Elkos Group hapi sot objektin e qendrës tregtare të ETC-së në Gostivar, duke u bërë kështu objekti i dytë në Maqedoni, pas asaj në Shtip.

Kjo qendër e cila u cilësua si mundësi për të përmirësuar edhe më tutje bashkëpunimin ekonomik në mes Kosovës dhe Maqedonisë si dhe ekonominë e Gostivarit, ka hapësirë mbi 6 mijë metra, ka kushtuar 6 milionë euro dhe ka punësuar 100 punëtorë.

Me këtë rast, drejtori i Elkos Group, Ramiz Kelmendi, falënderoi të gjithë ata që ndihmuan në hapjen e këtij objekti duke premtuar që do të vazhdojë edhe më tutje me investime në Maqedoni, duke hapur edhe pika të tjera të ETC-së.

Ai shtoi se në këtë pikë do të ketë edhe artikuj të Republikës së Kosovës, ashtu siç ka artikuj të Maqedonisë në Kosovë.

E kryetari i Komunës së Gostivarit, Nefzat Bejta, tha se qendra e sapo hapur e ETC-së i ka dhënë një pamje shumë të bukur qytetit të tij.

E Ambasadori i Kosovës në Maqedoni, Ylber Hysa, tha se në këtë mënyrë Kosova dhe Maqedonia do të jenë më pranë njëra tjetrës, ashtu siç edhe e meritojnë.

Elkos Group, përveç Maqedonisë ka investuar edhe në Shqipëri me hapjen e ETC-së në Fier, dhe në Mal të Zi me ETC në Rozhajë./kp/

Ndonëse në Marrëveshjen për Asociacionin e Komunave Serbe, të dërguar një ditë pas arritjes së saj, në pikën 6.e thuhej se “(…) stafi i administratës do të përfitojë nga statusi i të punësuarve, në përputhje me Ligjet e Kosovës, duke përfshirë Ligjin e punës dhe Ligjin mbi shërbimin civil duke u mundësuar atyre të ushtrojnë detyrat e tyre administrative”, dy ditë më vonë qeveria njofton se këta punonjës do të jenë vetëm punonjës të thjeshtë e jo shërbyes civilë.

“Asociacioni nuk do të ketë shërbyes civilë por vetëm punonjës të zakonshëm. Asociacioni nuk mund të ofrojë shërbime për qytetarët por vetëm për komunat anëtare të saj. Ligjet e Kosovës lejojnë krijimin e më shumë asociacioneve për komunat në shtetin e Kosovës, prandaj krijimi i këtij asociacioni është në pajtim me ligjet e shtetit tonë dhe Kartën Evropiane për pushtetin lokal”, thuhet në komunikatë.

Përveç kësaj marrëveshjeje, Qeveria ka njoftuar edhe për disa nga detajet e tri marrëveshjeve tjera, atë për energjinë elektrike, kodin ndërkombëtar telefonik, si dhe heqjen e barrikadës mbi urën e Ibrit.

Sipas këtij njoftimi, më 15 tetor të këtij vitit do të hiqet i ashtuquajturi “Park i Paqes”, gjë e cila do të realizohet nga ana e Bashkimit Evropian, ndërsa Kosova do të ketë kodin e saj ndërkombëtar të telefonit 383. Një tjetër përfitim i katër marrëveshje të arritura në mes Kosovës dhe Serbisë më 25 gusht në Bruksel, sipas njoftimit të Qeverisë do të jetë edhe heqja e pengesave në fushën e energjisë nga ana e shtetit serb, si dhe njohja e kufijve shtetërorë energjetikë.

Kështu ka bërë të ditur Qeveria e Kosovës në një njoftim të dërguar për medie, me ç’rast ka shprehur qëndrimin e saj se me këto marrëveshje të arritura Republika e Kosovës ka forcuar sovranitetin shtetëror dhe integritetit territorial të saj, si dhe ka avancuar pozitën e saj ndërkombëtare, duke fuqizuar përkrahjen ndërkombëtare për integrimin e Kosovës në Bashkimin Evropian, NATO dhe Organizatën e Kombeve të Bashkuara.

Sipas këtij njoftimi përfitimet e Kosovës nga këto marrëveshje, janë se Kosova do të ketë kodin telefonik shtetëror 383, kod ky që merret nga Organizata Ndërkombëtare për Telekomunikacion, dhe se për këtë kod në emër të Kosovës d o të aplikoj Austria. Sipas njoftimit lidhur me këtë pikë, të gjitha kodet ekzistuese në Kosovës, si 381, 377, 386, do të kalojnë në kodin 383.

