Presidenti turk, Recep Tayyip Erdogan, zhvilloi një bisedë telefonike me presidentin amerikan, Donald Trump, ku diskutuan marrëdhëniet dypalëshe, zhvillimet në Lindjen e Mesme dhe luftën mes Rusisë dhe Ukrainës.

Sipas një deklarate të Presidencës turke, Erdogan theksoi rëndësinë e forcimit të bashkëpunimit mes Ankarasë dhe Uashingtonit, në prag të 100-vjetorit të vendosjes së marrëdhënieve dypalëshe në vitin 2027. Ai nënvizoi se Turqia do të vijojë përpjekjet për të zgjeruar bashkëpunimin me Shtetet e Bashkuara në të gjitha fushat.

Gjatë bisedës, një vëmendje e veçantë iu kushtua situatës në Lindjen e Mesme. Erdogan e informoi Trumpin për qëndrimin e Ankarasë ndaj zhvillimeve në rajon, duke përfshirë Ngushticën e Hormuzit dhe Jemenin. Sipas Presidencës turke, ai bëri të ditur se Turqia po monitoron nga afër situatën dhe po kërkon zgjidhje diplomatike në kuadër të Aleancës së Mbrojtjes së Përbashkët të Mekës.

Sa i përket luftës Rusi-Ukrainë, presidenti turk shprehu gatishmërinë e vendit të tij për të mbështetur rifillimin e përpjekjeve diplomatike mes dy palëve, me synimin për t’i dhënë fund luftimeve.

Nga ana e tij, Trumpi uroi Erdoganin dhe popullin turk për Ditën e Republikës së Turqisë, që shënohet më 29 tetor, si dhe për organizimin me sukses të Samitit të Organizatës së Shteteve Turkishtfolëse.

Presidenti i Izraelit, Isaac Herzog, u ka bërë thirrje partive politike që të bëjnë gjithçka për të shmangur zgjedhjet e reja, pas rezultatit të paqartë të zgjedhjeve parlamentare.

Në fjalimin e tij të parë publik pas votimit, Herzog tha se pret rezultatet përfundimtare gjatë javës së ardhshme, ndërsa paralajmëroi konsultime me grupet parlamentare për formimin e qeverisë së re.

Ai vlerësoi pjesëmarrjen e lartë të qytetarëve, duke theksuar se ajo pasqyron dëshirën e izraelitëve për demokraci.

Sipas rezultateve paraprake, me rreth 85 për qind të votave të numëruara, blloku i kryeministrit Benjamin Netanyahu ka siguruar 53 mandate, ndërsa koalicioni i udhëhequr nga Gadi Eisenkot ka 48 vende.

Ndërkohë, partitë kryesisht arabe, Lista e Përbashkët dhe Ra’am, kanë siguruar së bashku 19 mandate, në parlamentin që ka gjithsej 120 vende.

Sipas Komisionit Qendror Zgjedhor, pjesëmarrja në votime arriti në 77.7 për qind, duke shënuar rritje krahasuar me 70.6 për qind në zgjedhjet e vitit 2022.

Me 5.6 milionë qytetarë që ushtruan të drejtën e votës, kjo është pjesëmarrja më e lartë në zgjedhjet izraelite që nga viti 1999, ndërsa sfida kryesore mbetet sigurimi i mbështetjes së mjaftueshme për formimin e qeverisë së re.

Presidenti amerikan Donald Trump ka lënë të hapur mundësinë e përfshirjes në përpjekjet për formimin e një qeverie uniteti në Izrael, në një kohë kur rezultatet paraprake të zgjedhjeve nuk garantojnë një shumicë të qartë parlamentare.

Në një prononcim për Axios, Trump tha se nuk e kishte shqyrtuar më parë këtë mundësi, por shtoi se do ta merrte në konsideratë, duke vlerësuar se kryeministri Benjamin Netanyahu ndodhet në një pozicion mjaft të mirë.

Trump pretendoi gjithashtu se mbështetja e tij kishte ndikuar në rezultatet e Netanyahut, të cilit iu referua me nofkën “Bibi”.

Megjithatë, disa nga rivalët kryesorë të kryeministrit kanë përjashtuar mundësinë e bashkëqeverisjes me të, ndërsa edhe kreu i partisë arabe Ra’am, Mansur Abbas, ka kundërshtuar një koalicion të tillë.

Sipas The Times of Israel, Trump ka zhvilluar bisedime me përfaqësues të bllokut të afërt me Netanyahun gjatë ditëve të fundit.

Me shumicën e votave të numëruara, blloku i Netanyahut parashikohet të sigurojë rreth 53 vende në parlament, ndërsa partitë e tjera pritet të ndajnë 67 vendet e mbetura.

Kjo situatë e ndërlikon formimin e qeverisë, veçanërisht pasi partitë arabe, që pritet të sigurojnë 19 vende, janë përjashtuar si partnere të mundshme nga aktorë kryesorë të bllokut kundër Netanyahut.

Presidenti ukrainas, Volodymyr Zelensky, shpreson që Bashkimi Evropian të përfshihet në bisedimet me Rusinë dhe Shtetet e Bashkuara, të planifikuara për muajin nëntor.

“Shpresojmë të gjejmë një mënyrë për të përfshirë Evropën”, deklaroi Zelensky gjatë vizitës në Hagë, ku u takua me kryeministrin holandez, Rob Jetten.

Ende nuk është bërë e ditur se kur dhe ku do të zhvillohen bisedimet. Sipas Zelenskyt, kjo çështje pritet të diskutohet sërish në fillim të nëntorit, pas zgjedhjeve të mesmandatit në SHBA.

Gjatë takimit, kryeministri holandez, Rob Jetten, njoftoi se Holanda i ka premtuar Ukrainës 500 milionë euro ndihmë ushtarake, me synimin për ta ndihmuar vendin të përballojë dimrin e ardhshëm.

Paketa e re përfshin kryesisht sisteme të mbrojtjes kundërajrore dhe dronë. Më herët, Holanda kishte premtuar edhe një paketë tjetër ndihme me vlerë 1,2 miliardë euro, e përbërë nga pajisje dhe materiale jo-ushtarake.

Jetten theksoi se Rusia po shton sulmet ndaj objektivave civile dhe infrastrukturës jetike në Ukrainë, në prag të dimrit. Për këtë arsye, ai u bëri thirrje vendeve evropiane të veprojnë të bashkuara dhe të ashpërsojnë sanksionet kundër Moskës.

Në kuadër të vizitës së tij në Holandë, presidenti ukrainas, Volodymyr Zelensky, pritet të takohet edhe me mbretin Willem-Alexander, gjatë mbrëmjes së sotme.