshatin Likovë dhe disa nëpër shtëpi, për shkak se këtu në fshatin Goshincë nuk kemi rrjet kompjuterik dhe kompjuterë nuk kemi. Në ditarët elektronik i kemi vetëm emrat e nxënësve, tjetër asgjë nuk kemi”, informon Zymberi.

Shkolla Dituria, që gjendet në një fshat malor, është 17 kilometra larg komunës së Likovës, dhe rruga që çon atje është e paasfaltuar, dhe makinat ngjiten me vështirësi. Arsimtarët ndërkaq, që të arrijnë deri tek vendi i punës, udhëtojnë bashkërisht me një furgon. Me gjithë vështirësitë në infrastrukturë, arsimtarët po ankohen edhe për mungesën e pajisjeve për të zhvilluar mësimin në këtë shkollë periferike.

“Për punën edukativo arsimore që zhvillohet, mjetet mund të themi se këtu përdoret vetëm dërrasën e zezë dhe shkumësin e bardhë edhe varësisht nga metodat e arsimtarëve i cili do të mundohet me vizatime të ndryshme me fletëza ta bëjë sa më cilësore orën edukativo arsimore”, thotë Rami Sinani, përgjegjës i nëndegës së Sh. F. “Dituria” në fshatin Goshincë.

E nxënësit, mezi arrijnë të punojnë me kompjuter gjatë testimit ekstern, sepse ato nuk kanë pasur mundësi asnjëherë të kenë kompjuterë. “S’kemi ditur, s’kemi pasur kurrë kompjuter, prandaj kemi pasur vështirësi gjatë testimit ekstern”…”Dinim nga pak, duke i parë të tjerët”, shprehen ata, duke treguar se ndonjëherë kanë pasur ndihmë nga arsimtarët.

Për çështje sigurie kompjuterët po qëndrojnë në shkollën qendrore në Likovë, thotë Përgjegjësi për arsim në Komunën e Likovës, Xhevdet Rahmani. “Kompjuterët janë në shkollën qendrore, por shkaku se nuk kanë ku ti ruajnë atje do me thënë siguri nuk ka, rrjet nuk ka për atë arsye nuk ja ka dhënë drejtoria ti mbajnë aty. Me Tekstet shkollore kemi problem në të gjithë Republikën e Maqedonisë, pasi që viti i pestë sivjet është se tekstet nuk nderohen do me thënë janë vjetërsuar”, thekson Rahmani.

Drejtori i shkollës “Dituria”, shpjegon se kërkesën për rrjet e ka bërë para 14 muajve, por përgjigje s’i ka kthyer askush. “Në shkollat periferike e kemi problem, ky projekt ka qenë një kompjuter për secilin nxënës, ka thënë ministria e arsimit para 6 vjetëve. Ministria e arsimit e ka bërë të gjithë instalimin për kompjuterë mirëpo për fat të keq brenda javës bashkëfshatarët e Goshincë i kanë hekë ato kabllot prej klase, i kanë dëmtuar, dhe ndërkohë ne kemi kërkuar përsëri nga ministria e arsimit të dalin ta bëjnë instalimin e rrjetit, por përgjigje nuk kemi marrë ende, ne kërkesën e kemi bërë me 14.07.2014”, shprehet Nagip Arifi, drejtor i Sh. F. “Dituria”.

Tekstet shkollore, këtyre fëmijëve ende po u mungojnë, dhe mësimi për to vazhdon të mbahet në kushte të mjerueshme.

Miradije Hasani

Qytetarët nga Maqedonia dhe Kosova, për ta kaluar kufirin mes dy shteteve, duhet patjetër të kenë me vete pasaportën. Ndonëse të dyja shtetet paraprakisht kanë zhvilluar takime për këtë çështje, marrëveshja për kalimin vetëm me letërnjoftime ende nuk është arritur. Problemi është më i madh për ata qytetarë të cilët kufirin e kalojnë pothuajse çdo ditë. Ata ankohen se pa nevojë po u mbushen pasaportat me vula kufitare.