Më tej Qeveria shkruan se “do të shuhen të gjithë operatorët ilegalë të telefonisë mobile dhe fikse të Serbisë në Kosovë, për herë të parë pas përfundimit të luftës në Kosovë më 1999. Thirrjet nga Kosova në Serbi dhe anasjelltas do të jenë thirrje ndërkombëtare Do të ofrohet një lejim i përkohshëm për një fushë veprimtarish të kufizuar për një kompani të re që regjistrohet sipas ligjeve të Kosovës. Kjo nuk do të jetë një operator i tretë mobil në Kosovë, sepse për një gjë të tillë duhet tenderim ndërkombëtar me konkurrencë shumëpalëshe, ashtu siç përcaktohet me ligjet e Republikës së Kosovës”.

Për heqjen e barrikadës mbi Urën e Mitrovicës, që thuhet se do të ndodhë me 15 tetor, Qeveria thotë se me anë të kësaj marrëveshjeje do t’i jepet fun d ndarjes së Mitrovicës, sepse 15 vjet pas përfundimit të luftës në Kosovë, kjo urë prej një ure ndarëse do të jetë një urë bashkimi për qytetarët, qytetin dhe Kosovën. Po ashtu, kjo marrëveshje i jep fund ndërtimeve të egra dhe pretendimeve serbe për të ndryshuar strukturën etnike në fshatrat e Suhadolit dhe Kroit të Vitakut, duke i dhënë mbështetje Memorandumit të Mirëkuptimit mbi Planin e Zhvillimit Komunal mes MAPH dhe dy kryetarëve të komunave të Mitrovicës. Ura, siç njofton Qeveria, do të jetë e hapur për automjete dhe këmbësorë më së largu deri në fund të qershorit të vitit 2016.

Lidhur me Marrëveshjen për energjinë elektrike, Qeveria thotë se Serbia njeh Kosovën në fushën e energjisë.

“Serbia ka pranuar të heqë pengesat për vazhdimin e zbatimit të marrëveshjes për energjinë dhe planit për zbatim. Serbia është zotuar që të shuajë të gjithë operatorët e energjisë në veri të Kosovës, o bligim ky të cilin e ka zvarritur që nga shtatori 2014 kur është nënshkruar plani për zbatim për energjinë. Serbia ka pranuar që të heqë kundërshtimet e saj ndaj vendimit të ENTSO-E për pranimin e Kosovës/KOSTT si anëtare të saj të barabartë me shtetet tjera, në pajtim me marrëveshjen e energjisë. Kosova/KOSTT është pranuar në ENTSO-E në maj 2015, mirëpo Serbia në shkelje të marrëveshjes ka bërë një ankesë kundër vendimit të ENTSO për ta pranuar KOSTT. Tani me këtë marrëveshje Serbia detyrohet ta heqë ankesën duke hapur rrugë për konfirmimin final të anëtarësimit të KOST në EENTSO-E. Anëtarësimi i KOSTT ne ENTSO konfirmon njohjen e sovranitetit shtetëror dhe integritetit territorial të Kosovës në fushën e transmisionit të energjisë, duke njohur Kosovës si bllok mëvetësishëm rregullues të sistemit energjetik ndërkombëtar”, thuhet në komunikatë. Nga arritja e kësaj marrëveshje Kosova do të ketë përfitime vjetor e me miliona euro.

Qeveria në këtë komunikatë ka treguar sërish për Marrëveshjen e arritur për themelimin e Asociacionit të Komunave Serbe, asociacion për të cilin është shprehur se është në pajtim të plotë me Kushtetutën e Republikës së Kosovës dhe ligjeve të vendit, dhe se nuk do të ketë kompetenca ekzekutive dhe nuk do të jetë nivel i tretë i qeverisjes në Republikën e Kosovës

Me urdhër të gjykatës, policët e Departamentit të Punëve të Brendshme në Tetovë kanë kontrolluar një objekt të improvizuar prej druri, të vendosura në një fushë në afërsi të hekurudhës në Tetovë, rruga drejt f.Falisht, e përdorur nga 42-vjeçari Xh.S nga Tetova, njofton SPB-Tetovë.

