Ka shkuar në 1060 numri i përgjithshëm i të prekurve nga fruthi. 22 mijë fëmijë në tërë territorin e Maqedonisë së Veriut janë të pavaksinuar njoftojnë nga Ministria e Shëndetësisë. Ndonëse ishte e paraparë që sot të fillonte vaksinimi kundër fruthit nëpër shkolla, një gjë e tillë nuk ndodhi. Drejtorët e shkollave thonë se ende nuk kanë marrë ndonjë njoftim zyrtar se kur do të bëhet vaksinimi i nxënësve. Ndërkaq drejtoresha e shkollës fillore “Ismail Qemali” thotë se ideja që fëmijët të vaksinohen nëpër shkolla është e pranueshme dhe optimale.

“Kemi por është një numër shumë i vogël dhe ata qëndrojnë në shtëpi, në mjekim shtëpiak, do të thotë se nuk është përhapur shumë në shkollën tonë. Mendoj se duhet të vaksinohen patjetër, të gjithë ata që nuk janë vaksinuar, është mirë për nxënësit që mos të përhapet më tutje virusi”, theksoi Drejtoresha e SHF “Ismail Qemali”, Burbuqe Imeri.

Autoritetet shëndetësore në vend njoftuan se vendimi i djeshëm nga ana e ministrisë është dhënë shumë vonë. Ata nuk kanë mundur të arrijnë në kohë të bëjnë gati listat e shkollave se prej ku do të fillojnë me vaksinim dhe kanë kërkuar kohë deri të hënën që vjen. I pyetur për pëlqimin e prindërve, Ministri i Shëndetësisë, Venko Filipçe, thotë se edhe prindërit mund të qëndrojnë me nxënësit gjatë vaksnimit, por vaksnimi duhet të ndodhë patjetër që të arrihet imuniteti kolektiv.

“Gjithësesi se mund të jenë të pranishëm edhe prindërit, kjo po bëhet me qëllim që të ruhet shëndeti i fëmijëve. Potencoj sërish se të gjithë ata që nuk janë të vaksinuar janë në rrezik të lartë për tu sëmurë. Nuk e di çka duhet të ndoh më shumë që t’ju tregojmë se kjo është e nevojshme”, potencoi Ministri I Shëndetësisë, Venko Filipçe.

Në Agjencinë për ilaçe thonë se janë adresuar vetëm dy ankesa për efekte të padëshiruara nga vaksina MRP.

“Në Agjencinë për ilaçe, për vaksinën MRP kanë qenë të paraqitura dy raste, nga efekte të padëshiruara. Rritje e temperaturës dhe ca dhimbje të vogla, të caktuara, që janë normale. Për vitin 2018 kanë qenë gjithësej tre raste. Pra bëhet fjalë për një vaksinë tërësisht të sigurtë, që nuk paraqet problem te fëmijët, këtë duhet ta dijnë prindërit dhe të jenë të sigurtë edhe në cilësinë edhe në sigurinë e vaksinave”, u shpreh Aleksandra Grozdanova, Kryetare e Komisionit për Imunizim.

Filipçe tha se do të bëjë edhe një takim me grupin intersektor dhe nëse është e nevojshme do të bëjnë ndryshime ligjore. Ndryshe ai thotë se duhet të vaksinohen 96% e popullsisë që të arrihet imunitet kolektiv, për këtë arsye prej të hënës është paraparë që të fillojë vaksinimi nëpër shkolla. Përndryshe fëmijët që nuk janë vaksinuar kundër fruthit me vaksinën MRP, nuk do të mund të regjistrohen dhe as të ndjekin procesin arsimor. Ky vendim është sjellë nga Ministria e shëndetësisë dhe përkrahet nga Ministria e Arsimit.

Përgatiti: Almedina Ismajli

Në internet u publikuan materiale të reja të përgjuara. Gjashtë të ashtuquajtura “bomba” janë publikuar në profilin e “Ilija Gromovnik” në rrjetin YouTube. Në biseda mund të dëgjohet sponsorizimi i klubit të basketbollit nga vendi, kurdisje të lustrimit, abuzim të ELEM-it, koordinim të funksionarëve nga opozita dhe pushteti se si të sillen para mediave. Kryeministri Zoran Zaev thotë se  ka degjuar vetëm nje pjesë prej përgjimeve të reja dhe se janë të njejtat të cilat i ka dërguar në Prokurorinë Publike Speciale.

