Me vendim të gjyqit, dënimet për mjekun i cili rrezikon jetën e një pacienti do të thotë marrje përgjithmonë e lejes së punës, por nëse e shkel Kodeksin e etikës mjekësore, mund t’i merret leja në një afat prej deri 7 vjetësh, thonë nga Oda e mjekëve e Maqedonisë.

Sipas tyre, drejtorët e institucioneve janë ata që duhet të kenë kujdes në çfarë kushtesh punojnë të punësuarit. Lençe Nelovska, kryetare e Odës së mjekëve thotë:

„Secili institucion shëndetësor ka nivel të shkallës së parë të menaxhmentit. Kështu që, përgjegjësia lëvizë sipas shkallëve, para së gjithash, menaxhmenti i institucionit”. Ajo shtoi se as një punonjës nuk guxon të shkojë në punë në gjendje të alkoolizuar.

„Askush nuk guxon të vijë në punë në gjendje të alkoolizuar. Në pajtim me Ligjin për marrëdhëniet e punës, secili punëtor dhe i punësuar në cilindo institucion, nuk guxon të kryejë veprime në gjendje të alkoolizuar.”

Në bisedë telefonike, drejtori i spitalit të Gjevgjelisë, Sretko Jovanov, deklaroi se është e mundur të japë dorëheqje nga funksioni, për shkaqe morale, por nuk e di se kur.

Para katër ditëve vdiq lehona 32 vjeçare me beben e saj për shkak të komplikimeve gjatë lindjes me prerje Cezariane. Dy anesteziologë janë suspenduar ndërsa zgjatë procedura, por ende nuk ka të dhëna zyrtare se a kanë pasur në gjak alkool ose substanca të tjera të ndaluara.

Specialisti për mjekësi gjyqësore, Aleksej Duma Rasti thotë për TV 21 se rasti me lehonën e vdekur nga Gjevgjelia dhe beben e saj ka përparësi edhe në hulumtimet laboratorike të mjekësisë ligjore për përcaktimin e shkakut të vdekjes,.

“Autopsia është kryer dhe tani duhet të bëhen hulumtimet laboratorike. Të punësuarit janë angazhuar edhe të shtunën dhe të dielën për t’i përpunuar materialet”, thotë Aleksej Duma. Ai shtoi se nuk mund të shpallen informata derisa të përfundojë procesi i analizës në tërësi, për çka nevojiten disa ditë. I gjithë dokumentacioni, raportet dhe analizat e mjekësisë ligjore do t’i dorëzohen Prokurorisë publike të Velesit”,  thotë ai.

Lehona 32 vjeçare duhej të lindte fëmijën e saj të dytë, por gjatë lindjes me prerjen Cezariane gjendja u ndërlikua dhe ajo bashkë me beben e saj, vdiqën.

Dje nga Ministria e shëndetësisë lëshuan një komunikatë ku thuhet se institucionet gjegjëse po ndërmarrin të gjitha masat e nevojshme dhe se fajtorët për këtë tragjedi do të përgjigjen dhe do të paguajnë çmimin për papërgjegjësinë e tyre, në procedurë të paraparë me ligj.

Ky është vendi ku duhej të jetë fusha e re e sportit në fshatin Dobërcë në  komunën e Zhelinës. Para një muaji,  kryetari i komunës, Fatmir Izairi, premtoi se do të fillohet me ndërtimin e fushës brenda pak ditëve, dhe se do të përfundojë deri në fund të vitit.

“Fusha e sportit do kryhet këto ditë . Është ankandi. Brenda një muaji, maksimum dy,  ajo do të kryhet. Para Vitit të Ri do të jetë e kryer”, theksoi Fatmir Izairi.

Por kjo nuk rezultoi kështu.  Punët për fushën e sportit ende nuk kanë filluar, kurse banorët lokalë thonë se përgatitjet për fillimin e ndërtimit të fushës kanë filluar para tre vjetëve. Edhe kryetari i komunës pranoi se ai vend është rrafshuar dhe përgatitur dy herë para tre vjetëve, por tha se në atë kohë fusha duhej të ndërtohet nga Agjencia për rini dhe sport. Ai tha se komuna ka aplikuar për fonde në byronë për furnizime publike dhe se presin që komisioni i saj të miratojë fondet për të fillouar me ndërtimin.

