Rusët kapin të riun pasi morën informacionin nga amerikanët për sulme në Moskë

0

Një i mitur rus është ndaluar sot për shkak të kërcënimit për kryerjen e një sulmi terrorist në një park të Moskës.

Shërbimi Federal i Sigurisë (FSB) i Rusisë kishte marrë dje informacione nga SHBA-ja lidhur me përgatitjen e një sulmi në kompleksin Tsaritsyno, i cili u mbyll përkohësisht.

I mituri kishte postuar foto në TikTok, ku shfaqej i veshur me uniformë taktike dhe maskë, duke mbajtur në dorë një objekt që ngjante me një armë automatike.

Ai gjithashtu publikoi foto të shkrepura në Muzeun Historik të Moskës dhe në Parkun Tsaritsyno, me mbishkrimin: “E gjeta vendin”.

Gjatë kontrollit në banesën e tij, autoritetet gjetën veshje dhe pajisje që përputheshin me ato të shfaqura në postimet në rrjetet sociale. Në telefonin e tij u gjet një abonim në një kanal neonazist në aplikacionin Telegram, si dhe “një numër i konsiderueshëm kërkimesh në lidhje me sulme terroriste, vrasje masive dhe akte të tjera dhune”.

Komiteti Hetimor i Rusisë po shqyrton hapat ligjorë që duhen ndërmarrë, njoftoi FSB-ja.

Bërvenicë, deri në orën 18:30 kanë votuar 53% e qytetarëve

0

Deri në orën 18:30, në zgjedhjet për kryetar të Komunës së Bërvenicës kanë votuar 8.595 qytetarë, apo 53% e votuesve.

Në krahasim me raundin e parë, pjesëmarrja është më e lartë. Në të njëjtën kohë, në raundin e parë kishin votuar 7.241 qytetarë, apo 44%.

Më shumë votues në raundin e dytë, 7.902 qytetarë votuan në Bërvenicë deri në orën 17:00

0

Në rrethin e dytë të zgjedhjeve për kryetar të Komunës së Bërvenicës, deri në orën 17:00 kanë votuar 7.902 qytetarë ose 48.64% e votuesve të regjistruar, tregojnë të dhënat e Komisionit Shtetëror të Zgjedhjeve (KSHZ), përcjell TV21. Me këtë, është tejkaluar pjesëmarrja e përgjithshme në raundin e parë, kur votuan 7.572 qytetarë ose 46.58%.

Deri në orën 17:00, në raundin e dytë kanë votuar 330 qytetarë më shumë sesa në të gjithë raundin e parë, ndërsa dalja në votime është rritur për 2.06 pikë përqindjeje. Votimi do të zgjasë deri në orën 19:00.

Mund të tërheqin vetëm 10.000 denarë në javë! Sllaveski: Qytetarët deri dje kanë tërhequr 2 milionë euro nga “Alta Banka”!

0

Në konferencën e sotme të jashtëzakonshme për shtyp, guvernatorit Trajko Sllaveski foli lidhur me funksionimin e Alta Bankës në Maqedoni, përcjell TV21. Ai tha se deri dje, qytetarët kanë tërhequr rreth 2 milionë euro nga kjo bankë.

“Ata na informuan se deri në mabrimin e ditës së djeshme, në para të gatshme dhe transfere të tjera janë tërhequr rreth 2 milionë euro nga banka. Siç e dinë qytetarët, VISA qendra, për shkak të shumës, suspendoi përkohësisht punën me kartelat, ky shërbim u mundësua, u rivitalizua sot në ora 12 në mesditë”, tha mes tjerash Sllaveski.

Sllaveski njoftoi se qytetarët që kanë llogari në “Alta Banka” SHA Manastir, në periudhën e ardhshme do të mund të përdorin maksimumi 10.000 denarë në javë nga mjetet e tyre, përmes kartelave të pagesës të lëshuara nga banka, kjo vjen si masë e përkohshme.

“Me interes të qytetarëve dhe me qëllim të kryerjes së pagesave të përditshme, është përcaktuar një limit javor për tërheqjen e mjeteve nga llogaritë e personave fizikë, në vlerë prej 10.000 denarësh, i cili mund të shfrytëzohet përmes kartelave të lëshuara nga banka”, theksoi Sllaveski.

Vendimi vjen pas informacioneve për heqjen e licencës së punës “Alta Bankës” SHA Beograd dhe plotësimit të kushteve për nisjen e procedurës së falimentimit në Serbi.

Sllaveski bëri të ditur se Bordi Ekzekutiv i Bankës Popullore, në mbledhjen e mbajtur më 1 nëntor 2026, ka miratuar vendimin për vendosjen e administrimit të përkohshëm në “Alta Banka” SHA Manastir, i cili tashmë ka hyrë në fuqi.

Me këtë vendim, administrimi i pasurisë së bankës përkohësisht kalon në kompetencë të personave të emëruar nga Banka Popullore, të cilët do të veprojnë në kuadër të autorizimeve të dhëna. Ai nënvizoi se të gjitha pagesat e brendshme ndërmjet llogarive të personave fizikë dhe juridikë brenda bankës do të vazhdojnë të kryhen pa kufizim të shumës.