“Unë nuk i kam dëgjuar të gjitha bisedat te them sinqerisht.Pak më erdh mundimshëm pas gjhithë asaj që kam dëgjuar. Prej asaj që kam dëgjuar një pjesë është prej paketës që e kemi dorëzuar në Prokurorinë publike Speciale. Ajo vetëm dëshmon se nuk na kanë dorëzuar vetëm një pjesë prej përgjimeve që është berë në mënyrë të paligjshme”, theksoi kryeministri i Maqedonisë së Veriut, Zoran Zaev.

Prokuroria themelore në Shkup thotë se është hapur lëndë dhe se po e kërkojnë personin që ka publikuar videot.

“Prokuroria Publike Themelore në Shkup ka dhënë udhëzime dhe urdhëra së bashku me Ministrinë e Punëve të Brendshme për të ndërmarrë veprime në drejtim të bombave që janë publikuar në “YouTube”. U morën masa për të përcaktuar origjinën e personit që lëshoi bombat dhe nga cili vend u ngarkuan videot. Në Prokurorinë themelore në Prilep, merren masat lidhur me bombat që u shpallën në një tubim”, thonë nga Prokuroria Publike Themelore në Shkup.

Nga Ministria e Punëve të Brendshme e punëve të brendshme thonë se ka filluar hetimi per publikimin e bisedave të përgjuara.

Ndryshe, neni 1, alinea 3 nga ligji për ndjeke të komunikimeve thotë:

“Ndalohet posedimi, përpunimi, publikimi  i çfarëdolloj materiali që rrjedh nga përgjimi i paligjshëm i komunikimeve të kryera në periudhën nga viti 2008 deri në vitin 2015, duke përfshirë përdorimin dhe disponimin e tyre në procesin zgjedhor, qëllimet dhe procedurat politike dhe të tjera”.

Nga Prokuroria Speciale Publike pohojnë se nga atje nuk ka rrjedhur asnjë material. Ndryshe bëhet fjalë për materiale të cilat deri tani nuk janë publikuar.

Përgatiti: Arbana Q.Klimenta

Në zyrën e Avokatit të popullit të dielën, në ditën e mbajtjes të rrethit të parë  të zgjedhjeve presidenciale 2019,  dhe zgjedhjet e parakohshme  për kryetar të komunave Ohër, Dibër dhe Novo Sellë në periudhën nga ora 07:00 deri në orën 19:00 do  të funksionojë  linja telefonike falas: 0800-54321, në të cilën qytetarët do të mund të paraqesin çfarëdo lloj shkelje  të së drejtës së votimit. Siç kumtojnë  nga zyra e avokatit të popullit, të hapura për qytetarët do të jenë të gjitha shtatë zyrat e Avokatit të popullit në: Shkup, Manastir, Kërçovë, Kumanovë, Strumicë, Tetovë dhe në Shtip, me qëllim që t’u ndihmohet  në realizimin dhe mbrojtjen e të drejtave të tyre të votimit. Avokati i popullit, të drejtat e qytetarëve  do t’i mbrojë  me ndërmarrjen e masave urgjente për veprim efektiv nga ana e organeve kompetente  në procesin zgjedhor dhe institucionet tjera të cilat obligohen t’u sigurojnë mbrojtje  të drejtave të tyre të garantuara.

Ministri i Brendshëm Oliver Spasovski tha se Ministria e Brendshme është e gatshme për ditën e zgjedhjeve. Sipas tij, siguria do të jetë në nivel të lartë dhe do të punohet për një ditë zgjedhore të qetë dhe demokratike

“Në bazë të kompetencave të saja, Ministria e Brendshme e ndjek të gjithë procesin zgjedhor me qëllim që dita e votimit të jetë e qetë, e papenguar siç i ngjan një vendi demokratik. Gjatë periudhës së kaluar, efektivët policorë u përpoqën për një siguri efikase të të gjithë procesit demokratik. MPB është e gatshme të sigurojë atmosferë të sigurt dhe dinjitoze për ditën e zgjedhjeve”, deklaroi Ministri i Punëve të Brendshme, Oliver Spasovski.

