Ekpoziturat e “Alta Bank” sot nuk punuan! Nuk ka para në bankomatë, kufiri në sportel 10.000 denarë në javë

0

Kjo është pamja para ekspoziturave të “Alta Banka – SH.A. Bitola” sot nëpër Maqedoni.

Gjithsej 19 ekspoziturat që banka i ka nëpër Maqedoni, sot nuk punuan. Ky është njoftimi që qëndron në derën e bankës. Paratë nuk mund të tërhiqen nga bankomatët, ndërsa me vendim të Bankës Popullore, kufiri javor i shumës që mund të tërhiqet është 10.000 denarë për person.
Qytetarët janë të shqetësuar për paratë e tyre.

“Vetëm tani morëm vesh përmes televizioneve. Unë nuk e dija, shkova të paguaja ujin dhe mbeturinat, por kartela nuk funksiononte. Edhe kartelat janë të bllokuara. Dy herë kam tërhequr para, një herë 5.000 dhe një herë 3.000, ndërsa tani nuk e dimë si do të zhvillohet kjo procedurë.”

“Për 10.000, po, por sot nuk t’i japin 10.000. U përpoqëm të tërhiqnim para, por nuk na lejoi fare. Madje, as nuk jemi informuar se banka do të mbyllej. Vuçiqi humbi në Beograd dhe po i mbyllin bankat edhe këtu. Duket se kjo paska qenë e Serbisë e jo e Maqedonisë. Duhet të ankohemi, sepse disa po tërheqin para me kartela, por ata që nuk kanë kartela, ku t’i marrin paratë? Ka shumë njerëz që nuk kanë kartela. Ja, unë nuk kam nga t’i marr paratë.”

“Unë punoj me persona juridikë. Që nga dje, guvernatori i Bankës Popullore njoftoi se, për shkak të kontrollit të mjeteve në situatën e krijuar rishtazi, mund të tërhiqen para me kufi javor prej 10.000 denarësh. Tani nuk e di se si do të ndikojë kjo te depozituesit dhe te mbajtësit e llogarive.”

“Nuk dimë asgjë, vetëm tani morëm vesh.”

“Kemi ardhur të marrim një formular për të kërkuar tërheqjen e parave tona nga kjo bankë, por e kanë mbyllur. Do të kërkojmë zgjidhje, por nuk e dimë ku të ankohemi. Shkuam në Qendrën për Punë Sociale, morëm vërtetim se jemi pensionistë, ndërsa këtu nuk ka numër telefoni ku mund të telefonojmë. Kemi kartelë, kemi tërhequr 10.000 denarë, ndërsa 10.000 të tjera javën e ardhshme.”

Banka Popullore, në komunikatën me shkrim, njoftoi se ALTA BANKA SH.A. BITOLA vazhdon të punojë, por nën administrim të përkohshëm dhe me kufizime në disponimin e parave.

“Vendosja e administrimit është masë e përkohshme, përmes së cilës drejtimi me pasurinë dhe veprimtarinë e Bankës përkohësisht kryhet nga persona të emëruar nga Banka Popullore. Qëllimi është të ruhet stabiliteti i Bankës dhe të mbrohen mjetet dhe interesat e klientëve të saj deri në ndryshimin e strukturës së pronësisë”, tha Banka Popullore

Siç thonë nga Banka Popullore, për personat fizikë është përcaktuar kufi javor për daljen e mjeteve nga llogaritë, në vlerë prej 10.000 denarësh, i cili mund të shfrytëzohet me kartelat e lëshuara nga Banka, për tërheqje të parave të gatshme dhe pagesa te tregtarët.

Pagesat e brendshme nga llogaritë e personave fizikë drejt llogarive të personave të tjerë fizikë dhe juridikë, brenda Bankës, vazhdojnë të lejohen pa kufizim në shumë.

Personat juridikë do të mund të kryejnë vetëm pagesa të brendshme nga llogaritë e tyre drejt llogarive të personave të tjerë juridikë dhe fizikë brenda Bankës, pa kufizim në shumë.