“Po gjithsesi, sot isha në kalim, më treguan se duhet ta ndërroj pasaportën, sepse kam shumë vula. Mendoj se duhet të na lejojnë, ndoshta as me letërnjoftime, po diçka sa ma lehtë”…“Normal që duhet me e bë me letërnjoftime, e kanë pasur një marrëveshje por u shty, se di pse, sa ma shpejt,  ma lehtë për ne”…“Ata e dinë vet për këtë punë, mirë është me letërnjoftim por ata e dinë më mirë” – janë mendimet e disa qytetarëve, të cilët i pyetëm për këtë çështje.

Zëvendësministri i Punëve të Brendshme në Maqedoni, Zimri Qamili, tha se versioni i kësaj marrëveshjeje është formuluar është dërguar te autoritetet kosovare, dhe se për një kohë shumë të shpejtë kjo marrëveshje do të nënshkruhet. “Në bazë të dhënëve të cilat unë disponoj, mendoj se draft versioni i kësaj marrëveshje është formuluar dhe i është dorëzuar palës kosovare, aty nuk besoj se do të ketë ndonjë problem, besoj se për një kohë shumë të shpejtë edhe si marrëveshje kjo do të nënshkruhet dhe do të realizohet. Besoj se është në interes të dyja shteteve që kjo si marrëveshje të realizohet, për atë arsye se është në dobi edhe për shtetasit e Kosovës edhe për shtetasit e Maqedonisë, që të lehtësohet udhëtimi i të dyja shteteve. Ne si ministri e punëve të brendshme jemi të gatshëm, nuk do të ketë asnjë problem për  realizimin e kësaj marrëveshje, ne kemi përvojë edhe me shtete tjera që Republika e Maqedonisë ka nënshkruar marrëveshje për udhëtim me letërnjoftime si me Shqipërinë, Serbinë dhe Malin e Zi”, informoi Qamili.

Nga ana tjetër, ambasadori i Kosovës në Maqedoni Ylber Hysa, për shtyrjen e marrëveshjes tha se të dyja palët nuk kanë gjetur momentin e duhur, për shkak të zgjedhjeve që janë zhvilluar në të dy vendet.“Siç e dini dy palët nuk kanë gjetur momentin e duhur për arsye të kalendarit të tyre të brendshëm. Në Kosovë janë mbajtur zgjedhjet, pastaj ka pasuar një përudhë e gjatë për formimin e qeverisë, pastaj këtu njësoj ka pasur zgjedhje, dhe ka pas ndërkohë edhe ngjarje të tjera të cilët kanë dominuar në agjendë. Tani siç e dini Maqedonia është në një fazë tjetër të qeverisjes. Sa na përket neve në momentin e parë që të dyja palët do të akordohen teknikisht për tu takuar, kjo do të jetë në rend të ditës së parë. Kjo është në interes të të dyja anëve, sidomos i qytetarëve, por është edhe benifit edhe i Kosovës por edhe i Maqedonisë”, deklaroi ambasadori Hysa.

Qytetaret e Kosovës tashmë janë pajisur me letërnjoftime biometrike, sipas standardeve më të larta, dhe kjo nuk është më një problem. Si ambasadori Hysa, ashtu edhe zëvendësministri Qamili, theksuan se do të insistojnë që kjo çështje të kryhet sa më herët.

Artan Nuhiu

Pas dorëzimit të iniciativës qytetare për ndryshim të ligjit për energjetikë, Kuvendi i Republikës së Maqedonisë e miratoi propozimin për mbledhje zyrtare të nënshkrimeve për të nisur referendum.
Kjo iniciativë paraprakisht ka qenë e nënshkruar prej 161 qytetarëve. Sipas nenit 68 të Ligjit për referendum, Kuvendi e dorëzoi inicijativën deri te Kryetari i Qeverisë së Republikës së Maqedonisë, Nikolla Gruevski, i cili duhet të aprovojë fillimin e mbledhjes së nënshkrimeve në zyret e KQZ-së në vend.

Pas deklaratës së djeshme të Ministrit të Transportit dhe Lidhjeve, Vllado Misajllovski, se problemi i makinistëve është zgjidhur dhe se nuk do të vonojë më asnjë rrogë, biseduam me njeriun e parë të sindikatës së tyre, Dushko Çakarovski.

