I dërguari i presidentit amerikan Donald Trump për misione të posaçme, Richard Grenell, ka reaguar ashpër pas vendimit të Dhomave të Specializuara të Kosovës në Hagë ndaj ish-presidentit të Kosovës, Hashim Thaçi.

Në një postim, Grenell e cilësoi dënimin e Thaçit si “skandaloz” dhe kritikoi ashpër funksionimin e Gjykatës Speciale, duke argumentuar se vendimet e saj janë të motivuara politikisht.

“Dënimi i shpallur nga Gjykata e Hagës ndaj Hashim Thaçit për një luftë të zhvilluar 25 vjet më parë është skandaloz”, shkroi Grenell.

Ai kritikoi gjithashtu gjyqtarët dhe prokurorinë e çështjes, ndërsa përmendi edhe gjyqtarin zviceran Guénaël Mettraux, të cilin e akuzoi se ka ndikuar në proces përmes konsideratave politike.

Grenell kërkoi që gjykatave ndërkombëtare t’u ndërpritet financimi dhe bëri thirrje që Departamenti amerikan i Drejtësisë dhe Prokurori i Përgjithshëm i SHBA-së, Todd Blanche, të ndërmarrin veprime.

“Amerikanët po paguajnë për këto ndjekje penale politike dhe kjo duhet të marrë fund”, deklaroi ai.

Në reagimin e tij, Grenell iu drejtua edhe institucioneve të Kosovës, duke kërkuar nga kryeministri Albin Kurti dhe deputetët e Kuvendit që të veprojnë për shpërbërjen e Gjykatës Speciale.

“Albin Kurti duhet gjithashtu të veprojë shpejt për ta shpërbërë këtë gjykatë të huaj. Deputetët duhet të punojnë me Kurtin që kjo të ndodhë. Kosovës nuk i duhet një gjykatë në Holandë”, përfundoi Grenell.

Reagimi i plotë:

Dënimi i shpallur nga Gjykata e Hagës ndaj Hashim Thaçit për një luftë të zhvilluar 25 vjet më parë është skandaloz. Askush nuk është i sigurt nga këto gjykata ndërkombëtare, ku elitat akademike marrin vendime politike. Këta tre gjyqtarë dhe prokurori amerikan janë të çmendur të së majtës. Ata qartazi nuk i dëgjuan këshilltarët e Bill Clintonit, të cilët e bënë të qartë se Thaçi nuk e drejtonte luftën.

Gjyqtari zviceran Guenael Mettraux ishte udhëheqësi i vërtetë, duke injoruar çështjet ligjore dhe duke zgjedhur politikën e Jack Smith.

Të gjitha këto gjykata duhet t’u ndërpritet menjëherë financimi. Departamenti i Drejtësisë dhe Prokurori i Përgjithshëm Todd Blanche duhet të veprojnë shpejt. Amerikanët po paguajnë për këto ndjekje penale politike dhe kjo duhet të marrë fund.

Albin Kurti duhet gjithashtu të veprojë shpejt për ta shpërbërë këtë gjykatë të huaj. Deputetët duhet të punojnë me Kurtin që kjo të ndodhë. Kosovës nuk i duhet një gjykatë në Holandë.

Të paktën 21 persona kanë vdekur, përfshirë tetë fëmijë, ndërsa dhjetëra të tjerë rezultojnë të zhdukur, pasi një ndërtesë e dëmtuar nga lufta është shembur gjatë natës në Rripin e Gazës, kanë bërë të ditur ekipet lokale të shpëtimit dhe mjekët.

Dëshmitarët i kanë thënë BBC-së se ndërtesa gjashtëkatëshe në zonën Tal al-Haëa të qytetit të Gazës kishte mbetur e anuar në mënyrë të rrezikshme në njërën anë, pas një sulmi izraelit më shumë se një vit më parë. Ata kanë thënë se brenda saj po jetonin familje të zhvendosura, sepse nuk kishin zgjidhje tjetër.

Agjencitë e OKB-së dhe një ekip egjiptian i janë bashkuar kërkimit për të mbijetuar, por zyrtarët thonë se operacioni po zhvillohet ngadalë për shkak të mungesës së pajisjeve.

Në përpjekjet fillestare të shpëtimit, pjesëtarët e agjencisë së Mbrojtjes Civile, e drejtuar nga Hamasi, u detyruan të përdornin duart e tyre.

“Ende po dëgjojmë zëra nën rrënoja, kështu që ka ende shpresë për të gjetur njerëz”, ka thënë Raed al-Dahshan, drejtori i Mbrojtjes Civile në qytetin e Gazës.

“Mundësitë e kufizuara për strehim i detyruan banorët të zhvendoseshin në këtë ndërtesë, duke besuar se ishte e sigurt. Megjithatë, në një moment ajo u shemb plotësisht, duke rënë tragjikisht mbi njerëzit teksa flinin”, ka shtuar ai.

Banorët kanë thënë se rreth 10 familje kishin jetuar në ndërtesë, pavarësisht paralajmërimeve se ajo ishte e pasigurt.

Një grua që jetonte në një tendë aty pranë, Umm Mohammed Bakrun, ka thënë se po fliste me djalin e saj kur ndërtesa u shemb papritur në orët e para të së mërkurës.

“U ndje si një tërmet. Kishte një zhurmë të madhe dhe nuk mund të qëndroja në këmbë. Gurët binin mbi ne dhe kur pashë jashtë, pashë shumë pluhur”, i ka thënë ajo BBC-së. 

Drejtuesi i zyrës së Programit të Kombeve të Bashkuara për Zhvillim (UNDP) në Gazë, Alessandro Mrakiq, u ka thënë gazetarëve në vendngjarje se besohej se nga 70 deri në 100 persona ishin bllokuar nën rrënoja.

“Situata, siç e shihni, është tragjike, sepse nuk kemi pajisjet dhe makineritë e nevojshme. Në fakt, ka njerëz që po gërmojnë me duart e tyre”, ka thënë ai.

Mrakiq ka paralajmëruar gjithashtu se rreth 400 ndërtesa të tjera të dëmtuara nga lufta në të gjithë Gazën rrezikojnë të shemben së shpejti, veçanërisht me afrimin e dimrit.

Ai u ka bërë gjithashtu thirrje autoriteteve izraelite të miratojnë dërgimin në Gazë të makinerive të rënda për operacionet e shpëtimit, si dhe të tendave, mbulesave të papërshkueshme nga uji dhe artikujve të tjerë jo ushqimorë për personat e zhvendosur, përpara reshjeve të dimrit.

Izraeli thotë se kufizimet e tij synojnë të parandalojnë që pajisjet të bien në duart e grupeve të armatosura palestineze, të cilat mund t’i përdorin ato edhe për qëllime ushtarake.