Reagime dhe vërejtje të shumta për propozim-ligjin për shërbimin gjyqësor u paraqitën në dëgjimin publik për këtë ligj në Komisionin për sistem politik dhe marrëdhënie ndërmjet komuniteteve. Përfaqësues nga shërbimet dhe sindikatat kërkuan që ai të tërhiqet nga procedura ose të bëhet ndërhyrje serioze me amendamente, ose të hartohet një i ri në të cilin shërbimi do të jetë pjesë e pushtetit gjyqësor. Hristina Pallçevska, e cila ishte edhe anëtare e grupit punues, u distancua nga zgjidhja ligjore, sepse, siç tha, ai nuk është aspak i njëjti me atë për të cilin ata kanë punuar.

“Propozim-ligji që sot po e diskutojmë nuk është reformues, nuk e përmirëson pozitën e shërbimit gjyqësor dhe ajo që është më e rëndësishme është se është i pazbatueshëm. Një zgjidhje e tillë ligjore është një zgjidhje e pafat ligjore, pse, sepse dispozitat e Ligjit për nëpunësit administrativë në gjykata janë të pazbatueshme”, tha Hristina Pallçevska.

Përfaqësuesit e shërbimit gjyqësor thonë se ky propozim-ligj është shumë më i pafavorshëm se ai i mëparshmi dhe se nuk është aspak reformues. Ata konsiderojnë gjithashtu se keq është rregulluar përllogaritja e pagave në lidhje me koeficientët, si dhe fakti që nuk njihet specifika e shërbimit gjyqësor dhe puna e nëpunësve gjyqësorë.

“Për fat të keq, në vend që sot të diskutojmë për amendamente dhe ta përmirësojmë ligjin, ne energjinë tonë po e shpenzojmë në tre faktorë të rëndësishëm. Kjo është që të gjithë të jemi shërbim gjyqësor, të kemi me dinjitet pagë mesatare sipas koeficientit sepse jemi një nga tre pushtetet në shtet dhe të kemi shtesat që i meritojmë”, tha Dijana Georgievska, Gjykata Themelore – Shkup

“Për dy orë e 7 minuta të mos dëgjohet asnjë lavdërim, asnjë koment pozitiv për këto ligje të propozuara, kjo vetvetiu duhet të përbëjë alarm se propozimet e ligjeve tuaja janë mbrapsht, tha
Fatime Fetai, Prokurore Publike.

Në mbrojtje të tekstit ligjor u paraqit Katerina Gicheva nga Ministria e Drejtësisë, sipas së cilës kjo zgjidhje siguron autonomi të shërbimit dhe bën ndarje të qartë të nëpunësve gjyqësorë nga nëpunësit administrativë.

“Në këtë propozim-ligj për herë të parë vendoset rregullim tërësisht sistemor i të drejtave dhe detyrimeve dhe zhvillimit të karrierës së të punësuarve në shërbimin gjyqësor. Në ligjin ekzistues thuhet se nëpunësit gjyqësorë kanë status të nëpunësve administrativë”, deklaroi Katerina Gicheva, Ministria e Drejtësisë

Përveç shërbimit gjyqësor, në dëgjim publik duhet të gjendet edhe propozim-ligji për shërbimin e prokurorisë publike, të cilët të dy janë pjesë e agjendës reformuese.

Banka Popullore, në përpjekje për të frenuar inflacionin, po e shtrëngon politikën monetare. E rriti normën bazë të interesit për 0,25 pikë përqindje dhe ajo tani është 4,25%. Kjo është sinjal për bankat që edhe ato t’i rrisin interesat. Guvernatori Sllavski siguron se efektet nuk do të ndihen menjëherë, ndërsa vendimi se sa do të rriten interesat e kredive dhe depozitave është në duart e bankave komerciale

“Që nga fillimi i vitit u vërejt kërkesë më e madhe për deviza nga sektori korporativ, gjë që kushtëzoi prani më të madhe të Bankës Popullore në tregun devizor. Që nga fillimi i majit vërehet stabilizim i kërkesës për deviza, ndërsa informacionet më të reja sjellin më shumë siguri për një qetësim të shpejtë të konfliktit në Lindjen e Mesme. Megjithatë, pasojat ekonomike nga ngjarjet gjeopolitike janë të pranishme, ndërsa pasiguria rreth ritmit të stabilizimit të plotë të flukseve vazhdon të krijojë rreziqe”, tha Sllaveski.

Ai tha se, edhe pse pritjet e konsumatorëve për rritjen e çmimeve në periudhën e ardhshme janë më të moderuara krahasuar me muajin e kaluar, rreziqet për inflacionin kryesisht janë në drejtim rritës. “Më mirë norma më të larta të interesit, sesa rritje e inflacionit” – theksoi Slavski.

Se paratë do të shtrenjtohen dhe bankat do ta ndjekin sinjalin e Bankës Popullore për rritjen e interesave dhe qetësimin e kërkesës për kredi, ditë më parë e tha edhe profesori universitar Vlladimir Filipovski në emisionin Biznis 21.

“Kjo do të nënkuptojë norma më të larta të interesit, sepse nëse, për shembull, norma referente e bankës qendrore rritet, bankat do ta ndjekin atë, sigurisht jo një për një pikë përqindje, por do t’i ndjekin ato sinjale. Sepse kjo është në fakt sinjali që e dërgon banka qendrore”, tha Filipovski.