“Është e vërtetë, ka 3 vjet që është rrafshuar dy herë, ka qenë agjencia për sport, rini dhe kulturë. Ai projekt nuk u realizua.

Aplikuam atje dhe presim që këto ditë që ata nëse e miratojnë sigurisht që do të miratojnë gjysmën , dikur rreth 700-800 mijë denarë , pasi që fusha do të kushtojë rreth 25 000 euro. Dhe nëse komuna mund t’i shfrytëzojë këto mjete, e ndërprejmë për pak .

Do të hapet ankandi, do të shkojë 1 muaj deri sa të lidhet kontrata , varet prej kushteve klimatike se a do të bëhet deri në Vitin e Ri, apo në verë; megjithatë është punë e kryer”.

Trupi koordinues i ushtarëve profesionistë të shkarkuar e ka ndërprerë grevën e urisë. Ata gjatë mesditës i larguan tendat që për një kohë të gjatë ishin vendosur para Kuvendit. Vendimi, siç thonë, vjen pas paralajmërimit se të martën do të mbahet seanca e Komisionit për mbrojtje dhe siguri, ku në rendin e ditës duhet të gjendet edhe nisma e tyre për ndryshimin e Ligjit për shërbim në ARM.

DEKLARATË BORÇE ANDONOVSKI – SINDIKATA E PAVARUR E USHTARËVE PROFESIONISTË

“Edhe një herë kërkojmë që në diskutim të marrin pjesë përfaqësues të ushtarëve profesionistë të shkarkuar dhe u bëjmë apel që të gjithë pjesëmarrësit në debat ta mbështesin iniciativën”, tha Borçe Andonovski nga Sindikata e Pavarur e Ushtarëve Profesionistë

Me mbështetjen e këtyre ushtarëve, siç tha Andonovski, do të korrigjohet padrejtësia e bërë ndaj tyre dhe do të ndikohet në moralin dhe shpirtin ushtarak të ARM-së. Ushtarët e shkarkuar kërkuan prej shtetit që ta zgjidhë statusin e tyre, sepse ata janë larguar prej punës për shkak të kufirit të moshës prej 35 deri 38 vjet. Ministria e mbrojtjes para ca kohësh njoftoi:

“Qeveria bashkë me Ministrinë e Mbrojtjes në vitin 2013 kanë përgatitur propozim për ndryshimet e Ligjit për shërbim në ARM. Me ndryshimet e bëra ishin përfshirë ish ushtarët profesionistë, të cilëve u mbaroi kontrata profesionale me ARM-në. Pas kontrollimeve të kryera nga Ministria e Mbrojtjes dhe Shtabi i Përgjithshëm  i ARM-së u konfirmua se 59 persona i plotësojnë kushtet dhe se këta 59 persona ishin punësuar në Ministrinë e Mbrojtjes. Me këto ndryshime është qartësuar se pas mbushjes së moshës prej 45 vjetësh, ushtarët profesionistë do të vendosin marrëdhënie pune në kohë të pacaktuar pa shpallje publike, por në pajtim me përgatitjen e tyre profesionale dhe aftësitë personale”, kjo u theksua në deklaratën e fundit nga Ministria e Mbrojtjes.

Ushtarët profesionistë sot morën mbështetje edhe nga një grup gjeneralësh në pension. Ata u bënë thirrje deputetëve në Kuvend që ta mbështesin ligjin. Sipas tyre, ndryshimet në Ligjin për shërbim në ARM nuk do të kenë pasoja fiskale për Buxhetin, por do t’i zgjidhin fatet e njerëzve në ARM.

“Kjo na shqetëson, veçanërisht sepse një pjesë e ushtarëve sipas ligjit të marrëveshjes janë punësuar në mënyrë selektive, ndërsa ata që nuk i kanë kaluar kontrollimet nëpër komunat e VMRO-së, këtë e theksoj, sepse nuk janë bërë kontrollime nëpër institucionet e sistemit, por janë bërë kontrollime partiake. Prandaj ne duam t’i mbështesim”, tha Ilija Nikolovski, gjeneral i pensionuar.