Bordi i drejtorëve ekzekutiv i Grupit të Bankës Botërore sot e miratoi kornizën katërvjeçare për partneritet e cila ka për qëllim mbështetjen për rritje më të shpejtë, gjithëpërfshirëse dhe të qëndrueshme në Republikën e Maqedonisë së Veriut. Siç paralajmëroi ministri i Financave paraprakisht me këtë vendit i jepen në dispozicion 420 milionë dollarë.

Strategjia, siç qëndron në kumtesën e Bankës Botërore, ka për qëllim ta mbështes programin dhe strategjinë afatmesme të Qeverisë përmes krijimit të më shumë mundësive për përmirësimin e standardit jetësor të qytetarëve dhe përshpejtimin e konventës të të ardhurave me Bashkimin Evropian.

“Zgjidhja e kontestit me emrin hapi mundësi të reja në Maqedoninë e Veriut”, tha Linda Van Galender, drejtoreshë rajonale për Ballkanin Perëndimor.

Strategjia e re është e fokusuar në tre sfera. Sfera e parë do të përmirësojë mjedisin e sektorit privat konkurrues duke rritur lidhshmërinë dhe përmirësimin e qasjes në tregje, duke ndihmuar bizneseve të bëhen më inovativë, produktivë dhe konkurrues dhe krijimin e vendeve më të mira dhe më të mira të punës për njerëzit.

Sfera e dytë do t’i mbështesë investimet në kapitalin njerëzor me fokus në përmirësimin e trajnimit në arsim dhe shkathtësitë, duke ofruar qasje më të mirë në shërbimet sociale për qytetarët më të rrezikuar dhe nxitjen për pjesëmarrje më inkuluzive në tregjet e punës.

Sfera e tretë do ta rikuperojë qëndrueshmërinë fiskale dhe qëndrueshmërinë e mjedisit duke forcuar menaxhimin financiar publik dhe përshpejtimin e tranzicionit të vendit drejtë një kombinim më të qëndrueshëm të burimeve energjetike. Sfidat e ndryshimeve klimatike do të zgjidhen përmes investimeve në efikasitetin energjetik, energjinë ripërtëritëse dhe transportin si edhe të cilat janë rezistente ndaj ndryshimeve klimatike.

Strategjia, në kuadër të tre sferave të fokusimit, mbështet reformat e politikave me qëllim të avancimit të agjendës së anëtarësimit të Maqedonisë Veriore në Bashkimin Evropian, duke plotësuar dhe përforcuar përpjekjet e Qeverisë dhe partnerëve të tjerë të zhvillimit.

Si pjesë e Kornizës së partneritetit të vendit, Korporata Ndërkombëtare Financiare (IFC), anëtare e Grupit të Bankës Botërore, do të kërkojë mundësi shtesë për të mobilizuar investimet e huaja të drejtpërdrejta në mënyrë që të gjenerojnë rritje dhe eksport, si dhe të përmirësohet pjesëmarrja e kompanive të vogla dhe të mesme në zinxhirin e furnizimit. IFC, gjithashtu do të mbështesë lehtësimin e tregtisë dhe logjistikës për përmirësimin e lidhjes me tregjet eksportuese dhe do të përfshijë sektorin privat në mbështetjen e tranzicionit energjetik.

“Qëllimi i IFC është të lirohet fuqia e sektorit privat për të përshpejtuar rritja e qëndrueshme ekonomike dhe të krijohen mundësi punësimi”, thotë Tomas Lubeck, menaxher rajonal i IFC-së për Evropën Qendrore dhe Juglindore.

Fokusi, shton ai, është të mbështesë rritjen e eksportit, të përshpejtojë tranzicionin e energjisë rinovuese dhe të përmirësojë inkluzivitetin  financiare dhe efikasitetin e sektorit financiar./MIA

Premtime të ndryshme gjatë këtyre 19 ditëve të fushatës presidenciale. Qytetarët të dielën do të vendosin se cili prej kandidatëve e ka ofruar konceptin më të mirë.

