Bashkimi Evropian në Shqipëri ka dënuar përshkallëzimin e dhunës gjatë protestave dhe shkatërrimin e pronës publike e private, duke u bërë thirrje protestuesve për vetëpërmbajtje dhe shmangien e akteve të dhunshme. Nga BE-ja theksojnë se liria e tubimit dhe e shprehjes janë të drejta themelore dhe vlera evropiane që duhet të ushtrohen në mënyrë paqësore, ndërsa dialogu konstruktiv mes palëve vlerësohet si rruga e vetme për adresimin e shqetësimeve legjitime.
Të verbërit në Tetovë pa infrastrukturë! Kërkohen shtigje të posaçme
Kjo është pamja dhe bota përmes së cilës detyrohen të orientohen personat e verbër në Tetovë. Një botë ku çdo hap është një pasiguri, çdo kalim rruge kërkon guxim, dhe çdo institucion mbetet larg arritjes pa ndihmën e një shoqëruesi.
Edhe pse në qytet u përuruan semaforë të rinj me sinjalizim zanor, realiteti në terren mbetet tejet i vështirë. Infrastruktura rrugore dhe trotuaret nuk janë të përshtatura, ndërsa automjetet e parkuara pa kriter u vështirësojnë jashtëzakonisht shumë lëvizjen.
“Apeli im për qytetarët, ka edhe njerëz që më shohin se lëviz me shkopin e bardhë, ama rrugën nuk ma lërojnë. Edhe veturat mos t’i parkojnë kudo, ku s’duhet. Edhe institucionet të punojnë pak më shumë, që t’i plotësojnë këto kushtet tona. Te semaforët e rinj ka sinjalizim me zë. Infrastruktura trotuareve duhet të përmirësohet, allan! Veturat na pengojnë shumë, parkimet janë vende pa vend, lëvizja na vështirësohet. Për shembull, në stacion të autobusëve kemi parkime veturash… Edhe në këtë aspekt duhet të punohet pak më shumë”, tha Jetmir Selmani
Për momentin, qyteti nuk ofron shtigje të posaçme për lëvizjen e këtyre personave, duke kërkuar angazhim më të madh institucional. Situata në Tetovë rreth infrastrukturës është tejet specifike.
“Ne patëm kërkesa te kryetari i komunës edhe për personat me shikim të dëmtuar që kemi, që të na ndihmojë rreth trotuareve ku parkohen shumë vetura. Ata njerëz që parkohen janë të papërgjegjshëm dhe nuk mendojnë se ka edhe persona me aftësi të kufizuara – jo vetëm ne të verbrit, por ka edhe persona me karrocë – ku ne nuk mund të kalojmë ashtu siç duhet të ecim. Detyrohemi të zbresim në rrugë, e pastaj, mos e dhashë Zoti, mund të na godasë ndonjë makinë. Po ashtu, kërkuam nga kryetari i komunës edhe shtigje të posaçme për personat e verbër. Nuk mundet në të gjithë qytetin, por aty ku frekuentojmë më shumë, ku ka institucione publike apo te shoqata ku vijnë vetë anëtarët, që aty të ketë shtigje të dedikuara vetëm për personat e verbër”, tha Hamdi Xhemaili
Institucionet paralajmërohet se ky është vetëm hapi i parë, dhe se në të ardhmen do të punohet në zgjerimin e projekteve për lehtësimin e lëvizjes në qytet.
“Do isha thënë është një projekt të cilin jemi në realizim e sipër, kjo ishte faza e parë, çështja e kalimit të rrugës dhe instalimi i semaforëve me sinjalizim zanor dhe ulja e barrierave apo trotuareve të rrugës që ato të mund të kalojnë. Fazën tjetër do të vazhdojë ashtu siç u përmend, edhe zgjerimi i kryqëzimeve me semafor zanor, por po ashtu edhe shtigjet e veçanta që këta persona të mund të lëvizin më lirshëm, veçanërisht në rrugët qendrore të qytetit. Pra, në fazën tjetër do të vazhdohet menjëherë edhe me përcaktimin e shtigjeve të tillë”, tha Kasmai.