Ai është shqetësuar për gjendjen e përgjithshme në ARM, ai shton më tej:

“Kohën e fundit atje ka pensionime masive, zhvendosje masive nga një detyrë në detyrë tjetër. Me fjalë të tjera bëhet selektim për të gjithë ata për të cilët është vlerësuar se janë të papërshtatshëm, janë në pension ose zhvendosen në detyra të tjera. Ky është një gabim strategjik”.

Te ne profesionalizmi nuk respektohet, thotë Nikolovski, por siç theksoi ai, mbizotëron përkatësia partiake. Sipas tij, Maqedonia gjendet në krizë të thellë politike dhe të sigurisë. Kriza, siç tha Nikolovski, është më e madhe sesa ajo i vitit 2001.

Përkundër dënimeve të larta që janë parashikuar për vozitje të shpejtë, ngjarjet tragjike në të cilat shkelen këmbësorë, rriten çdo ditë e më tepër. Vetëm këtë javë kishte disa raste në të cilat e humbën jetën disa kalimtarë.  Dje pasdite, në lagjen Hrom, një kamion e goditi për vdekje një 12-vjeçare, e cila bashkë me nënën, ishte duke u kthyer nga tregu. Vajza ndërroi jetë në vendin e ngjarjes, kur kamioni i kaloi sipër.

Një tjetër tragjedi ndodhi edhe në rrugën regjionale Gostivar-Trbenivo-Padallishtë, ku tetë persona, prej të cilëve tri gra dhe pesë fëmijë u lënduan në fatkeqësinë e trafikut, kur një veturë e markës Hondai, për shkaqe të panjohura humbi kontrollin, doli nga rruga dhe u rrokullis në një humnerë.

Gjithashtu, një tjetër person ndërroi jetë, ndërsa 4 të tjerë u lënduan në një fatkeqësi trafiku, që ndodhi mbrëmë në rrugën regjionale Ohër-Strugë. Vetura doli nga rruga, me ç‘rast , një 29-vjeçar ndërroi jetë në vendngjarje.

Javën e kaluar, në afërsi të Kishës katolike, një veturë goditi një vajzë të vogël, e cila, fatmirësisht nuk iu nënshtrua lëndimeve të marra.

Këshilli republikan për siguri në trafik, me anë të fushatave apelojnë të respektohen rregullat e trafikut. Disa persona publikë ishin pjesë e fushatës “vozit, sikur çdo fëmijë në rrugë, të ishte i yti”.

Gjashtë vjet i kaloi nëpër spitalet e Kosovës. Shkoi edhe në Shqipëri e Turqi. Por pa ndonjë rezultat. Ani pse është veç një fëmijë 7 vjeçar, tërë këto vjet u përballë me shumë operacione, terapi nga më të ndryshmet. Herë i thanë që vuan nga leukemia, e herë nga tumori në boshtin kurrizor. Shërimin nuk e gjente dot./ 21 Media

Në qytetin e Tetovës është hapur Panairi i tretë i radhës me veshje dhe punime të traditave shqiptare, me motive të trojeve kombëtare, ku po marrin pjesë shoqata nga Shqipëria, Mali i Zi, Kosova dhe Maqedonia. Ata kanë prezantuar në këtë panair veshjet, mbulesat e vjetra, veshje nusërie, monedha antike, si dhe punime druri me motive kombëtare.

Qytetarë nga Tetova kishin dalur për të vizituar këtë panair, ndërsa shpreheshin se ata po rikthejnë në kujtime të vjetra duke i përkujtuar ata në traditat e veshjeve tradicionale, nga të gjitha trojet shqiptare.

Panairi po  organizohet nga shoqata e artistëve dhe artizanëve Globus Art nga Ulqini në bashkëpunim me komunën e Tetovës. Ai do të jetë i hapur edhe ditën e nesërme për ta vazhduar karvanin e tyre në qytetin e Gostivarit.

Zimer Jashari

Me zhvillimet e fundit Maqedonia u bë njollë e zezë në Ballkan, deklaroi lideri i partisë VMRO-popullore, Lubço Georgievski – në emisionin “10 minuta”.