Gjatë kontrollit, në objekt është gjetur: një qese najloni me rreth 20 gram pluhur të panjohur me ngjyrë kafe të çelët, e cila ishte fshehur prapa furrës elektrike, një qese e vogël prej najloni, gjithashtu me rreth 5 gram pluhur të panjohur me ngjyrë kafe, e vendosur mbi derën e hyrjes dhe një peshore digjitale me prodhim kinez.

Të gjitha ato sende janë fotodokumentuar dhe konfirmuar për ekspertizë. Në konsultim dhe koordinim me prokurorin publik, tetovari Xh.S është arrestuar dhe është mbajtur për sqarimin e plotë të rastit, për të cilin do të ketë edhe kallëzim penal.

Janë arrestuar katër kumanovarë nga ana e policisë së Kumanovës, nën pretekstin se kanë plackitur emigrantin nga Avganistani, në afërsi të qytetit të Kumanovës.

Plackitësit paraprakisht emigrantit i kishin ofruar shërbim transporti deri në kufi për 50 euro.

Ndërkohë, ata e kishin sulmuar dhe i kishin marrë në mënyrë të dhunshme 1.200 euro, 2 telefona mobil dhe gjëra tjera me vlerë të vogël.

Edhe pas miratimit të Ligjit për të drejtat e autorit dhe të drejtat e përafërta, sipas të cilit ndalohet riprodhimi dhe shpërndarja e kopjeve të veprave autoriale, të mbrojtura me të drejtën e autorit, apo komunikimin dhe vënien në dispozicion të materialit të mbrojtur, pa autorizim paraprak nga titullari i së drejtës, keqpërdorimi po vazhdon në kundërshtim me ligjin e përmendur, raporton KosovaLive.

Kopjimi i librave dhe veprave të tjera artistike është edhe më tutje i pranishëm në vendin tonë madje paraqet shqetësim pasi përveç që dëmton autorët, dëmton po ashtu ekonominë edhe ashtu të dobët, dhe imazhit e shtetit tonë të ri.

Autorët dhe kompanitë e ndryshme të fushës së artit dhe kulturës hezitojnë të bashkëpunojnë me autorët vendas dhe në përgjithësi në krijimtarinë artistike dhe kulturore, e që të tilla investime do të ishin shumë të nevojshme në një vend me ekonomi në zhvillim e sipër, të tillë siç e ka Kosova. Gjithashtu dekurajojnë krijuesit e veprave letrare e artistike pasi nuk shpërblehen për punën e tyre.

Sipas drejtorit të Zyrës për të drejtat e autorit, Valon Kashtanjeva, qysh prej tetorit të vitit 2011 kur edhe u miratua Ligji për të drejtat e autorit dhe të drejtat e përafërta , Kosova ka krijuar infrastrukturën bazë ligjore për fushën e të drejtës së autorit. Ka krijuar edhe një task forcë kundër piraterisë në janar të vitit 2013, por pirateria vazhdon të jetë e pranishme thuaja në nivel të njëjtë që ishte edhe më parë.

“Pas miratimit të ligjit, Zyra për të drejtat e autorit që vepron në kuadër të Ministrisë së Kulturës, Rinisë dhe Sportit (MKRS) është fokusuar në promovimin e së drejtës së autorit dhe në nxjerrjen e akteve nënligjore. Moment me rëndësi është krijimi i Task forcës kundër piraterisë në janar të vitit 2013, organ ky i cili ka ndërmarrë veprime kundër piraterisë duke filluar nga muaji gushti i po këtij viti”, ka thënë Kashtanjeva.

Sipas tij, lufta kundër piraterisë është e vazhdueshme, pasi që kjo dukuri është përhapur mjaftë shumë që nga pas lufta e deri kur janë ndërmarr aksionet e para kundër sajë, madje një gjë e tillë është e pranishme edhe në ditët e sotme.

Kashtanjeva thotë se pirateria përveç që dëmton buxhetin e shtetit dhe krijuesit, kjo mund të dëmtojë edhe vetë përdoruesin pasi krijuesit mund të dekurajohen dhe nuk mund të jenë të fokusuar në krijimtari pasi që nuk marrin shpërblimin që u takon si pasojë e përdorimit të paautorizuar të veprave të tyre. Rrjedhimisht krijuesit nuk kanë mundësi të krijojnë dhe si përfundim dëmtohet në përgjithësi krijimtaria letrare, artistike, shkencore dhe kultura në përgjithësi.