Përtej semaforëve me zhurmues dhe premtimeve për investime, pavarësia e një qyteti nuk matet vetëm me teknologjinë në letër, por me ndërgjegjen e secilit prej nesh.
Në Maqedoni do të prodhohen pjesë për “Audi”! “Kromberg & Schubert” do të hapë 2.000 vende të reja pune
Në Maqedoni do të prodhohen pjesë për gjigantin gjerman të automobilave “Audi”. Kryeministri Hristijan Mickoski paralajmëroi një investim të ri të kompanisë gjermane “Kromberg & Schubert” në Manastir, me të cilin do të hapen 2.000 vende të reja pune.
“Sot bëjmë të ditur një lajm të rëndësishëm për ekonominë vendase. Kompania “Kromberg & Schubert” po fillon një projekt të ri investues, përmes të cilit, gjatë katër viteve të ardhshme, parashikohet hapja e 2.000 vendeve të reja të punës. Aty do të prodhohen komponentë automobilistikë për gjigantin gjerman të automobilave “Audi”. Nuk kam nevojë t’ju kujtoj se çfarë është “Audi” dhe çfarë rëndësie ka për industrinë automobilistike”, tha Mickoski.
Kryeministri informoi se në fabrikën në zonën industriale “Zhabeni” do të prodhohen sisteme për një model të ri të “Audi”-t, me një vëllim të planifikuar prej mbi 3.000 tufash kabllosh në ditë. Drejtori i “Kromberg & Schubert”, Gjorgji Trenkovski, vlerëson se Maqedonia ka kuadër të mjaftueshëm profesional dhe thotë se do të përpiqen t’i gjejnë në vend 2.000 punëtorët.
“Do t’i kontaktojmë të gjithë inxhinierët dhe operatorët që janë në dispozicion, si dhe personat e papunë që ndoshta dëshirojnë ta ndryshojnë vendin e punës. Nëse nuk arrijmë t’i plotësojmë të gjitha vendet e punës, keni të drejtë që kuota për punëtorët e huaj është rritur dhe do të veprojmë me kujdes edhe në atë drejtim. Pra, vendimi për projektin tashmë është marrë: ai do të realizohet në Maqedoni dhe do t’i kemi ato vende pune. Na lejoni që, përmes punës operative, të shohim se nga do të vijnë punonjësit”, tha Trenkovski.
“Kromberg & Schubert” deri më tani ka realizuar tri projekte investuese në vend. Kryeministri pret që me këtë projekt numri i përgjithshëm i të punësuarve në fabrikë të arrijë në 10.000. Pritjet janë që vitin e ardhshëm kompania të tejkalojë 400 milionë euro eksporte nga kapacitetet e saj prodhuese në vend, por edhe të ofrojë vende pune me paga më të larta. Sipas kryeministrit, pagat mesatare në këtë kompani, veçanërisht për kuadrin me kualifikim të lartë, janë mbi 80 për qind më të larta se mesatarja në Maqedoni.
Zelensky: Ukraina do të rifillojë sulmet ndaj rafinerive ruse të naftës
Ukraina ka rinisur sulmet ndaj rafinerive ruse me një sulm në rajonin e Ryazanit, tha guvernatori rajonal. Kjo erdhi pas paralajmërimit të presidentit ukrainas, Volodymyr Zeelensky, se do të rifillojë sulmet ndaj rafinerive ruse të naftës, pasi akuzoi SHBA-në për tërheqje të mbështetjes thelbësore.
Presidenti ukrainas tha se kishte kufizuar sulme të tilla për tre ditë me urdhër të Uashingtonit, ndërsa Rusia kishte vazhduar të godiste infrastrukturën energjetike të Ukrainës. “Mbaruam”, ka thënë ai për Financial Times.
Zelensky akuzoi gjithashtu SHBA-në për tërheqjen e ndarjes së inteligjencës mbi sulmet ruse, për të ushtruar presion mbi Kievin që t’i japë fund sulmeve pasi SHBA arriti një marrëveshje për të importuar naftë ruse, dhe tha se një ngadalësim i shërbimeve satelitore Starlink të përdorura nga ushtria e Ukrainës ishte i qëllimshëm.