Personat juridikë nuk do të mund të transferojnë mjete jashtë Bankës përmes sistemeve të pagesave në vend, e as të tërheqin para të gatshme nga bankomatët apo sportelet e Bankës.

Hyrjet e mjeteve nga jashtë vendit, përmes SEPA-s dhe bankave korrespondente, do të zhvillohen pa pengesa, ndërsa transfertat dalëse drejt jashtë vendit do të ndërpriten përkohësisht, si për personat fizikë, ashtu edhe për personat juridikë.

Ministria e Transformimit Digjital me urdhër: Të bllokohen edhe 104 faqe të reja interneti për lojëra të fatit online

0

Ministria e Transformimit Digjital i ka dorëzuar një urdhër të ri Agjencisë për Komunikime Elektronike për bllokimin e 104 faqeve të tjera të internetit, përmes të cilave organizohen ilegalisht lojëra të fatit online.

Me urdhrin e ri, numri i përgjithshëm i faqeve të përfshira në bllokim ka arritur në 462. Nga Ministria theksojnë se masat synojnë mbrojtjen e qytetarëve nga keqpërdorimi i të dhënave personale dhe financiare, si dhe parandalimin e ekspozimit të të miturve ndaj lojërave të fatit online.

AKE-ja ka afat prej pesë ditësh që urdhrin t’ua përcjellë operatorëve, të cilët duhet ta kufizojnë qasjen në faqet e përmendura. Nga Ministria u bëjnë thirrje qytetarëve që të mos ndajnë të dhënat e tyre në platforma të internetit të paverifikuara.

Rigjykimi për “Onkologjia 2” nisi nga e para! Vasev dhe Nuhi sërish deklarohen të pafajshëm

0

Seanca gjyqësore për rastin “Onkologjia 2”, kundër ish-drejtorëve të Klinikës së Onkologjisë, Nino Vasev dhe Nehad Nuhi, sot nisi nga e para në Gjykatën Penale në Shkup, për shkak të ndryshimit të një anëtari të trupit gjykues.

Të dy të akuzuarit përsëritën se nuk ndihen fajtorë. Mbrojtja e Vasevit pretendon se aktakuza bazohet në supozime dhe jo në prova konkrete, ndërsa avokatja e Nuhit reagoi për dorëzimin e provave shtesë nga Prokuroria. Sipas aktakuzës, gjatë periudhës 2018-2022, përmes furnizimeve të paligjshme dhe keqpërdorimit të barnave, buxhetit i është shkaktuar dëm prej gati 36 milionë eurosh.

LSDM me interpelancë ndaj guvernatorit Sllaveski, Filipçe: Degët e Alta Bankës nuk punojnë, ndërsa qytetarët nuk mund t’i tërheqin paratë

0

Interpelancë ndaj guvernatorit të Bankës Popullore, Trajko Sllaveski, dhe debat mbikëqyrës në Kuvend për rastin e Alta Bankës, paralajmëroi kryetari i LSDM-së, Venko Filipçe. Sipas tij, hyrja e Alta Bankës në vend është një proces kriminal dhe duhet të ketë përgjegjësi. Ai tha se edhe kryeministri Mickoski, edhe guvernatori Sllaveski duhet të japin përgjigje nëse janë bërë verifikimet dhe nëse ekziston konfirmim për prejardhjen e parave, para se kapitali i Alta Bankës të hynte në Stopanska Banka Manastir. Filipçe akuzoi se ky proces i dyshimtë korruptiv, siç e quajti ai, po zhvillohet në dëm të qytetarëve, të cilëve tashmë u janë bllokuar llogaritë.