“Zyra për të drejtat e autorit dhe të drejtat e përafërta nuk ka kompetenca për zbatimin e këtij ligji, por zbatimi i tij është i ndërlidhur ngushtë me veprimet ligjore të vetë krijuesve dhe titullarëve të së drejtave. Ata mund dhe duhet të përdorin mjetet juridike për mbrojtjen e veprave të tyre.

Mirëpo, Inspektorati i Tregut në kuadër të Ministrisë së Tregtisë dhe Industrisë ka kompetenca në mbikëqyrjen e zbatimit të këtij ligji”, pohoi Kashtanjeva.

Ai bëri të ditur për KosovaLive se që nga fillimi kur janë ndërmarrë aksionet e para deri më tani Task forca që udhëheq luftën kundër piraterisë ka sekuestruar afër 40 mijë kopje të materialeve pirate. Mirëpo, KosovaLive, nuk ka arritur të siguroi të dhëna se çka ka ndodhur me autorët piratë, a është dënuar dikush dhe sa është dënuar me burg apo me gjobë siç e parasheh Ligji për të drejtat e autorit dhe të drejtat e përafërta, apo Kodi Penal.

“Nga janari i vitit 2013, shkelja e të drejtës së autorit konsiderohet vepër penale dhe shkelësit mund të ballafaqohen edhe me sanksione penale. Sipas Kodit Penal, kushdo që bënë shkeljen e të drejtave të autorit dhe të drejtave të përafërta, dënohet me gjobë prej dy mijë deri në 10 mijë euro, ose me burgim nga 3 muaj deri në 8 vjet. Sendet dhe pajisjet për prodhimin e produkteve që shkelin të drejtat e autorit dhe të drejtat e përafërta konfiskohen”, ka thënë Kashtanjeva.

Feim Maliqaj, njohës i çështjeve për të drejtat e autorit dhe ish- drejtor i Zyrës për të drejtat e autorit në kohën e të cilit edhe është miratuar ligji, ka thënë për KosovaLive se sa i përket legjislacionit, është mjaft mirë e rregulluar fusha e së drejtës së autorit, gjithashtu janë një sërë institucionesh që e kanë mandat dhe merren me këtë çështje.

Mirëpo, për fat të keq edhe më tutje po vazhdon kjo veprimtari nga e cila dëmtohen të gjithë, në veçanti autorët, krijuesit e veprave artistike dhe ekonomia e vendit.

“Ekonomia dëmtohet për faktin se pirateria bëhet në mënyrë ilegale dhe kjo përveç që shkelë në mënyrë flagrante të drejtat e autorit gjithashtu rrit edhe informalitetitn në ekonomi. Nëse për çdo vepër të krijuar dhe pastaj të shumëzuar dhe shitur do të kompensoheshin autorët, atëherë edhe inkasimi i taksave do të bëhej sipas legjislacionit në fuqi dhe do të kishte të mira si për shtetin ashtu edhe për autorët”, ka thënë Maliqaj.

Sipas Maliqajt, luftimi i piraterisë ka rëndësi të madhe për imazhin e vendit. Prandaj, përveç institucioneve, të cilat kanë për detyrë të ndjekin dhe luftojnë piraterinë në bazë të ligjit edhe qytetarët mund të ndihmojnë në këtë drejtim.

Kjo do të bëhej duke refuzuar të blejnë çfarëdo vepre në mënyrë ilegale dhe përveç refuzimit, rastet të tilla duhet t’i paraqesin tek organet kompetente. Ky veprim do të ishte në të mirën e përgjithshme pasi në këtë mënyrë do të ndihmoheshin autorët, të cilët do stimuloheshin për të krijuar më shumë vepra artistike e kulturore dhe rrjedhimisht do ndihmoheshin edhe vetë blerësit, po ashtu do ndihmohej edhe ekonomia e shtetit, duke krijuar kështu parakushte për investime të huaja madje edhe në arritjen e standardeve evropiane

Ka shumë keqkuptime në lidhje me efektet e vitaminave. Ato nuk janë çudibërëse, respektivisht, nuk mund të kurojnë sëmundje ose të zëvendësojnë të ushqyerit e ekuilibruar.