Ai thotë se është e saktë se dje në përfundim të orarit të punës kanë marrë gjysmën e rrogës për shtator, por të zvogëluar për 2.000 e deri më 2.500 për vozitës treni. Çakarovski, në një bisedë telefonike për TV 21 thotë se në ulje të rrogave ankohen mu ata që kanë mbajtur grevë. Siç thotë sindikalisti, pas festës do të kërkojnë takim me ministrin e transportit.

Përndryshe, një grup më i madh i makinistëve dy javë e bojkotuan punën, e një pjesë e linjave hekurudhore nuk funksiononin. Protestuan me grevë urie edhe para Qeverisë dhe Kuvendit. Grevën e ndërprenë pas takimit ministrin Misajllovski, ku siç u tha, u arrit marrëveshje për pagesën e rrogave të mbetura dhe shtesave për sigurim pensional dhe shëndetësor.

Gabriella Dimkoviq – Mishevska

Pacientes 63-vjeçare nga Shkupi iu bë operimi i parë në kardiologji intervenuese në spitalin e qytetit “8 Shtatori”.

Operimin e bëri Vlladimir Ristovski, një nga mjekët e ekipit pesëanëtarësh që trajnimin e kishin kryer në Dedinje, kurse intervenime do të bëjnë këtu.“Pacientja ishte me sëmundje të vërtetuar të arterieve koronare. Këtë e vërtetuam pas disa kontrollave diagnostifikuese joinvazive. Ishte me anginë jostabile. I bëmë kontrolla, koronografi dhe gjithçka ka përfunduar”, informoi Ristovski.

Këtu do të trajtohen pacientë me infarkte akute, çrregullime të zemrës prej lindjeje dhe anomali të tjera, e do të kryhen edhe procedura diagnostifikuese para trajtimit paraoperativ. Me këtë, spitali i qytetit u bë qendra e vetme në shëndetësinë publike në Maqedoni ku po bëhen procedura intervenuese radiologjike dhe kardiologjike.

“Koha dhe shpejtësia e intervenimit është me domethënie të veçantë, kurse prej transportimit deri te përkujdesja shëndetësore është humbje e kohës së çmuar. Me shpërndarje të këtillë të një numri më të madh institucionesh shëndetësore, në të cilat jepen shërbime shëndetësore, po arrihet standardi evropian që parasheh që në çdo 200.000 banorë të ketë nga një angiograf”, deklaroi ministri i Shëndetësisë, Nikolla Todorov.

Intervenimi në spitalin e mëparshëm ushtarak caktohet përmes mundësisë “Termini im”, kurse pastaj formohet listë e prioritetit, e përparësi do të kenë rastet urgjente. Përveç këtij, qendra për kardiologji intervenuese ka edhe në Ohër, Manastir, Shtip, Strumicë dhe Tetovë. Deri më tani janë bërë rreth 2.500 intervenime operative.

Gabriella Dimkoviq – Mishevska

Para katër viteve, Ministria e Arsimit dhe Shkencës, lëshoi në përdorim video-agregat elektronik që do t’u vinte në ndihmë arsimtarëve, nxënësve dhe prindërve, por ai nuk funksionoi. Sot u prezantua një tjetër.

Siç tha zëvendës-ministri Spiro Ristovski, ky model për të cilin është punuar 3 muaj, është më i mirë se ai i vjetri dhe pritet që të japë rezultate. “Ky është një agregat plotësisht i ri. Këtë radhë, procesi i vënies së tij është planifikuar ndryshe.  Ky është aplikacion tërësisht i ri dhe ka përmbajtje të reja. Mënyra dhe metodologjia tani është më e thjeshtë dhe  ai është më i aksesueshëm. Për shkak se ndodhën disa gjëra të paparashikuara, i vjetri nuk i plotësoi pritshmëritë”, deklaroi Ristovski.

Në ueb faqen eduvideo.mon.gov.mk, deri më tani janë nxjerrë 954 video-inçizime.  Në konferencë nuk ishin të pranishëm arsimtarët, kështu që nuk kishim mundësi të dimë për përvojën e tyre në përdorimin e këtij ndihmësi elektronik.