Ai më parë tha se do të binte dakord me të ashtuquajturin “armëpushim energjetik” të shpallur nga presidenti i SHBA-së Donald Trump të dielën nëse edhe Moska do ta respektonte atë.
Por Zelensky akuzoi Rusinë se e injoroi marrëveshjen e propozuar brenda pak orësh nga shpallja e saj, me sulme që lanë qindra mijëra ukrainas pa energji elektrike.
Udhëheqësi ukrainas tha se zyrtarëve ukrainas u ishte thënë nga homologët amerikanë se “nëse nuk i ndalni sulmet, ne do të bllokojmë inteligjencën”.
Ushtria e Ukrainës mbështetet në alarmet e paralajmërimit të hershëm të SHBA-së për sulmet ajrore ruse që vijnë në mënyrë që ta ngrisë mbrojtje ajrore, ndërsa lidhjet e internetit Starlink përdoren gjatë gjithë përpjekjeve të saj të luftës.
Mucunski: Nga marsi, linjë ajrore Dubai-Shkup
Ministri i Punëve të Jashtme dhe Tregtisë së Jashtme, Timço Mucunski, zhvilloi një takim me drejtorin kryesor komercial të kompanisë Flydubai, Hamad Obaidalla, në kuadër të vizitës zyrtare të punës në Emiratet e Bashkuara Arabe.
Gjatë takimit u konfirmua zyrtarisht se nga muaji mars, kompania Flydubai do të vendosë linjën e drejtpërdrejtë ajrore Dubai–Shkup, me tri fluturime në javë. Mucunski vlerësoi se vendosja e kësaj linje të drejtpërdrejtë paraqet një rezultat konkret të diplomacisë aktive ekonomike dhe përpjekjeve për lidhje më të mira ndërkombëtare.
Në fokus të bisedimeve ishin mundësitë që linja e drejtpërdrejtë ajrore krijon për avancimin e mëtejshëm të marrëdhënieve ekonomike dhe tregtare, tërheqjen e investimeve, si dhe forcimin e bashkëpunimit turistik dhe kulturor ndërmjet dy vendeve.
Njëkohësisht, u theksua roli i rëndësishëm i Ambasadës në Emiratet e Bashkuara Arabe në realizimin e këtij synimi, përmes punës së përkushtuar dhe të vazhdueshme gjatë periudhës së kaluar.
Kasami: Javën e ardhshme takohem me Mickoskin për ndryshimet në postet e zëvendësministrave dhe drejtorëve
Bashkëkryetari i VLEN-it, Bilall Kasmai ka bërë të ditur se gjatë javës së ardhshme pritet të mbahet takimi i radhës me kryeministrin Hrisitjan Mickoskim që siç tha, në takim pritet të diskutohen çështje që lidhen me plotësimin dhe zëvendësimin e zëvendësministrave, si dhe me emërimet në pozitat e drejtorëve dhe zëvendësdrejtorëve në institucionet ku ka nevojë për plotësim ose zëvendësim të tyre.
“Besoj që brenda javës tjetër do të jetë takimi i radhës me kryeministrin dhe njëherësh kryetarin e VMRO-së si partner të koalicionit, ku do të bashkëbisedojmë për këto tema, pra edhe për zëvendësministrat dhe plotësimin dhe zëvendësimin e zëvendësministrave, por njëherësh edhe për çështjet e tjera, më konkretisht për drejtorët dhe zëvendësdrejtorët, aty ku duhet plotësuar dhe aty ku duhet të bëhet zëvendësimi i tyre”, tha Kasami.
Në Maqedoni do të prodhohen pjesë për “Audi”! Mickoski: 2.000 vende të reja pune
Kryeministri i Maqedonisë së Veriut, Hristijan Mickoski, njoftoi sot një investim të ri të kompanisë gjermane “Kromberg & Schubert”, i cili, sipas tij, do të sjellë 2 mijë vende të reja pune.
