Moti sot në Maqedoninë e Veriut do të jetë i ndryshueshëm me vranësira dhe i ngrohtë me periudha me diell. Pasdite do të ketë jostabilitet lokal me shira të rrëmbyeshëm, bubullima dhe erëra të forta.
Temperatura minimale do të jetë në intervalin 10 deri në 17 gradë, ndërsa maksimale do të arrijë 25 deri në 31 gradë Celsius.
Në Shkup do të jetë me vranësira dhe i ngrohtë me periudha me diell.
Zëvendëspresidenti i SHBA-së, JD Vance, ka thënë se “asnjë qindarkë e parave amerikane” nuk do të shkojë në Iran si pjesë e marrëveshjes së paqes me SHBA-në.
Duke folur për Fox News, Vance e ka krahasuar administratën Trump me ish-poresidentin e SHBA-së Barack Obama, i cili sipas Vance i ka dhënë Iranit “mbi 1 miliard dollarë në një paletë parash”.
Kur është pyetur nëse do të shkonin 300 miliardë dollarë në riatdhesime që vinin nga Katari dhe “24 miliardë dollarë në asete të pangrira”, Vance ka thënë se kjo është “në thelb propagandë iraniane”.
“Ajo që po ndodh është se disa elementë në shoqërinë e tyre po përpiqen ta shesin këtë marrëveshje sa më pozitivisht të jetë e mundur për audiencën e tyre vendase”, ka thënë Vance.
“Asnjë qindarkë e parave amerikane nuk shkon në Iran, as 300 miliardë dollarë, as 24 miliardë dollarë, asnjë nga paratë”, ka shtuar ai.
Megjithatë, mund të ketë “përfitime për Iranin nëse ata kryejnë pjesën e tyre të detyrimit”, sipas Vance, duke shtuar se Katari, Emiratet e Bashkuara Arabe ose Arabia Saudite mund të zgjedhin të investojnë në Iran
Zvicra njoftoi se ceremonia e nënshkrimin e marrëveshjes mes Shteteve të Bashkuara dhe Iranit, që synon dhënien fund të konfliktit në Lindjen e Mesme, do të mbahet në resortin malor të Burgenstokut.
Ministria e Jashtme zvicerane tha se ka qenë në kontakt të ngushtë me SHBA-në, Iranin, Pakistanin dhe Katarin lidhur me mundësinë e nënshkrimit të memorandumit të mirëkuptimit ndërmjet Uashingtonit dhe Teheranit.
“Aktualisht, nënshkrimi i dokumentit është planifikuar për të premten, më 19 qershor, në Burgenstok, që ndodhet në kantonin e Nidvaldenit. Ky lokacion është propozuar nga ndërmjetësuesit pakistanezë dhe ata nga Katari, si dhe nga Shtetet e Bashkuara dhe Irani”, u tha në njoftim.
Burgenstoku është një kompleks i njohur rezidencial dhe për konferenca në Zvicrën qendrore, i cili më parë ka qenë mikpritës i takimeve ndërkombëtare dhe negociatave diplomatike.
Irani dhe Shtetet e Bashkuara e nënshkruan në mënyrë elektronike më 15 qershor memorandumin e mirëkuptimit për t’i dhënë fund luftës, i hartuar në formën e një dokumenti të përgjithshëm.
Nënshkrimi zyrtar i dokumentit është planifikuar të bëhet më 19 qershor, në praninë e zyrtarëve të lartë të të dyja vendeve.
Ndaras, më 16 qershor, udhëheqësi amerikan Donald Trump, tha se do ta dërgojë marrëveshjen e paqes me Iranin në Kongresin amerikan për shqyrtim.
Duke folur për gazetarët gjatë një takimi me presidentin e Emirateve të Bashkuara Arabe, Mohammed bin Zayed Al Nahyan, në margjinat e samitit të G7 në Francë, Trump tha: “Nuk e kam menduar më parë, por do ta bëj… do t’ia dërgoj Kongresit. Më pëlqen ideja. Kush nuk do ta miratonte?”.