Shumë njerëz gabojnë duke besuar se në qoftë se një sasi e vogël e vitaminave është e mirë për ne, një sasi më e madhe e tyre është edhe më e mirë. Në rastin e vitaminave më mirë të mbani rregullat, “më pak është më shumë”. Studimet mbi zakonet e të ushqyerit kanë treguar se rreth 60 për qind e njerëzve nuk marrin sasi të mjaftueshme të frutave dhe perimeve. Gjithashtu, shumë njerëz jetojnë në mënyrë jo të shëndetshme, kurse e gjithë kjo e rritë nevojën e tyre për vitamina.

Disa ndihmojnë kur kemi të bëjmë me lodhje, stres mendor dhe fizik, ekspozim të tepruar ndaj stresit, për të përmirësuar kujtesën dhe funksionimin e duhur të sistemit të tretjes. Rekomandohen për gratë e moshës riprodhuese, duhanpirësit, njerëzit në dieta të rrepta, njerëz që shërohen nga sëmundje serioze ose ndërhyrjet kirurgjikale, shkruan gazeta Zëri. Teprica e vitaminës C zakonisht nuk shkakton ndonjë dëm për shkak se ajo është e tretshme në ujë, që do të thotë se sasia e tepërt ndodhet në ujin në trup deri sa të nxirret jashtë përmes urinës, kështu që marrja e saj në mënyrë të tepruar, nga koha në kohë, nuk është një problem i veçantë.

Por doza të larta të këtyre vitaminave për një periudhë të zgjatur mund të çojnë në nivele të dëmshme të këtyre vitaminave në trup. Kujdesi është i nevojshëm te vitaminat, A, D, E dhe K, nëse konsumohen në sasi të mëdha. Ato mund të kenë një efekt toksik nëse merren në sasi të tepërt gjatë një periudhe më të gjatë.

Numri i fëmijëve në arsimin e mesëm të lartë është 83,743 prej tyre 39,358 ose 47% janë femra, 44, 385 ose 53%, janë meshkuj, bënë të ditur Agjencia e Statistikave të Kosovës (ASK), e cila ka publikuar statistikat e arsimit të mesëm të lartë për vitin shkollor 2014/2015.

Sipas ASK-së, numri i mësimdhënësve në arsimin e mesëm të lartë është 5,358 prej tyre 2,081 ose 38.8% janë femra dhe 3,277 ose 61.2%, janë meshkuj.

Numri i fëmijëve në arsimin privat për arsimin e mesëm të lartë është 2,476 prej tyre 1,065 janë femra, kurse 1,401 meshkuj.

Publikimi i të dhënave statistikore për arsimin fillor dhe të mesëm të ulët për vitin shkollor 2014/2015 përmban të dhëna statistikore për arsimin e mesëm të lartë në Republikën e Kosovës, të paraqitura në nivel qendror dhe atë lokal, për sektorin publik dhe privat të arsimit, për numrin e shkollave të mesme, numrin e nxënësve, numrin e mësimdhënësve, numrin e nxënësve sipas përkatësisë etnike dhe sipas klasave/kl/.

Presidentja e Gjykatës së Lartë në Greqi, Vassiliki Thanu, 65 vjeçe, u emërua kryeministre e përkohshme deri në zhvillimin e zgjedhjeve të parakohshme, njoftuan sot në një komunikatë shërbimet e Presidentit të Republikës greke, Prokopis Pavlopulos.
“Ceremonia e betimit të kryeministres do të zhvillohet në orën 17:00 GMT ndërkohë që qeveria e re e përkohshme di të emërohet nesër”, vijon komunikata, që nuk jep datën e saktë të zgjedhjeve të parakoshme, parashikuar më 20 ose 27 shtator, sipas medias.
– See more at: http://lajmi.net/presidentja-e-gjykates-se-larte-emerohet-kryeministre-e-greqise/#sthash.q5QB9sdy.dpuf

Kryeministri i Republikës së Kosovës, Isa Mustafa, mori pjesë në sesionet e zhvilluara të enjten në Samitin e Ballkanit Perëndimor 2015 në Vjenë, ku ishin të pranishëm edhe kancelarja Merkel, kancelari Faymann, komisionerja Mogherini dhe kryeministrat e vendeve të Ballkanit Perëndimor dhe përfaqësues të shteteve dhe mekanizmave të BE-së e të institucioneve ndërkombëtare financiare.
Në sesionet e këtij samiti, ku u trajtuan tema që lidhen me situatën ekonomike, proceset e reformave, rininë, edukimin, energjinë, transportin, kryeministri i Kosovës, Isa Mustafa, ka prezantuar progresin në Kosovë si dhe projektet konkrete të Qeverisë së Kosovës në zhvillimin ekonomik të vendit.