Sipas guvernatorit, “Alta Banka” SHA Manastir ka kapital dhe likuiditet të lartë, cilësi solide të portofolit të kredive dhe i përmbush të gjitha standardet mbikëqyrëse. Nga Banka Popullore sigurojnë se masat janë të karakterit të përkohshëm dhe po vendosen me qëllim të mbrojtjes së pasurisë së bankës dhe interesave të depozituesve. Njëkohësisht, guvernatori rikujtoi se qytetarët dhe kompanitë që kanë kredi në këtë bankë duhet të vazhdojnë t’i përmbushin rregullisht dhe me kohë detyrimet e tyre.

Shkëndija triumfon në Shtip, vazhdon të kryesojë bindshëm në tabelë!

0

Futbollistët e Shkëndijës së Tetovës rikthehen me fitore nga udhëtimi në Shtip, pasi sonte, në kuadër të xhiros së 12-të në Ligën e Parë të Maqedonisë, triumfuan ndaj Bregallnicës vendase me rezultat 2-1, përcjell TV21. Lideri i tabelës kaloi në epërsi që në minutën e 3-të me golin e Ndzengues, por vendasit arritën të barazonin rezultatin në minutën e 39-të përmes Stojkovskit.

Rezultati i barabartë qëndroi deri në minutën e 74-t, kur Gjorgievski, i cili u inkuadrua nga banka rezervë, i siguroi fitoren Shkëndijës me golin e tij të parë në sezonin e ri.

Bregallnica pati një mundësi të artë në minutat shtesë për të barazuar sërish rezultatin dhe për të shmangur humbjen, por Nikolov nuk arriti të realizonte penalltinë në minutën e 94-t.

Në ndeshjen tjetër të zhvilluar sot në kuadër të xhiros së 12-të, Shkëndija e Haraçinës dhe Tikveshi luajtën baras, 1-1.

Nesër zhvillohen tri ndeshjet e mbetura: Shkupi – Sileksi, Bashkimi – Arsimi dhe Vardari – Struga.

Tabela e klasifikimit:

  1. Shkëndija – 27 pikë
  2. Struga – 23 pikë (-1 ndeshje)
  3. Tikveshi – 21 pikë
  4. Vardari – 21 pikë (-1 ndeshje)
  5. Sileksi – 16 pikë (-1 ndeshje)
  6. Shkëndija e Haraçinës – 15 pikë
  7. Bregallnica – 13 pikë
  8. Arsimi – 10 pikë (-1 ndeshje)
  9. Bashkimi – 7 pikë (-1 ndeshje)
  10. Shkupi – 3 pikë (-1 ndeshje)

Dy vrasje gjatë grabitjeve në “Gjorçe Petrov”, 30 ditë paraburgim për katër të dyshuarit

0

Gjykata Penale në Shkup ua ka vazhduar edhe për 30 ditë paraburgimin katër personave të dyshuar për dy vrasjet e kryera gjatë grabitjeve në shtëpi në Gjorçe Petrov. Ata fillimisht ishin dërguar në paraburgim për 48 orë, ndërsa masa u vazhdua me vendim të gjykatës. Prokuroria po vazhdon hetimet dhe mbledhjen e dëshmive për zbardhjen e plotë të rasteve. Të dyshuarit dyshohet se kanë kryer vrasjen e një 62-vjeçari më 22 tetor dhe të një 76-vjeçareje më 27 tetor.

 Sipas mediave, duke iu referuar burimeve nga hetimi, të dyshuarit i kanë pranuar veprat penale. Në njërin rast dyshohet se kanë marrë pjesë dy persona, ndërsa në tjetrin tre. I dyshuari i katërt dyshohet se ka shërbyer si shofer dhe i ka transportuar ata. Gjatë hetimeve, policia ka gjetur gjurmë të ADN-së dhe sende që dyshohet se lidhen me grabitjet.

Një i arrestuar dhe dy të ndaluar pas përleshjes së tifozëve në Shkup, një 16-vjeçar i lënduar rëndë

0

Policia ka zbardhur dhunën e djeshme para Qendrës Sportive “Jane Sandanski” në Shkup, ku tifozë të grupit “Family” sulmuan fizikisht tifozë të KB “Rabotniçki”, të cilët po prisnin të hynin në ndeshjen e basketbollit, përcjell TV21. Sipas njoftimit të Ministrisë së Punëve të Brendshme, rreth 30 anëtarë të grupit “Family” kanë sulmuar afërsisht 50 tifozë të “Rabotniçkit”. Gjatë incidentit, një 16-vjeçar nga Shkupi ka pësuar lëndime të rënda trupore.

Për rastin, SPB Shkup ka ngritur kallëzim penal për veprën penale “Dhunë”, sipas nenit 386, paragrafët 4 dhe 6 të Kodit Penal, kundër personit me inicialet P.A., i cili është privuar nga liria.