Kompania pritet të prodhojë pjesë për industrinë automobilistike, përfshirë edhe për gjigantin gjerman “Audi”.
“Do të njoftojmë edhe një lajm të madh dhe të rëndësishëm për ekonominë maqedonase – një investim të ri të kompanisë gjermane ‘Kromberg & Schubert’, 2 mijë vende të reja pune dhe prodhim të pjesëve për gjigantin gjerman të automobilave ‘Audi’”, deklaroi Mickoski.
Sipas kryeministrit, investimi është pjesë e politikave të Qeverisë për tërheqjen e investimeve dhe hapjen e vendeve të reja të punës.
Sonte kryeministri Hristijan Mickoski është mysafir në Click Plus të TV21. Na ndiqni me fillim nga ora 21:30.
Përmbytje në Stamboll, humb jetën një 14-vjeçar e pezullohet mësimi
Reshjet e dendura të shiut shkaktuan përmbytje të mëdha në Stamboll. Një 14 vjeçar ka humbur jetën për shkak të kontaktit me energjinë elektrike gjatë vërshimeve.
14-vjeçari i identifikuar me inicialet M. I., humbi jetën pasi shkeli në një pellg uji në parkun Çukurbostan, në lagjen Balat të Stambollit, që ndodhet në distriktin Fatih. Sipas informacioneve nga zyra e guvernatorit të Stambollit, i mituri u transportua pa ndjenja në spital, por ndërroi jetë pavarësisht përpjekjeve të mjekëve, raportojnë mediat turke.
Në qytetin me rreth 16 milionë banorë u raportuan më shumë se 1.200 raste përmbytjesh, 15 rrëshqitje dheu dhe dhjetëra raste kur njerëzit mbetën të bllokuar nga uji i rrëmbyeshëm.
Mbi 2.500 raportime për shkak të motit të keq
Reshjet shkatërruese shkaktuan kaos në të gjithë qytetin, ndërsa shërbimet emergjente pranuan gjithsej 2.518 raportime të lidhura me kushtet e këqija atmosferike
Sipas të dhënave moti i keq preku 808 objekte banimi, 280 ambiente biznesi dhe 76 automjete.
Mediat raportuan për shtëpi, dyqane, rrugë dhe nënkalime të përmbytura, ndërsa shumë automjete mbetën të bllokuara në ujë.
Reshjet më të mëdha në pjesën aziatike të qytetit
Reshjet më të dendura u regjistruan në zonën Ömerli, në distriktin Beykoz, në pjesën aziatike të Stambollit.
Për shkak të seriozitetit të situatës, pranë Drejtorisë Rajonale të Agjencisë Turke për Menaxhimin e Fatkeqësive dhe Emergjencave (AFAD) u krijua një qendër koordinimi për krizën.
Në terren u angazhuan rreth 8.000 pjesëtarë të shërbimeve të ndryshme, me mbështetjen e 2.000 automjeteve dhe makinerive të ndërtimit. Në operacionet e ndërhyrjes morën pjesë ekipet e AFAD-it, Bashkisë Metropolitane të Stambollit dhe shërbimeve komunale.
Mësimi u pezullua, ndalohet qarkullimi i motoçikletave
Për shkak të kushteve atmosferike, autoritetet vendosën të pezullojnë mësimin në shkollat e Stambollit ditën e enjte. Gjithashtu, u ndalua qarkullimi i motoçikletave për shkak të rrezikut në rrugë.
Guvernatori i Stambollit, Davut Gül, u bëri thirrje banorëve të tregojnë kujdes të veçantë, veçanërisht në pjesën aziatike të qytetit, duke u rekomanduar të qëndrojnë në shtëpi, përveç rasteve kur udhëtimi është i domosdoshëm.
Punonjësit me aftësi të kufizuara në sektorin publik, si dhe nënat me fëmijë të vegjël, u liruan nga detyrimet e punës. Përjashtim bënë punonjësit e shërbimeve sociale që punojnë në institucionet ku strehohen fëmijë, të moshuar dhe persona me aftësi të kufizuara, me qëllim që të sigurohet vazhdimësia e kujdesit dhe mbështetjes për këta persona.