Blerim Reka arriti i parë. Tha se ndjehet shumë mirë dhe se mund të durojë edhe aq kohë.

“Të afërmit e mi çuditen prej ku e kam këtë energji. Unë u them se populli ma jep këtë energji. Entuziazmi i tyre më jep energji, andaj duhet tua sjell fitoren në këto zgjedhje”, potencoi Kandidati për President, Blerim Reka.

Edhe profesoresha Siljanovska Davkova ndjehet shumë mirë, ajo tha se është e shqetësuar për disa situata në vend, por se do të përpiqet që ajo të jetë  presidenti i ardhshëm me qëllim të ndryshojë diçka. E ka përkrahjen prej të afërmve të saj, por tha se po përpiqet t’i mbajë larg opinionit.

“Nëse unë nuk duhet të kem jetë private, për shkak se ashtu është kur jeni në fushatë për president, unë përpiqem t’i mbrojë maksimalisht”, tha Gordana Siljanovska Davkova, Kandidate për President.

Edhe profesori Pendarovski është i kënaqur nga fushata e deritanishme. Ai tha se të afërmit e tij i numërojnë ditët deri në fund të fushatës. Ai zbuloi se si do ta kalojë fundin e fushatës.

“Në shtëpi, në shtëpi, nuk do të dal aspak, përveç mbrëmjes kur do t’i presim rezultatet”, u shpreh Stevo Pendarovski, Kandidat për President. 

Pas arritjes,  tre kandidatët, në atmosferë të relaksuar e pinë kafen.

Debatin përfundimtar do të mund ta ndiqni të premten në orën 21, në TV21

Përgatiti Ljubisha Cvetkoski

Aplikacioni “Zgjedhje 2019” ose “Izbori 2019”  i cili është krijuar nga LSDM për të njoftuar mbi aktivitetet e fushatës zgjedhore presidenciale u tha se është mbyllur para disa ditëve por i njëjti siç shihet ende gjendet në Play Store dhe i njëjti mund të shkarkohet.

Shtabi zgjedhor i kandidates për presidente Gordana Siljanovska akuzon se nëpërmjet këtij aplikacioni, LSDM mbledh të dhënat personale të qytetarëve, përkatësisht të atyre të cilët kanë shkarkuar aplikacionin.

“Mbrëmë siç e dini mbi këtë problematik biseduam me Komisionin Zgjedhor Shtetëror, ndërsa sot në Prokurorinë Publike bisedova me përfaqësues të Komisionit të cilët bëjnë monitorime në rast të parregullsive zgjedhore. Nga aty na u tha që rasti është dorëzuar në Prokurorinë Publike Shkup në të cilën prokuror i caktuar duhet të hulumtojë mbi rastin”, tha Goran Mamirovski, zëdhënës i kandidates për president, Gordana Siljanovska Davkova.

Kryeministri Zaev tha se ky aplikacion është diçka që vendet evropiane e shfrytëzojnë tanimë me dekada dhe se kjo është një akuzë e rëndë kundrejt partisë që udhëheq.

“Gjithë atë që ndër vite e kemi bërë nga dera në derë, duke bërë evidencë nëpër fletore tani kaluam në mjetë moderne nëpërmjet internetit. Edhe ashtu vetëm sa të klikoni në ueb faqen e KSHZ keni qasje në listën zgjedhore në të cilën janë të lejueshme të dhënat në përputhje me ligjin dhe edhe në vet aplikacionin ajo është e lejuar dhe absolutisht besoj  se e gjitha kjo që bëhet është 100 për qind në përputhje me ligjet në vendin tonë dhe askush nuk prek në të dhënat personale të qytetarëve”, u shpreh kryeministri i Maqedonisë së Veriut, Zoran Zaev.

Edhe nga VMRO- DPMNE thonë që do të dërgojnë ankesë deri tek institucionet përkatëse por shprehen se nuk kanë besim në institucionet e vendit. Nga LSDM thonë që kjo është një tentim që të kthehet vëmendja për shkak të mundësisë për humbje në zgjedhjet presidenciale.