“Me udhëzime të prokurorit publik të PTHP Shkup, lidhur me ngjarjen është ngritur kallëzim penal me procedurë të shpejtë”, thuhet në njoftimin e MPB-së.

Ndërkohë, në stacion policor janë ndaluar edhe dy persona të tjerë, M.M. (18) dhe D.P. (18), të dy nga Shkupi.

Nga MPB bëjnë të ditur se po vazhdojnë të thërrasin edhe persona të tjerë që dyshohet se kanë marrë pjesë në dhunë, ndaj të cilëve do të ndërmerren masa përkatëse.

Nafta shtrenjtohet mbi 2%, arrin nivelin më të lartë në 6 muaj

0

Çmimet e naftës u rritën mbi 2% në këtë fundjavë, mes shqetësimeve për furnizimet nga Lindja e Mesme.

Sipas raportimeve ndërkombëtare, kontratat e naftës brent për dhjetor e mbyllën tregtimin më 30 tetor në 117.64 dollarë për fuçi, duke u rritur për 2.76 dollarë, ose 2.4%. Nafta amerikane ËTI arriti në 104.12 dollarë për fuçi, me rritje prej 2.12 dollarësh, ose 2.08%. Të dy treguesit shënuan nivelet më të larta të mbylljes që nga fundi i prillit.

Kontrata e Brent-it për dhjetor skadoi të premten, ndërsa ajo për janar, e cila tregtohej më aktivisht, u mbyll në 113.43 dollarë për fuçi.

Rritja erdhi pas një sulmi ndaj një anijeje cisternë në Ngushticën e Hormuzit dhe frikës për përshkallëzim të konfliktit me Iranin. Ndërkohë, gjatë tetorit, brent u shtrenjtua për 13.6%, ndërsa WTI për 15.2%.

Vakti studentor do të rritet në 4.500 denarë! Për studentët është i pranueshëm modeli që ofron edhe përfitime të tjera

0

Studentët e pranojnë opsionin e propozuar për masën e vaktit të subvencionuar studentor, pasi gjatë ditëve të fundit kanë zhvilluar diskutime të gjera mes tyre në kuadër të organizatave, me qëllim që të harmonizohen rreth modelit të propozuar. Sipas këtij modeli, studentët do të mund të përfitojnë nga 4.500 denarë në muaj, që është rreth 1.000 denarë më shumë në krahasim me shumën e deritanishme. Gjithashtu, parashikohen edhe zbritje të tjera. Një nga elementet kryesore është se, përmes shërbimit të posaçëm digjital „M-vakti studentor“, studentët do të mund t’i shfrytëzojnë mjetet në restorante, markete dhe restorante të specializuara për produkte të qumështit, të cilat do të përfshihen në sistem. Studentët thonë se për ta është i pranueshëm modeli që bazohet në:

MODELI I VAKTIT STUDENTOR:

– Futja në përdorim e një sistemi të ri „M-vakti studentor“.

– Rritja e shumës së përgjithshme mujore nga 3.500 në 4.500 denarë.

– Publikimi i listës së operatorëve dhe marketeve ku studentët do të mund t’i shfrytëzojnë mjetet.

– Zbritjet të vlejnë deri në fund të muajit, pavarësisht nëse studenti e ka shpenzuar shumën prej 4.500 denarësh.

Megjithatë, studentët kanë parashtruar edhe disa kushte, duke kërkuar që këto dispozita të përfshihen në legjislacion.

KËRKESAT E STUDENTËVE:

– Këto kushte të përfshihen në Ligjin për vaktin e subvencionuar studentor.

– Lista e kompanive dhe masave të publikohet publikisht para hyrjes në fuqi të këtij ligji.

Sipas paralajmërimeve, përmes sistemit digjital do të kontrollohet që mjetet të shfrytëzohen ekskluzivisht për qëllimin e paraparë, përkatësisht për ushqim dhe pije joalkoolike, dhe jo siç ka pasur raste deri më tani, kur paratë janë përdorur edhe për blerjen e cigareve dhe alkoolit. Ndryshe, gjatë periudhës së fundit studentët kanë reaguar duke theksuar se shuma e vaktit të subvencionuar nuk është rritur prej tre vitesh.

Nesër vendim i ri i KRRE-së për çmimet e benzinës dhe naftës! A do të shtrenjtohen apo do të lirohen derivatet e naftës?

0

Komisioni Rregullator për Energjetikë pritet që nesër të dalë me vendim për përllogaritjen e re të çmimeve të karburanteve. Në rast se do të ketë ndryshime, përkatësisht nëse çmimet e derivateve të naftës do të rriten apo do të ulen, vendimi do të hyjë në fuqi nga mesnata e nesërme. Vendimi i fundit i Komisionit Rregullator, i marrë më 26 tetor, solli uljen e të dy llojeve të benzinës për nga pesë denarë. Aktualisht, një litër Eurosuper BS-95 kushton 91 denarë, ndërsa Eurosuper BS-98 kushton 93 denarë. Ndërkaq, çmimi i naftës mbeti i pandryshuar, në 99 denarë për litër.