“Hristijan Mickoski, grupi i organizuar kriminal dhe guvernatori Trajko Sllaveski, duket qartë se do të ndihmojnë që qytetarëve t’u plaçkiten nga 150 deri në 180 milionë euro. Sot degët nuk punojnë, ndërsa qytetarëve nuk u funksionojnë as kartelat dhe as bankomatët. Si do t’i tërheqin qytetarët paratë e tyre? Pse guvernatori thotë se, edhe pse nuk mund t’i tërheqin paratë e tyre, ata kanë detyrim t’i paguajnë kreditë? Paramendoni çfarë kulmi i paturpësisë! Me çfarë parash do t’i paguajnë njerëzit kreditë?”, tha Filipçe

Që nga mëngjesi ka nisur edhe një përplasje në rrjetet sociale mes Filipçes dhe guvernatorit Sllaveski lidhur me vendimin e djeshëm, të cilin Sllaveski e shpjegoi në një konferencë të jashtëzakonshme për media, duke deklaruar se Alta Banka po vendoset nën administrim dhe se qytetarët do të mund të tërheqin vetëm një shumë të caktuar parash. Pavarësisht pamundësisë për t’i marrë paratë e tyre, Sllaveski u porositi se duhet të vazhdojnë t’i paguajnë kreditë.

“Me qëllim të mbrojtjes së pasurisë së bankës, në ditët në vijim do të vlejnë kufizime të caktuara për pagesat nga llogaritë e klientëve të bankës. Në interes të qytetarëve dhe me qëllim të kryerjes së pagesave të përditshme, është përcaktuar një limit javor për daljen e mjeteve nga llogaritë e personave fizikë, në vlerë prej 10.000 denarësh, i cili mund të shfrytëzohet përmes kartelave të lëshuara nga banka. Theksojmë se, sikurse edhe deri më tani, kredimarrësit duhet të vazhdojnë t’i përmbushin me kohë detyrimet e tyre ndaj bankës”, tha Sllaveski.

Problemet me këtë bankë nisën pasi Banka Popullore e Serbisë ia revokoi licencën Alta Bankës, pas së cilës, nga Banka Popullore e Maqedonisë, në atë kohë siguruan se revokimi i licencës së Alta Bankës në Serbi nuk kishte asnjë ndikim në bankën këtu. Por vetëm një ditë më vonë, banka u vendos nën administrim, ndërsa qytetarët nuk mundën të dispononin me mjetet e tyre financiare.

Bursa e Maqedonisë: “ALTA BANKA SH.A. Bitola” në listën e vëzhgimit

0

ALTA BANKA SH.A. BITOLA është përfshirë në Listën e Vëzhgimit të Bursës së Maqedonisë. Vendimin e ka marrë Bordi i Drejtorëve, për shkak të vendimit të Bankës Popullore për vendosjen e administrimit në bankë.

Nga Bursa e Maqedonisë informojnë se qëllimi është që investitorët të paralajmërohen për rrethanat e jashtëzakonshme dhe rreziqet e mundshme që lidhen me funksionimin e shoqërisë. Përfshirja në këtë listë nuk nënkupton ndërprerjen e tregtimit të aksioneve, por vazhdimin e tij nën mbikëqyrje të shtuar.

Arrestohet pronari i Alta Bankës në Serbi! Më shumë se 30 orë kontrolle në ambientet e bankës

0

Biznesmeni i njohur serb, Davor Macura, pronar i “Alta Bankës” në Serbi, për të cilin mediat serbe shkruajnë se është i afërt me Partinë Përparimtare Serbe në pushtet, është ndaluar pas një aksioni policor në Beograd. Ndalimi pasoi pas më shumë se 30 orësh kontroll në ambientet e bankës, pasi Banka Popullore e Serbisë ia revokoi licencën e punës dhe nisi procedurën e falimentimit.

Vendimi u mor pas konstatimit të problemeve serioze me gjendjen financiare dhe likuiditetin e bankës. Rastin po e heton edhe Prokuroria për Krim të Organizuar, e cila ka kërkuar verifikimin e transaksioneve drejt jashtë vendit. Macura ka interesa biznesore në disa sektorë të ekonomisë serbe.

