Ali Ahmeti, në Ditën Ndërkombëtare të Demokracisë, ka theksuar rëndësinë e lirisë, pluralizmit dhe barazisë si vlera themelore të një shoqërie demokratike, përcjell TV21 Në një shkrim, kreu i BDI-së ka thënë se demokracia duhet të jetë kulturë e shoqërisë dhe standard për institucionet dhe proceset politike. Ahmeti ka vlerësuar se në një shoqëri të ndërtuar mbi diversitetin, demokracia duhet të krijojë hapësirë për dallimet dhe të forcojë bashkëjetesën.

“Sot shënojmë Ditën Ndërkombëtare të Demokracisë, një ditë që na kujton vlerën e lirisë, pluralizmit dhe përgjegjësisë që kemi si shoqëri. Demokracia është, mbi të gjitha, testi më i lartë i pjekurisë politike. Ajo është më shumë se një arkitekturë institucionesh dhe më shumë se një proces elektoral. Është besëlidhja e heshtur mes shtetit dhe qytetarit se liria nuk negociohet, dinjiteti nuk relativizohet dhe barazia nuk mbetet vetëm një parim në letër. Në një shoqëri të ndërtuar mbi diversitetin, demokracia e vërtetë nuk kërkon uniformitet. Ajo krijon hapësirë për dallimet, i jep pluralizmit dinjitet institucional dhe e shndërron bashkëjetesën nga një nevojë historike në një vlerë shtetformuese. Demokracia duhet të jetë kulturë e shoqërisë dhe standard i çdo institucioni, çdo strukture politike, çdo gare dhe çdo vendimmarrjeje. Paqja e qëndrueshme ndërtohet mbi demokraci, ndërsa demokracia e qëndrueshme ndërtohet mbi respektin, dialogun dhe barazinë. Përballë sfidave të kohës dhe ndryshimeve që prekin rajonin dhe Evropën, përgjigjja jonë duhet të jetë më shumë demokraci, më shumë dialog dhe më shumë maturi në vendimmarrje. Ky është standardi që i duhet vendit tonë, si themel i një të ardhmeje të përbashkët, më të drejtë, më të qëndrueshme dhe më evropiane. Ky është drejtimi që na afron me Evropën”, ka shkruar Ahmeti.

Nga Bashkimi Demokratik për Integrim sot sërish kanë reaguar ndaj deklaratave të ministrit të Drejtësisë, Jeton Shasivari, lidhur me procesin gjyqësor në Hagë për ish-krerët e UÇK-së. Sipas BDI-së, Shasivari ka shkaktuar dëm të rëndë ndaj së vërtetës historike dhe kauzës shqiptare, pasi, siç thonë, ka barazuar viktimat e regjimit të Millosheviqit me agresorët.

“Deklarata skandaloze e ministrit të Drejtësisë ka shkaktuar dëm të rëndë ndaj së vërtetës historike dhe kauzës së shqiptarëve. Barazimi i viktimave të regjimit të Millosheviqit me agresorët prek drejtpërdrejt sakrificën e një populli të tërë dhe përpjekjen e tij për liri. Komunikatat e VLEN-it nuk mund ta mbulojnë këtë qëndrim. Kur një mendësi politike shfaqet kaq qartë përmes deklaratave të përfaqësuesve të vet, formulimet e mëvonshme nuk e zhbëjnë atë. Kjo është ideologjia e VLEN-it. Sot ajo u shpreh publikisht nga ministri i tyre i Drejtësisë. Dëmi ndaj kauzës shqiptare është i paprecedentë dhe kërkon përgjegjësi të qartë politike”, thonë nga BDI.

Energy Ecolink ka hapur thirrjen për iniciativën “Ndërtesa e Gjelbër”, një program pilot për objektet banesore që dëshirojnë të lidhen me sistemin modern të ngrohjes qendrore, përcjell TV21. Sipas njoftimit të kompanisë, ndërtesat e paraqitura do t’i nënshtrohen një vlerësimi teknik dhe operativ. Objekti që do t’i plotësojë më së miri kriteret do të përfshihet në një periudhë testuese 15-ditore të ngrohjes gjatë muajit nëntor, pa kompensim.

Për të aplikuar, ndërtesa duhet t’i plotësojë këto kushte: Të sigurohet pëlqimi i së paku 51% të pronarëve të apartamenteve;
Të ketë nënstacion funksional të ngrohjes;
Instalimi i brendshëm të jetë i përfunduar dhe funksional;
Nënstacioni të mos ketë detyrime të papaguara për energjinë elektrike.
Banorët fillimisht duhet t’i mbledhin nënshkrimet e nevojshme, ndërsa lista mund të dorëzohet fizikisht në ambientet e Energy Ecolink ose në formë të skanuar përmes postës elektronike.