Disa ligjvënës republikanë më herët kishin bërë thirrje që kongresitët të shqyrtonin tekstin e marrëveshjes.
Trump po ashtu premtoi se do ta bëjë publik tekstin e marrëveshjes me Iranin “brenda një ose dy ditësh” dhe sugjeroi se madje mund ta lexojë të gjithë dokumentin publikisht, sapo të vendoset një kornizë zyrtare për publikimin e tij.
Sipas Reuters, ai tha se po priste një procedurë zyrtare para publikimit, por shtoi se nuk kishte kundërshtim që ai të bëhej publik.
“Do të doja të kishte më parë një kornizë zyrtare për këtë, por nuk kam problem me publikimin, është një dokument i shkëlqyer”, tha Trump.
Ai shtoi se dispozita kryesore e marrëveshjes është e thjeshtë: “Irani nuk do të ketë kurrë armë bërthamore”.
Sa i përket fazës së ardhshme të negociatave me Iranin, për të cilën është vendosur një afat 60-ditor, Trump shprehu optimizëm se përparimi do të jetë i shpejtë.
“Mendoj se do të shkojë shumë shpejt”, tha ai duke shtuar se Irani dëshiron ta finalizojë procesin dhe të kthehet në aktivitet normal ekonomik dhe diplomatik.
“Irani dëshiron ta përfundojë këtë. Ata duhet t’u kthehen aktiviteteve të tyre normale dhe marrëdhëniet tani janë normalizuar, kështu që mendoj se ky proces do të ecë shumë shpejt”.
Trump paralajmëroi se afati kohor mund të ndryshojë, por përsëriti pritjet e tij për një përfundim të shpejtë: “Mund të shkojë më shpejt, mund të zgjasë më shumë, por mund të përfundojë shumë shpejt”.
Nënpresidenti amerikan, JD Vance, ka deklaruar më herët se dokumenti – që palët nënshkruan në mënyrë elektronike – është rreth një faqe e gjysmë i gjatë.
Lufta nisi pasi SHBA-ja dhe Izraeli kryen sulme ajrore ndaj Iranit në fund të shkurtit. Teherani u kundërpërgjigj me sulme ndaj aseteve amerikane në rajon dhe që nga nisja e konfliktit praktikisht ka mbyllur Ngushticën e Hormuzit.
Marrëveshja parasheh edhe rihapjen e ngushticës përmes së cilës kalon një e pesta e dërgesave globale të naftës dhe gazit./REL
Në Pallatin e Kulturës në Tetovë u mbajt Kuvendi themelues i VLEN-it, ku drejtuesit e partisë vlerësuan se ky është një hap i rëndësishëm në procesin e bashkimit dhe konsolidimit të subjektit politik, transmeton TV21. Nga Kuvendi u dërgua mesazhi se VLEN hyn në një fazë të re të funksionimit me organizim më të fuqishëm dhe angazhim të shtuar për t’iu përgjigjur nevojave të qytetarëve në nivel qendror dhe lokal.
Bashkëkryetarët Kasami dhe Mexhiti theksuan se VLEN hyn në një fazë të re të organizimit politik.
“Sot po ndërmarrim një tjetër hap të rëndësishëm në rrugëtimin historik për bashkimin dhe konsolidimin e VLEN-it”, tha Kasami.
“Ky Kuvend themelues paraqet hapin e radhës drejt konsolidimit dhe fuqizimit të VLEN-it si subjekt politik i shqiptarëve”, deklaroi Mexhiti.
Nga një simbol i luksit në bregdetin shqiptar, në një pasuri të vendosur nën sekuestro nga SPAK. Hoteli “Zig Zag” në Jalë, një prej strukturave më luksoze të rivierës me 5 yje dhe rreth 200 dhoma akomodimi, ka përfunduar në listën e pasurive të sekuestruara pas megaoperacionit kundër një grupi kriminal të dyshuar për trafik ndërkombëtar droge dhe pastrim parash.