Kasami uron Arkin Jahijin: T’u qëndrojë besnik premtimeve parazgjedhore dhe të punojë për të gjithë qytetarët

0

Bashkëkryetari i VLEN-it, Bilall Kasami ka uruar Arkin Jahijin për fitoren në zgjedhjet në Bërvenicë duke i uruar mandat të suksesshëm dhe të mbarë. Kasami tha se Jahiji duhet t’ju qëndrojë besnik premtimeve parazgjedhore dhe të jetë kryetar i të gjithë qytetarëve, ndërkohë që shtoi se vendimi i qytetarëve duhet respektuar

“Si koalicion qeverisës, jemi pranë qytetarëve të Bërvenicës për të gjitha nevojat në kompetencë të Qeverisë.

Vazhdojmë me punë për të gjithë qytetarët pa dallim”, tha Kasami

Pagesë rekorde për kompensimet e lehonisë në tetor – janë paguar mbi 467 milionë denarë

0

Tetori ka sjellë një rritje të ndjeshme të pagesave për kompensimin e lehonisë, të cilat kanë arritur në mbi 467 milionë denarë, duke tejkaluar shumën mujore të paguar gjatë katër muajve të fundit. Në total, Fondi i Sigurimeve Shëndetësore gjatë kësaj periudhe ka paguar më shumë se 2,35 miliardë denarë për pushimet mjekësore dhe ato të lehonisë.

Vetëm në tetor të vitit 2026, për kompensimin e pagës për shkak të paaftësisë së përkohshme për punë dhe pushimit të lehonisë janë paguar 621.383.663 denarë.

Nga kjo shumë, 467.074.428 denarë janë ndarë për kompensimin e lehonisë, ndërsa 154.309.235 denarë janë paguar për pushimet mjekësore.

Sipas të dhënave të Fondit, pagesa e kompensimeve për lehoninë në tetor është më e larta në periudhën nga korriku deri në tetor, me një rritje prej mbi 25 për qind krahasuar me muajin shtator.

Gjatë periudhës katërmujore, nga korriku deri në tetor, për këto dy kategori janë paguar mbi 2,35 miliardë denarë, prej të cilave më shumë se 1,66 miliardë denarë janë për kompensimin e lehonisë.

Nga Fondi theksojnë se prioritet mbetet realizimi i rregullt dhe me kohë i të drejtave ligjore të të siguruarve, menaxhimi i përgjegjshëm i mjeteve financiare dhe rritja e efikasitetit në shqyrtimin e kërkesave.

Aty njoftojnë se edhe në periudhën e ardhshme do të vazhdojnë aktivitetet për ruajtjen e një dinamike të qëndrueshme të pagesave, me qëllim që kompensimet të paguhen me kohë dhe kjo të bëhet praktikë e rregullt.

Mexhiti për Bërvenicën: Në politikë, pozicionimi kundër të gjithëve nuk është strategji që çon drejt suksesit, por një qasje që herët a vonë prodhon zhgënjim

0

Izet Mexhiti, bashkëkryetar i VLEN-it ka reaguar pas përfundimit të zgjedhjeve në Bërvenicë. Nëpërmjet një shkrimi në profilin e tij në Facebook, Mexhiti deklaroi se Bërvenica tashmë ka kryetar të ri dhe se fushata dhe festa pas zgjedhjeve, sipas tij “trajtohen si folklor para dhe paszgjedhor”.

Më tej Mexhiti thotë:

“Zgjedhjet mbaruan. Sot Bërvenica ka kryetar komune, ndërsa jeta vazhdon dhe të gjithë ne u kthehemi obligimeve tona.
Deklaratat nxitëse gjatë fushatës i kam konsideruar si folklor parazgjedhor. Në po atë frymë, deklaratat polarizuese që dëgjova mbrëmë dhe sot i trajtoj folklor paszgjedhor. Votat janë shprehje e lirë e vullnetit të qytetarëve dhe askush nuk i ka në pronësi ato. Në politikë, pozicionimi kundër të gjithëve nuk është strategji që çon drejt suksesit, por një qasje që herët a vonë prodhon zhgënjim” shkruan Mexhiti.

Më tej ai shton se në: “Në demokracitë multietnike nuk guxon të ekzistojë ndarje në ‘ne’ dhe ‘ata’, sepse kjo implikon pabarazi dhe tendenca për të suprimuar tjetrin. Dialogu dhe bashkëpunimi në çdo shoqëri janë imperativ dhe parakusht për funksionim të mirëfilltë. Në shoqëritë multietnike, ky dialog është detyrim i të gjithë aktorëve shoqërorë.