Përgatiti: Valmira Zendeli

Nën siguri të lartë policore dhe protokoll të veçantë, sot nga shtypshkronja në Manastir, “Kiro Dandaro” filloi distribuimi i materialit të besueshëm zgjedhor, deri te Komisionet Komunale Zgjedhore për rrethin e parë të zgjedhjeve presidenciale.

“Ekipet tona, anëtarët e KSHZ-së e morën materialin dhe u drejtuan për ta dorëzuar nëpër Komisionet Komunale Zgjedhore. Nga aspekti i përgatitjes së materialit, deri më tani procedura është zhvilluar  shumë mirë dhe shpresojmë se të dielën nuk do të kemi asnjëfarë problemi, sa i përket cilësisë dhe përpunimit të materialit votues”, u shpreh Oliver Derkoski, kryetar i KSHZ-së.

Derkoski shtoi se fletëvotimet nuk e përmbajnë emrin e ri “Republika e Maqedonisë së Veriut” por gjendet vetëm flamuri, numrat rendor të kandidatëve dhe emrat dhe mbiemrat e tyre, si dhe simbolet e partive politike që i mbështesin kandidatët. Nga shtypshkronja “Kiro Dandaro” shtojnë se i gjithë materiali zgjedhor ka nivel të lartë të mbrojtjes.

“Siguria është në nivel të lartë, ndërsa fletëvotimet kanë 21 mbrojtje. Nuk është e mundur që të falsifikohet asnjë fletë, shkresat origjinale janë bërë në letër mbrojtëse, e cila nuk mund të kopjohet, me të dhëna të përgjithshme për çdo vendvotim”, potencoi Dragi Milloshevski, Drejtor i Shtypshkronjës “Kiro Dandaro”.

Të drejtë vote, në këto zgjedhje presidenciale kanë 1.808.131 votues, që do të votojnë në 3480 vendvotime në vend. Materiali zgjedhor tashmë është në rrugë drejt 32 konsullatave diplomatike në diasporë, ku janë paraqitur 1 782 votues, që do të votojnë të shtunën. Të shtunën do të votojnë edhe 3583 persona të sëmurë, 1600 të burgosur dhe 7 persona të shpërngulur.

Përgatiti: Jovica Paunoski

Ekspertët e huaj kanë vlerësuar se censusi është rrezik real për dështimin e zgjedhjeve dhe andaj kanë rekomanduar i njëjti të tërhiqet. Ministrja Renata Deskoska nuk e përjashton mundësinë për ndryshime kushtetuese në pjesën e censusit, nëse nuk arrihet i njëjti në rrethin e dytë të zgjedhjeve presidenciale.

“Ndryshimi i Kushtetutës, me qëllim që të lehtësohet procesi i zgjedhjeve presidenciale  është diçka që tashmë e kanë rekomanduar OBSE/ODIHR. Ka dy opsione, njëra është që presidenti të zgjidhet në zgjedhje pa shumicën e nevojshme të daljes në rrethin e dytë. Kjo do të thotë se do të fitojë ai i cili do të marrë më shumë vota dhe këtu nuk keni mundësi t’i bojkotoni zgjedhjet. Opsioni tjetër është presidentin ta zgjedhë Kuvendi”, tha Ministrja e Drejtësisë, Renata Deskoska Treneska.

Këto mundësi i bëri me dije kryeministri Zaev në emisionin Klik Plus në TV21, i cili tha se nuk beson se do të bojkotohen këto zgjedhjet dhe se beson se do të arrihet censusi i nevojshëm. Ai theksoi se ka biseduar me Deskoskën në rast të mos arrihet censusi dhe se i janë prezantuar pikërisht këto dy opsione.

Akuzat se opozitarja VMRO-DPMNDE mendon për bojkot të zgjedhjeve, i hodhi poshtë kryetari i partisë, Hristijan Mickoski. Njëkohësisht, kandidatja e tyre, Siljanovska në mitingjet shpesh herë u bën thirrje qytetarëve të dalin në numër të madh të votojnë, me qëllim, siç thotë ajo, të mos ketë mundësi që presidenti të zgjidhet në Kuvend.