Sipas hetimeve të Prokurorisë së Posaçme, miliona euro të dyshuara me origjinë kriminale janë investuar ndër vite në pasuri të paluajtshme, komplekse turistike, hotele, vila dhe ndërtime luksoze, duke krijuar një rrjet të gjerë investimesh në disa nga zonat më të lakmuara të Shqipërisë.
Në total janë sekuestruar 491 pasuri me një vlerë të përllogaritur rreth 150 milionë euro. Mes tyre ndodhen hotele dhe vila në vijën bregdetare, por edhe prona në Tiranë, Durrës, Elbasan, Lezhë, Shkodër, Dhërmi dhe Sarandë.
Sipas SPAK, grupi kriminal dyshohet se drejtohej nga Dritan Gjika dhe Eldi Dizdari, ndërsa një rol kyç në skemën e dyshuar të pastrimit të parave e kishte Isa Aliu.
Në kuadër të operacionit, Gjykata ka caktuar masën e sigurisë “arrest në burg” edhe për Nikoll Bibajn, Sokol Bibajn, Armando Pacanin, Naldi Yzeirajn, Oklid Aliun dhe Shpëtim Aliun.
Aksioni i SPAK konsiderohet si një nga goditjet më të mëdha ndaj pasurive të dyshuara se janë krijuar apo financuar me para që burojnë nga aktiviteti kriminal, duke nxjerrë në pah se si kapitalet e dyshuara të krimit kanë depërtuar deri në zemër të biznesit të luksit dhe turizmit shqiptar./JOQ
Institucionet publike po intensifikojnë përpjekjet për parandalimin e dhunës tek të rinjtë përmes një bashkëpunimi më të ngushtë ndërinstitucional. Pesë ministri, së bashku me organizata dhe partnerë të tjerë, nënshkruan një deklaratë të përbashkët me fokus në krijimin e shkollave më të sigurta, promovimin e komunikimit jo të dhunshëm, forcimin e sigurisë digjitale dhe mbështetjen e shëndetit mendor të të rinjve. Autoritetet arsimore vlerësojnë se, megjithëse dhuna nuk mund të eliminohet plotësisht, ajo mund të zvogëlohet ndjeshëm përmes masave të koordinuara dhe ndryshimeve ligjore që forcojnë mbrojtjen dhe mirëqenien e nxënësve.
“Kemi bërë ndryshime ligjore që i detyrojnë shkollat të planifikojnë aktivitete për të promovuar mirëqenien e nxënësve, mbrojtjen nga dhuna dhe diskriminimi, si dhe për të përmirësuar komunikimin dhe respektin e ndërsjellë. Kemi forcuar shërbimet profesionale dhe kemi rivendosur detyrat e gatishmërisë së mësuesve gjatë festave”, deklaroi Vesna Janevska – ministre e Arsimit dhe Shkencës.
Sipas Ministrit për punë dhe politik sociale Fatmir Limani qëllimi i institucioneve është parandalimi i dhunës tek të rinjtë përmes forcimit të besimit mes nxënësve, promovimit të komunikimit pa dhunë, rritjes së sigurisë digjitale dhe mbështetjes së shëndetit mendor, me synim krijimin e një mjedisi të sigurt dhe respektues për çdo të ri.
“Qëllimi ynë është të veprojmë në mënyrë parandaluese, përmes forcimit të besimit mes nxënësve, promovimit të komunikimit pa dhunë, sigurisë digjitale, mbrojtjes dhe shëndetit mendor, si dhe krijimit të një mjedisi ku çdo i ri do të ndihet i sigurt dhe i respektuar”, potencoi Fatmir Limani – ministër për Politikë Sociale, Demografi dhe Rini.