Prandaj, nuk kemi pse të merremi me folklorin e zakonshëm postzgjedhor, me arsyetimet dhe interpretimet që u serviren qytetarëve sa herë që rezultatet nuk përputhen me pritshmëritë e dikujt. Qytetarët vendosin me votë, ndërsa politika duhet të dijë të marrë përgjegjësi për qëndrimet dhe veprimet e veta”.

Trump kërcënon Iranin: Mund të na duhet ta godasim fort

0

Presidenti amerikan, Donald Trump, kërcënoi Iranin me sulme ajrore.

Gjatë një tubimi elektoral, ai tha se SHBA-së mund t’i duhet ta godasë rëndë këtë vend, por nuk sqaroi se kur apo në çfarë rrethanash.

“Arsyeja e vetme pse nuk e kam përfunduar punën me Iranin është se dua të tregohem i mirë”, u tha ai mbështetësve më 1 nëntor, gjatë një tubimi në Ajova, vetëm dy ditë para zgjedhjeve të mesmandatit në SHBA, më 3 nëntor.

“Dua të përpiqem të shpëtoj sa më shumë jetë që të mundem… Por, në një moment, do të na duhet t’i godasim fort”, shtoi ai.

Trump deklaroi më herët se, gjatë fundjavës, ka biseduar në telefon me kryeministrin izraelit, Benjamin Netanyahu, dhe se Irani ka qenë ndër temat e diskutuara.

Ai nuk dha hollësi të tjera.

Portali amerikan, Axios, duke cituar burime amerikane dhe izraelite, raportoi se Netanyahu i ka kërkuar Trumpit t’i nisë sulmet kundër Iranit menjëherë pas zgjedhjeve të mesmandatit në SHBA, më 3 nëntor.

Megjithatë, sipas raportimit, Trump është më i prirë t’u japë kohë negociatave që janë në zhvillim, për të parë nëse ato do të sjellin rezultate.

Tensionet mes Uashingtonit dhe Teheranit lidhen kryesisht me programin bërthamor iranian dhe shqetësimet e SHBA-së dhe Izraelit se Irani mund të zhvillojë armë bërthamore.

Teherani ka këmbëngulur se programi i tij ka vetëm qëllime paqësore dhe ka mohuar se synon të prodhojë armë të tilla.

Përplasja mes vendeve u përshkallëzua në shkurt të këtij viti, kur SHBA-ja dhe Izraeli nisën sulme ndaj Iranit, duke goditur objektiva ushtarake dhe të lidhura me programet bërthamore e raketore.

Irani u kundërpërgjigj me sulme ndaj Izraelit, bazave amerikane dhe objektivave në vende të tjera të rajonit.

Në prill u arrit një armëpushim, ndërsa në qershor palët nënshkruan një memorandum që parashihte negociata për përfundimin e konfliktit.

Megjithatë, marrëveshja nuk u zbatua plotësisht dhe luftimet vazhduan, duke lënë të pazgjidhura çështjet për programin bërthamor iranian, raketat balistike dhe sanksionet amerikane.

Përpjekjet diplomatike rifilluan ditëve të fundit.

Sipas Axios-it, ndërmjetësuesit nga Katari kanë zhvilluar bisedime me zyrtarët iranianë, në përpjekje për të hapur rrugën për negociata të drejtpërdrejta mes Uashingtonit dhe Teheranit.

Ministri i Jashtëm iranian, Abbas Araqchi, ka thënë se Irani është i përgatitur si për diplomaci, ashtu edhe për mbrojtje.

Ndërkohë, një zëdhënës i ushtrisë iraniane ka paralajmëruar se një luftë e re mund të zgjasë më shumë se përplasjet e mëparshme dhe se Trump nuk do të mund të përcaktonte i vetëm kohëzgjatjen apo kushtet e përfundimit të saj.