As 38 milionë euro nuk mjaftuan që Teatri Kombëtar i Maqedonisë të përmbushë standardet, dhe t’u bëjë ballë reshjeve jo aq të fuqishme të shiut.

Edhe pse paralajmërohej se do të jetë çudi arkitekturale , Teatri Kombëtar i Maqedonisë  tregoi shumë mangësi, sidomos çatia e cila nuk mund t’i përballojë as shirat e pakta që e kapën Maqedoninë këtyre ditëve.

Objekti filloi të ndërtohet në fund të vitit 2009. Nga buxheti i shtetit për këtë objekt, sipas përllogaritjeve të pavarura të bazuara në dokumente zyrtare, janë ndarë afër 38 milion euro.

Në ueb faqen oficiale të Teatrit thuhet: “Teatri  është një çudi e vërtetë, një kuti magjike, zemra e së cilës – një ndër më të mëdhatë dhe më të fuqishmet në këtë pjesë të Evropës  – mundëson më shumë se sa ne kemi ëndërruar edhe në ëndrrat më të guximshme” .

Në bisedë me drejtuesit e teatrit kërkuam shpjegim se si është e mundur që objektit me vlerë aq të lartë t’i pikojë çatia?  Ata na thanë se janë përgjegjës për mirëmbajtjen e objektit, por për përgjigje rreth kësaj çështje duhet të drejtohemi te Ministria e Kulturës.

Objekti i Teatrit Kombëtar është pjese e projektit “Shkupi 2014”. Gjatë ndërtimit të tij janë lidhur më shumë se 80 marrëveshje me kompani të ndryshme , kurse janë shpenzuar më shumë se 2 miliardë denarë.

Furkan Saliu

Gropa të mëdha të mbushura me ujë, baltë para çdo shtëpie, vështirësi për kalimtarëve – janë pamje të rrugës Stojna Stevkova në lagjen Seravë në Shkup. Rreth 200 shtëpi kanë hall të madh gjatë reshjeve të shiut. Për secilin hap ka pus, që duket si ndonjë pishinë ngjyrë kafe. Kur futen në shtëpi, banorët duhet të kapërcejnë me hapa të mëdha për të mos u zhytur.

“Krejt na hyn në shtëpi kjo baltë”, thotë një banor. Veturat, kur kalojnë nëpër këtë rrugë, ngasin më ngadalë, duke u kujdesur që të mos dëmtohen, ose të mos spërkasin ndonjë njeri me ujërat e grumbulluar. Për ndërrimin e kanalizimit, banorët thonë se gati një vit kaloni, e ende nuk është përmirësuar gjendja me të cilën po ballafaqohen.

“Rruga ka qenë përpara jo aq e mirë , po deri diku më e mirë se që është tash. Qe një vjet e diçka e kanë çel kanalizimin, gjoja po vendojnë kanalizim të ri. Mirë që e kanë vendosur, por i kanë prishur gypat e ujit, në vend se t’i drejtojnë, këta i kanë prishur, dhe na ka mbetur rruga kurrqysh”, shprehet një banor tjetër. Gati një vit, për këta banorë, kur ka reshje, ka baltë dhe vështirësi.

“Ka qenë asfalti dhe kanë menduar se duhet kanalizimi të vendoset. A e kanë vendosur, a jo?

Nuk e di, një vjet krejt, me baltë me ujë”, pyesin banorët e ksaj lagjeje. Kjo rrugë nuk u asfaltua sepse gjatë ndërrimit të gypave atmosferike, nga gypat e vjetër të ujësjellësit ka filluar të rrjedhë ujë.

Me kërkesën e banorëve, Komuna e Çairit në bashkëpunim me Ministrinë e Transportit kanë përgatitur projekt, që financohet nga Banka Evropiane, dhe pritet që brenda disa ditëve të shpallet se kush do ta fitojë tenderin. Punimet për ndërrimin e ujësjellësit, siç thotë drejtori për urbanizëm në komunë, Xhengiz Hani, pritet të fillojnënga mesi i nëntorit. Miradije Hasani