Ndërkohë, ky hap i Bankës Popullore vjen pas vendimit të Bankës Qendrore Evropiane për të rritur normën referente të interesit për herë të parë pas vitit 2023. Pas debatit publik me ministren e Financave Koçovska për atë nëse dhe kush mund të ndikojë në komisionet bankare, pasi disa banka njoftuan se do t’i rrisin, Sllavski mbetet në qëndrimin se nuk është koha për rritjen e tyre, sepse të ardhurat e bankave kanë qenë të qëndrueshme. Ai njoftoi se po diskutohet një zgjidhje ligjore e mundshme me të cilën disa shërbime bankare do të jenë falas, sipas shembullit të Kroacisë.

Një kompani tjetër për prodhimin e kabllove instaluese të automjeteve po vjen në Maqedoni. Investitori turk “Cavo Otomotiv” nga fundi shtatorit pritet të nis prodhimin në fabrikën që pritet të ndërtohet në Zonën industriale të Tetovës. Ministri i Ekonomisë Durmishi tha se kompania e pjesëve automobilistike, me investimin prej 20 milionë eurove, do të hap rreth 500 vende të reja të punës për rajonin e Pollogut.

“Ky model tregon që bashkëpunimi ndërmjet shtetit dhe sektorit privat mund të krijojë kushte për realizimin e investimeve të mëdha që ndikojnë direkt në zhvillimin ekonomik lokal dhe nacional. Kompania ‘Cavo Otomotiv’ është e njohur ndërkombëtarisht me përvojë shumë vjeçare në industrinë e automobilave dhe kapaciteteve prodhuese në disa vende të rajonit. Vendimi saj për të transformuar një pjesë të prodhimit nga Turqia dhe Sllovakia në vendin tonë është sinjal besimi në ekonominë tonë”, tha Durmishi.

Për dallim nga ministri që tha 500 vende të reja, drejtori i Zonave Zhvillimore Teknologjike-Industriale Goce Dimovski, tha se do të ketë 400 punësime të reja. Ndërsa eksporti i prodhimtarisë do të kalojë dyfishin e investimit fillestarë. Ai tha se bëhet fjalë për sektorin e prodhimit të kabllove të automjeteve.

“Bëhet fjalë për prodhim të teknologjisë së lartë të kabllove automobilistike, të bazuara procese dhe teknologji të automatizuara moderne, të cilat ngritin edhe nivelin prodhues në shtetin tonë ashtu edhe zhvillimin e kuadrit të kualifikuar për njohuri të reja. ‘Cavo Otomotiv’ planifikon cikël serioz investimesh në Maqedoni, sipas biznis planit shuma e investimit do të arrijë në 20 milionë euro me punësimin e më shumë se 400 personave. Plani i kompanisë e këtë projekt investues është që të krijoj eksport vjetor prej 45 milionë eurove në vit”, tha Goce Dimovski.

Autoritetet thanë se kjo kompani do të merr ndihmën e shtetit si investitor i huaj për lehtësirat fiskale, të kontributeve të punëtorëve për një periudhë të caktuar dhe shfrytëzimin e tokës në zonë industriale.

Kujtojmë, që disa vite më parë një kompani e huaj automobilistike “E-GO” dështoi në investimin për prodhimin e veturave elektrike, pikërisht në Zonën Industriale të Tetovës, por autoritetet thonë se ajo është e kaluar dhe se ky investimi i ri veç se është i garantuar me firmosjen e marrëveshjes dypalëshe.

Presidentja e Bullgarisë, Ilijana Jotova, e dënoi djegien e dy automjeteve diplomatike para Ambasadës së Bullgarisë në Shkup, duke e vlerësuar atë si një incident të paprecedentë. Ajo tha se e përjeton incidentin si një sulm ndaj Bullgarisë.

“Incident i paprecedentë. Djegia e automjeteve diplomatike është sulm ndaj shtetit bullgar, unë personalisht e shoh si sulm ndaj Bullgarisë”, tha Ilijana Jotova.

Kjo deklaratë e presidentes bullgare vjen pasi autoritetet në Maqedoni, Qeveria dhe Ministria e Jashtme ashpër e dënuan aktin vandal, ndërsa që dje kryerësi u arrestua.

E sot, edhe Ministri i Punëve të Brendshme, Pançe Toshkovski, e dënoi ashpër incidentin, duke theksuar se dhuna nuk do të lejohet dhe as tolerohet.

“Personi i cili dyshohet për djegien e automjetit është identifikuar shumë shpejt dhe është siguruar nga MPB, në bashkëpunim me Agjencinë për Siguri Kombëtare, edhe ata ishin të kyçur në dhënien e informacioneve kyçe për këtë vepër penale. Me aq sa unë kam informacione nga kryeshefi i SPB-Shkup, konsideroj se prokurori këtë do ta procedojë me procedurë të përshpejtuar, andaj gjatë ditës do të ketë komunikatë nga Prokuroria dhe Gjykata për hapat e mëtejmë”, tha Pançe Toshkovski.

Lidhur me motivet e incidentit, ministri tha se në këtë moment nuk mund të ndajë më shumë informacione, por shtoi se procedura është në zhvillim e sipër dhe po zhvillohet sipas procedurave ligjore.