Kryeministri Mustafa ka qenë pjesë e panelit së bashku me kancelaren Merkel, dhe kryeministrat Rama, Milanoviq, Cerar dhe Vuciq.

Gjatë qëndrimit në Vjenë, kryeministri Isa Mustafa ka takuar përfaqësues të shumë vendeve dhe institucioneve financiare ndërkombëtare. Gjatë këtyre takimeve, kryeministri Mustafa ka prezantuar si dhe ka kërkuar mbështetje për finalizimin e shumë projekteve konkrete në Kosovë, në infrastrukturë rrugore dhe hekurudhore, projekte në energjetikë, lehtësim të qarkullimit të mallrave dhe njerëzve me vendet fqinjë si dhe në fusha të tjera të ekonomisë, njofton kumtesa nga Kryeministria .

Në fjalën e tij, kryeministri Isa Mustafa ndër të tjera theksoi se në fushën e ekonomisë Kosova po bën përpjekje maksimale që të bëjë reformat e domosdoshme strukturore dhe reformat e tjera, të cilat hapin perspektivë per jetën e qytetarëve dhe veçmas për të rinjtë. Duke përmendur bashkëpunimin me FMN-në, BERZH-in dhe me Bankën Evropiane për Investime për projekte konkrete, kryeministri Isa Mustafa theksoi se pret një përkrahje edhe më të madhe dhe konkrete të Bashkimit Evropian, duke iu referuar edhe përkushtimit të Kosovës në përmbushjen e kërkesave të komunitetit ndërkombëtar në rrugën e integrimeve evropiane dhe euroatlantike.

Mustafa në këtë samit tha: Konsideroj se temat të cilat ne po i trajtojmë këtu e dëshmojnë edhe njëherë rëndësinë e “Procesit të Berlinit” për zgjidhjen e sfidave me të cilat ne ballafaqohemi në Ballkanin Perëndimor, që janë edhe sfida politike edhe sfida ekonomike. Ne po përpiqemi që të jemi mjaft të përkushtuar që të përmbushim zotimet tona ndaj Bashkimit Evropian, dhe ndaj komunitetit ndërkombëtar, në mënyrë që të hapim procesin e integrimit evropian.

Kemi bërë përpjekje maksimale që të relaksojmë dhe të ndërtojmë marrëdhënie të mira me vendet fqinje. Me Malin e Zi dje kemi nënshkruar marrëveshjen për shënimin e kufijve, me Serbinë para dy ditësh kemi arritur marrëveshje shumë të rëndësishme në Bruksel, dhe dëshiroj që ta falënderoj edhe Përfaqësuesen e Lartë Mogherini për punën shumë të mirë dhe të përkushtuar të cilën po e bënë.

Para disa kohe kemi vendosur me Kuvendin e Kosovës për themelimin e Dhomave të Veçanta të Gjykatës Speciale që flet për përkushtimin e Kosovës që të përmbush obligimet e saj ndërkombëtare dhe poashtu që të forcoj sistemin e drejtësisë dhe shtetin ligjor.

Në fushën e ekonomisë po bëjmë përpjekje maksimale që të bëjmë reformat e domosdoshme strukturore dhe reformat e tjera, të cilat hapin perspektivë per jetën e qytetarëve dhe veçmas perspektivën për të rinjtë, sepse jemi vend ku kemi pjesën dërmuese të popullatës së re në popullsinë e përgjithshme.

Kemi arritur marrëveshje me Fondin Monetar Ndërkombëtar, e cila na i hap mundësitë për investimet ekonomike. Kemi një bashkëpunim shumë të mirë me Bankën Evropiane për Zhvillim dhe Rindërtim për disa projekte të rëndësishme dhe me Bankën Evropiane për Investime, dhe presim një përkrahje më të madhe dhe konkrete të Bashkimit Evropian, si kundërpërgjigje zotimeve dhe përkushtimit tonë në përmbushjen e kërkesave që shprehen para nesh nga komuniteti ndërkombëtar në rrugën e integrimeve evropiane dhe euroatlantike.