Kujtojmë se, rastet e fundit të dhunës mes të rinjve dhe nxënësve në shkollat e vendit kanë ngritur shqetësime serioze për sigurinë e fëmijëve. Në mesin e incidenteve më të rënda janë keqtrajtimi i një 13-vjeçareje në Gjorçe Petrov nga bashkëmoshataret e saj, kërcënimet ndaj nxënësve përmes rrjeteve sociale në Manastir dhe plagosja me thikë e një nxënësi në Hasanbeg të Shkupit. Këto raste kanë nxitur reagimin e institucioneve dhe kanë theksuar nevojën për masa më të forta për parandalimin e dhunës mes të rinjve.
Në Pallatin e Kulturës në Tetovë po mblidhen nënshkrimet për themelimin formal të VLEN-it, duke shënuar nisjen zyrtare të subjektit si parti politike në përputhje me ligjet e Maqedonisë së Veriut, transmeton TV21. Bashkëkryetari Bilall Kasami tha se pas përmbylljes së këtij procesi do të fillojë organizimi i strukturave në degë e nëndegë, me synim adresimin e problemeve të qytetarëve dhe zbatimin e programit politik.
“Sot në Pallatin e Kulturës në Tetovë është organizuar grumbullimi i nënshkrimeve për themelimin formal të VLEN-it me çka po nis edhe zyrtarisht rrugëtimi i subjektit VLEN si parti politike konform ligjeve të Maqedonisë së Veriut. Janë të thirrur të gjithë aktivistët tanë nga Struga deri në Kumanovë që të japin nënshkrimin e tyre, dhe unë besoj që sot ky proces do të përmbyllet me sukses. Nga sot do të nisë aktiviteti jonë në teren për vizitë të strukturave të VLEN-it me çka do të nisë edhe ngritje e strukturave në nivel të degëve dhe nëndegëve dhe do të jemi gati për t’ju përgjigjur qytetarëve në problemet të cilat i kanë dhe realizimin e programit”, tha bashkëkryetari i VLEN-it Bilall Kasami.
Të martën, Zëdhënësi i Ministrisë së Jashtme të Kinës Lin Jian mbajti një konferencë të rregullt për shtyp. Një gazetar pyeti në lidhje me memorandumin e mirëkuptimit të fazës së parë, të arritur midis Iranit dhe Shteteve të Bashkuara, si dhe çështjen e rihapjes së Ngushticës së Hormuzit.
Lin Jian deklaroi se Kina ka vënë re memorandumin e mirëkuptimit të fazës së parë, të arritur midis Iranit dhe Shteteve të Bashkuara, i cili përfshin dispozita për rihapjen e ngushticës. Ngushtica e Hormuzit është një kalim i përdorur për lundrim ndërkombëtar ndaj rivendosja e hershme e sigurt dhe e lirë nëpër ngushticë, është në interes të të gjitha palëve.
Kina është e gatshme të mbajë komunikim me vendet përkatëse dhe me bashkësinë ndërkombëtare për këtë çështje. Kina do të vazhdojë të mbrojë sigurinë e anijeve në pronësi kineze, si dhe anëtarëve të ekuipazhit kinez.
Presidenti amerikan, Donald Trump, ka këmbëngulur se Ngushtica e Hormuzit do të hapet “pa pagesë”, sipas marrëveshjes së SHBA-së me Iranin për t’i dhënë fund luftës.
Duke folur të martën në samitin e G7-s në Francë, presidenti amerikan ka thënë gjithashtu se Irani “nuk do të ketë kurrë armë bërthamore”, teksa ka kritikuar Izraelin për Libanin.
Komentet e Trumpit, ndër më të zëshmet e tij deri më tani, tregojnë shkallën e “përplasjes” së tij me kryeministrin izraelit, Benjamin Netanyahu, shkruan BBC.
Pakistani, një ndërmjetës kyç, ka njoftuar të dielën se SHBA-ja dhe Irani kishin arritur një marrëveshje, por përmbajtja e saj ende nuk është ndarë.