Ai shprehu pesimizëm në lidhje me përmbushjen e Marrëveshjes së Përzhinos. Georgievski parashikoi se betejat ndërpartiake do të jenë edhe më të nxehta.“Në 2-3 ditët e fundit kam një ndjenjë pesimizmi. Kjo ndjenjë po bëhet më e madhe edhe pas asaj që e pashë mbrëmë. Kam një ndjenjë se Marrëveshja e Përzhinos ka më shumë gjasa të dështojë sesa të ketë sukses. Për mua kjo do të thotë katastrofë e madhe. Konsideroj se këto nuk do të duhej të quheshin kërcënime, po tërheqje vërejtjesh nga ana e faktorit të jashtëm. Të paktën për ato që kanë të bëjnë me Maqedoninë do të realizohen dhe kjo nënkupton largim të shtetit nga integrimet euro-atlantike”, thotë ish-kryeministri dhe ish-kryetar i partisë në pushtet.

Maqedonia asnjëherë nuk ka qenë në situatën që është tani, tha Georgievski, duke theksuar se edhe në kohën e konfliktit të armatosur vendi i ka qëndruar besnik rrugëtimit euro-atlantik. Sipas tij, po bëhet fjalë për tejkalimin e suitave të liderëve të partive më të mëdha politike.“Tani edhe njëra palë edhe tjetra po luajnë për jetë ose vdekje. Opozita po nxjerr gjithçka që ka, kurse pushteti nuk ka argument tjetër: o do të luftojë deri në fund, o do të duhet të shkojë në burg. E tërë situata është shumë shqetësuese”, vlerëson Georgievski

Lideri i VMRO-Popullore konsideron se po qe se në dy-tri ditët vijuese arrihet ndonjë marrëveshje, kemi gjasa të vazhdojmë përpara, përndryshe, siç tha Georgievski, do të hyjmë në binarë pa fund.

VMRO – DPMNE i vlerson kërkesat e reja të LSDM-së si ikje nga zgjedhjet e prillit, ndërsa i bëri thirrje partisë në opozitë, që të ballafaqohet me gjyqin e qytetarëve. Deputeti i VMRO DPMNE-së, Andon Çibishev, në emër të partisë, tha që çdo kërkesë e re e partisë në opozitë, është tentim për t’iu shmangur zgjedhjeve të reja.

Sipas Çibishev, LSDM-ja nuk është mësuar që të fillojë të ndërtojë një infrastrukturë prej zeros. Ai theksoi se VMRO – DPMNE-ja në mënyrë transparente dhe duke respektuar të gjitha ligjet e Republikës së Maqedonisë, ka krijuar kushte elementare për punë për anëtarët e saj.

Reagimi i VMRO DPMNE-së vjen pas konferencës së jashtëzakonshme të LSDM-së, e cila paraqiti dokumente që, sipas saj, përmbajnë elemente kriminale. Reagimi po ashtu pasoi  paralajmërimin e partisë më të madhe opozitare, se do të vazhdonte me publikimin e të ashtuquajturave “Bomba” nëse nuk arrihet marrëveshja.

Shumë studentë dhe nxënës të shkollave të mesme kishin ardhur në promovimin e programit të bursave “Bursa Ekspo” për studime jashtë vendit. Studentëve i`u prezantua një ofertë e pasur, ku ata do të njiheshin me universitete të njohura botërore dhe programet e tyre studimore.

Në këtë organizim u promovuan 17 universitete nga 7 vende të ndryshme të botës,  që ofrojnë mundësi studimi përmes bursave studimore.

Për herë të parë ishte oferta nga Kolegji kanadez Ashbury dhe Fakulteti për Biznes dhe Administratë nga Spanja.  Por ofertat e pasura janë edhe nga Zvicra, Italia, Holanda, Greqia dhe Shtetet e Bashkuar që çdo vit për studentët nga Maqedonia  ofrojnë mundësitë e studimit përmes bursave.

Ivana Dievska nga  organizata  “Qendra  për Këshilla Edukative” informoi se kjo është një mundësi e mirë për studentët që duan të studiojnë jashtë vendit.  Sipas saj, ky promovim tregon se sa të rinj janë të interesuar për të studiuar jashtë vendit.

Studentët theksojnë se dëshirojnë të studiojnë jashtë vendit, për shkak të kushteve më të mira për studime dhe mundësitë që ofrohen.