Vlerësojmë se problemi i të rinjve është një prej problemeve kyçe, i cili nuk lidhet vetëm me mënyrën e arsimimit të tyre, apo vetëm me nivelin e përfshirjes së tyre në arsimin e lartë, qoftë publik apo privat. Tani kemi nevojë ta ngritim cilësinë e arsimit, dhe ta përshtatim atë me nevojat e ekonomisë.

Në Kosovë, tani kemi dy probleme më të mëdha, atë të normës akoma të ulët të zhvillimit ekonomik, në krahasim me sfidat e punësimit dhe të papunësisë. Dhe strukturën e papërshtatshme ekonomike, e cila në këtë fazë të tranzicionit të vonuar po shkon shumë ngadalë.

Kemi mbet vendi i vetëm i izoluar në Evropë me regjim të vizave. Të rinjtë tanë nuk mund të lëvizin lirshëm ashtu siç lëvizin të rinjtë e vendeve tjera. Nga kjo lëvizje varet edhe mundësia e tyre që të shkollohen e të studiojnë jashtë vendit. Deri më tani shkuarja e tyre jashtë vendit ka qenë e kufizuar dhe mbi bazën e disa programeve konkrete.

Regjimin e vizave e konsiderojmë si një padrejtësi të madhe që po i bëhet vendit, dhe konsiderojmë se nuk kemi përgjigje adekuate nga Bashkimi Evropian dhe nga demokracia evropiane për të rinjtë tanë dhe për qytetarët e Kosovës. Ashtu siç ne i kemi përmbushur detyrimet tona, të cilat konsiderojmë se i kemi bërë ndaj Bashkimit Evropian dhe ndaj kritereve që ju i keni caktuar për Kosovën, konsideroj se edhe BE-ja duhet ta bëjë punën e vet, që Kosovës t’i hapet mundësia e lëvizjes pa viza.

Ne nuk mund të presim që mund të konkurrojmë me ekonominë evropiane dhe me ekonominë botërore, as me dijen evropiane dhe botërore, në qoftë se bizneset tona kanë nevojë për kritere shtesë karshi bizneseve tjera, sepse asnjë biznesmen dhe biznes i yni nuk mund të qarkulloj lirshëm në tregun evropian përpos një tregu të ngushtë regjional dhe nuk ka kushte të konkurrencës së plotë ashtu siç i kanë bizneset tjera. Këto janë kosto shtesë dhe këto janë kufizimet shtesë fizike që iu bëhen bizneseve tona karshi mundësive që kanë bizneset tjera. Prandaj, ne mund të flasim dhe të deklarojmë në mënyrë teorike për ekonomi të tregut, por këtë ekonomi të tregut nuk mund ta ndërtojmë në Kosovë në qoftë se nuk kemi barazi e cila përfshin edhe barazinë e lëvizjes së mallrave, kapitalit dhe njerëzve, siç e bëjnë vendet e tjera me të cilat ne konkurrojmë”.

Kryetari i Komunës së Prishtinës Shpend Ahmeti priti në takim pjesëtarën e Parlamentit të Gjermanisë, znj. Marie Luis Bek, eurodeputete e Partisë së Gjelbër.

Me znj. Beck kryetari Ahmeti diskutoi lidhur me zhvillimet e fundit politike si në nivelin
qendror, po ashtu edhe në atë lokal.

Znj Beck, si anëtare e Komisionit për Politikë të Jashtme, njëkohësisht si një anëtare e rëndësishme e Partisë së të Gjelbërve u interesua për gjendjen ekonomike dhe sociale ne Kosovë shkaku se një temë e tillë tashmë është një prej temave kryesore edhe në Gjermani për shkak të numrit të azilkërkuesve që vijnë nga Ballkani Perëndimor, rreth 40%.

Znj. Beck, gjithashtu, është takuar me politikanë të nivelit qendror dhe atij lokal për të diskutuar
lidhur me shkaqet dhe perspektivën në të ardhmen të Kosovës dhe shteteve të tjera në aspektin socio – ekonomik.

Kryetari Ahmeti e njoftoi për së afërmi lidhur ndryshimet dhe projektet në Komunën e Prishtinës, mirëpo edhe për gjendjen ekonomike – sociale në vend. Shqetësim i madh, sipas kryetarit Ahmeti, është numri i lartë i papunësisë dhe varfëria në Kosovë.