Aplikimet janë të hapura nga 1 deri më 30 shtator.

Për më shumë informacione:

E-mail: info@energyecolink.mk
Telefon: +389 2 2636 156

Departamenti Amerikan i Shtetit ka shpalosur sot një kthesë të rëndësishme strategjike në politikën e tij të jashtme ndaj Ballkanit Perëndimor, duke deklaruar zyrtarisht se epoka e ndërtimit të shteteve përmes ndërhyrjeve të jashtme ka përfunduar.

Në dëshminë e tij të shkruar përpara Nënkomitetit për Evropën në Kongresin Amerikan, Zëvendës-Ndihmës Sekretari i Shtetit, Daniel Lawton, bëri të qartë se Uashingtoni zyrtar nuk do të ofrojë më “mjete të pakufizuara për qëllime të paprcaktuara”.

Ai u bëri thirrje liderëve ballkanikë që të braktisin grindjet e vjetra dhe të gjejnë vetë zgjidhje pragmatike për problemet e tyre. Sipas dokumentit të siguruar, politika e re e SHBA-së në rajon do të mbështetet në tri shtylla kryesore, ruajtja e stabilitetit, zgjerimi i interesave ekonomike amerikane dhe luftimi i krimit të organizuar transnacional që kërcënon drejtpërdrejt sigurinë e SHBA-së.

Mesazhet e prera për rajonin

Kosovë: Kritika për vonesat institucionale dhe thirrje për mbrojtjen e serbëve

Uashingtoni rikonfirmoi mbështetjen e fuqishme për pavarësinë dhe integritetin territorial të Kosovës, por shprehu shqetësim të hapur për ngadalësimin e proceseve të brendshme. Lawton vuri në dukje se agjenda e përbashkët është penguar nga zgjedhjet e përsëritura, qeveritë e zgjatura në detyrë dhe vonesat në krijimin e institucioneve. Më tej, në deklaratë ngrihen shqetësime për “shqyrtim të tepruar ligjor dhe policor ndaj popullatës serbe në Kosovë”, duke kërkuar që të gjithë qytetarët të gëzojnë të drejta të barabarta për të ruajtur stabilitetin. Ndërkohë, prania e KFOR-it mbetet jetike dhe do të vazhdojë të mbështetet nga trupat amerikane.

Shqipëri: Partneritet ushtarak dhe goditje e kartelave të drogës

Shqipëria cilësohet si një aleat i ngushtë i NATO-s me të cilin SHBA po punon ngushtë për çmontimin e organizatave kriminale që bashkëpunojnë me kartelet e Hemisferës Perëndimore. Përmes një kredie të sapofinalizuar për Financimin e Ushtrisë së Jashtme (FMF), SHBA do të ndihmojë Shqipërinë të modernizojë ushtrinë e saj dhe të rrisë blerjet e pajisjeve të prodhuara në Amerikë.

Serbi: SHBA po bëhet “partneri i përzgjedhur”

Dokumenti zbulon një afrim të ndjeshëm të SHBA-së me Beogradin zyrtar me qëllim bllokimin e ndikimeve të huaja kundërshtare (si Rusia dhe Kina). Pas Dialogut Strategjik SHBA-Serbi të mbajtur në korrik, Uashingtoni po e sheh Serbinë si një vend kyç për ekuilibrin rajonal dhe po rrit bashkëpunimin në energji, mbrojtje dhe tregti.Dialogu Kosovë-Serbi ka ngecurSa i përket marrëdhënieve mes Prishtinës dhe Beogradit, SHBA vlerëson se përparimi më i madh ka ndodhur gjatë Marrëveshjes së Uashingtonit të vitit 2020, të ndërmjetësuar nga Presidenti Trump në mandatin e tij të parë. Megjithatë, dialogu aktual i lehtësuar nga BE-ja ka ngecur për shkak të “mungesës së vullnetit politik nga të dyja palët”. SHBA kërkon rifillimin e bisedimeve direkte pa parakushte dhe shmangien e provokimeve.

Bosnjë, Maqedoni e Veriut dhe Mali i Zi:

Në Bosnjë dhe Herzegovinë, diplomacia amerikane vlerëson se ka shmangur një krizë të rëndë duke siguruar tërheqjen e legjislacionit anti-Dayton nga Republika Srpska. Ndërsa Maqedonia e Veriut dhe Mali i Zi lavdërohen për projektet e tyre të ndërlidhjes infrastrukturore dhe energjetike (përfshirë gazin LNG), të cilat hapin dyer të reja për investimet e kompanive amerikane.