Të hënën, zyrtarët e administratës Trump kanë thënë se marrëveshja ishte nënshkruar tashmë elektronikisht nga të dyja palët, ndërkohë që një ceremoni zyrtare do të zhvillohet në Zvicër më vonë këtë javë.
Ndërkohë, çmimi i naftës po vazhdon të bjerë pas njoftimit për marrëveshjen. Një fuçi nafte e papërpunuar Brent, që është standardi ndërkombëtar, ka rënë nën 80 dollarë për herë të parë që nga fillimi i marsit.
Reagime dhe vërejtje të shumta për propozim-ligjin për shërbimin gjyqësor u paraqitën në dëgjimin publik për këtë ligj në Komisionin për sistem politik dhe marrëdhënie ndërmjet komuniteteve. Përfaqësues nga shërbimet dhe sindikatat kërkuan që ai të tërhiqet nga procedura ose të bëhet ndërhyrje serioze me amendamente, ose të hartohet një i ri në të cilin shërbimi do të jetë pjesë e pushtetit gjyqësor. Hristina Pallçevska, e cila ishte edhe anëtare e grupit punues, u distancua nga zgjidhja ligjore, sepse, siç tha, ai nuk është aspak i njëjti me atë për të cilin ata kanë punuar.
“Propozim-ligji që sot po e diskutojmë nuk është reformues, nuk e përmirëson pozitën e shërbimit gjyqësor dhe ajo që është më e rëndësishme është se është i pazbatueshëm. Një zgjidhje e tillë ligjore është një zgjidhje e pafat ligjore, pse, sepse dispozitat e Ligjit për nëpunësit administrativë në gjykata janë të pazbatueshme”, tha Hristina Pallçevska.
Përfaqësuesit e shërbimit gjyqësor thonë se ky propozim-ligj është shumë më i pafavorshëm se ai i mëparshmi dhe se nuk është aspak reformues. Ata konsiderojnë gjithashtu se keq është rregulluar përllogaritja e pagave në lidhje me koeficientët, si dhe fakti që nuk njihet specifika e shërbimit gjyqësor dhe puna e nëpunësve gjyqësorë.
“Për fat të keq, në vend që sot të diskutojmë për amendamente dhe ta përmirësojmë ligjin, ne energjinë tonë po e shpenzojmë në tre faktorë të rëndësishëm. Kjo është që të gjithë të jemi shërbim gjyqësor, të kemi me dinjitet pagë mesatare sipas koeficientit sepse jemi një nga tre pushtetet në shtet dhe të kemi shtesat që i meritojmë”, tha Dijana Georgievska, Gjykata Themelore – Shkup
“Për dy orë e 7 minuta të mos dëgjohet asnjë lavdërim, asnjë koment pozitiv për këto ligje të propozuara, kjo vetvetiu duhet të përbëjë alarm se propozimet e ligjeve tuaja janë mbrapsht, tha
Fatime Fetai, Prokurore Publike.
Në mbrojtje të tekstit ligjor u paraqit Katerina Gicheva nga Ministria e Drejtësisë, sipas së cilës kjo zgjidhje siguron autonomi të shërbimit dhe bën ndarje të qartë të nëpunësve gjyqësorë nga nëpunësit administrativë.
“Në këtë propozim-ligj për herë të parë vendoset rregullim tërësisht sistemor i të drejtave dhe detyrimeve dhe zhvillimit të karrierës së të punësuarve në shërbimin gjyqësor. Në ligjin ekzistues thuhet se nëpunësit gjyqësorë kanë status të nëpunësve administrativë”, deklaroi Katerina Gicheva, Ministria e Drejtësisë
Përveç shërbimit gjyqësor, në dëgjim publik duhet të gjendet edhe propozim-ligji për shërbimin e prokurorisë publike, të cilët të dy janë pjesë e agjendës reformuese.