“Motiv më të madh për bojkot kanë disa opsione tjera politike në Maqedoni se sa VMRO-DPMNE e cila do të fitojë në këto zgjedhje, nuk e di se si nuk e keni të qartë këtë gjë”, u shpreh kryetari i VMRO-DPMNE-së, Hristijan Mickoski.

Censusi të cilin e parasheh Kushtetuta për rrethin e dytë të zgjedhjeve presidenciale parasheh dalje  prej të paktën 40%, që do të thotë 1. 808. 131 votues, në zgjedhjet do të duhet të dalin së paku 723 mijë e 253 votues.

Përgatiti: Svetllana Unkovska

Nga viti i ardhshëm, gjashtë kompani do të bashkëpunojnë me shkollën elektroteknike “Mihajllo Pupin”. Pas mbarimit të shkollës së mesme, nxënësit e kësaj shkolle drejtpërdrejt do të punësohen në këto firma. Bashkëpunimi me firmat përkatëse u mundëson nxënësve që edhe praktikën të mbajnë aty, ngaqë shkollat nuk kanë pajisje të duhura për praktikë. Drejtor i shkollës në fjalë, Dimitar Georgiev thotë se kjo bëhet për t’i motivuar nxënësit që të ndjekin shkolla profesionale.

“Para ca vitesh shkolla jonë u bë e para në vendin tonë që ka paralele të ashtuquajtur 20-20-20. Paralele e cila është formuar në bashkëpunim me EVN Maqedoni. Vitin e ardhshëm do të dalin kuadrot e para të trajnuara nga kjo paralele që do të jenë të punësuar në këtë firmë, me pagë fillestare prej 20 mijë denarësh. Në këtë paralele, vitin e ardhshëm do të kyçen edhe gjashtë firma”, theksoi Dimitar Goergiev, Drejtor i SHMET “Mihajllo Pupin”.

E para disa ditëve pikërisht per kete temë profesorë të Shkollës së mesme elktro-makinerike “8 Shtatori” u ankuan se numri i nxënësve të regjistruar në shkollën e tyre po bie dhe rrezikon të mbyllet.

“Është për të ardhur keq, që një shkollë që ka pasur 900 nxënës tani të vijë në atë shkallë që të mbyllet apo të ngelet vetëm me 100 nxënës. Nëse këtë vit kemi vitin e tretë dhe të katërt  shkojnë 50 maturantë paramendoni do të mbeten vetëm 50 nxënës. Vitin e kaluar u regjistruan vetëm 14 fëmijë. Tre nxënës në paralelet maqedonase dhe 11-të në paralelet shqipe, ku është ardhmëria dhe perspektiva e këtij shteti”, u shpreh Kenan Asipi, Drejtor i QSHEM “8 Shtatori”.

Por Ministri i arsimit Arbër Ademi, tha se po punohet në çdo aspekt, që të rritet cilësia në shkollat profesionale.

“Janë bërë një sërë hapash të rëndësishme në drejtim të promovimit, modernizimit dhe rritjes së atraktivitet të arsimit të mesëm profesional. Plane të reja mësimore po, programe të reja mësimore po, në përputhje edhe me kompanitë, sektorin e biznesit, përmirësim të kushteve në shkollat e mesme profesionale po, pajisje dhe furnizim me pajisje të nevojshme po vijojnë që ta bëjmë në shkollat profesionale”, deklaroi Ministri i Arsimit dhe Shkencës, Arbër Ademi.

Ndryshe sot u promovua fushata “Edhe e mesme, edhe e vlefshme, që ka për qëllim t’i njoftojë semimaturantët me beneficionet dhe mundësitë që u sjellin shkollat e mesme profesionale.

Ndërkaq, Arbër Ademi, thotë se interesimin për regjistrim në shkolla profesionale e ulin disa mite të caktuara që janë përhapur nëpër popullatë, se këto shkolla nuk kanë perspektivë.

Përgatiti: Almedina Ismajli