Banorëve që jetojnë në apartamente në katin përdhes ose në bodrume u rekomandua ta kalojnë natën në vende më të sigurta.
Moti i keq shkaktoi gjithashtu trafik të rënduar, veçanërisht gjatë orëve të pikut në mbrëmje, kur qytetarët po ktheheshin nga puna. Transporti publik ishte jashtëzakonisht i mbingarkuar, pasi shumë qytetarë hoqën dorë nga përdorimi i automjeteve private.
Pavarësisht problemeve të mëdha në rrugë, zyra e guvernatorit njoftoi se asnjë rrugë nuk ishte mbyllur plotësisht për shkak të shiut. Pistat e aeroporteve funksiononin normalisht dhe nuk u raportuan anulime fluturimesh.
Zyrtari i MPB-së dyshohet se falsifikoi vërtetimet për dhurim gjaku për të përfituar 6 ditë pushim të paguar
Departamenti për Kontroll të Brendshëm, Hetime Kriminalistike dhe Standarde Profesionale në kuadër të Ministrisë së Punëve të Brendshme (MPB) ka ngritur kallëzim penal ndaj A.A., nën dyshimin për falsifikim të dokumenteve.
Sipas njoftimit, kallëzimi penal i është dorëzuar Prokurorisë Themelore Publike për Ndjekjen e Krimit të Organizuar dhe Korrupsionit, përkatësisht njësisë së specializuar që merret me veprat penale të kryera nga personat me autorizime policore dhe pjesëtarët e policisë së burgjeve.
I dyshuari, i punësuar në Departamentin për Mbrojtjen e Personaliteteve dhe Objekteve të Caktuara pranë MPB-së, dyshohet se kishte përpiluar dhe përdorur dy vërtetime të falsifikuara për dhurim gjaku, ndonëse më 3 mars dhe 9 korrik 2026 nuk kishte dhuruar gjak në Institutin e Transfuzionit të Gjakut, pranë kompleksit të klinikave “Nënë Tereza”.
Sipas autoriteteve, me këto vërtetime ai kishte paraqitur dy kërkesa për shfrytëzimin e pushimit të paguar prej tri ditësh pune për secilin rast. Pushimet përfshinin datat 3, 4 dhe 5 mars, si dhe 9, 10 dhe 13 korrik 2026.
Ndaj tij, përveç kallëzimit penal për veprën “Falsifikimi i dokumentit”, sipas nenit 378 të Kodit Penal, Departamenti për Kontroll të Brendshëm do të paraqesë edhe propozim për nisjen e procedurës për përcaktimin e përgjegjësisë për shkelje të rendit dhe disiplinës së punës.
Arrestohet 34-vjeçari nga Mali i Zi, voziste 185 km/h në zonën ku lejohej 100 km/h
Një shtetas 34-vjeçar nga Mali i Zi është ndaluar nga policia në pikën kufitare të Tabanocit, pasi ishte regjistruar nga sistemi “Safe City” duke drejtuar automjetin me shpejtësi prej 185 km/h, në një segment të autostradës ku shpejtësia maksimale e lejuar është 100 km/h, përcjell TV21.
Sipas njoftimit të policisë, rasti është regjistruar më 14 tetor 2026, rreth orës 14:25, në dalje të shtetit, gjatë kontrollit të një veture të tipit “BMW” me targa të Malit të Zi.
Nga verifikimet përmes sistemit “Qyteti i Sigurt” është konstatuar se drejtuesi i automjetit, me inicialet M.N. (34), dyshohet për veprën penale “Drejtim i pakujdesshëm i automjetit motorik”, sipas nenit 297-a të Kodit Penal.
Ngjarja kishte ndodhur më herët në autostradën Shkup–Tabanoc, pranë kryqëzimit të Delladrovceve, ku shoferi ishte regjistruar duke lëvizur me shpejtësi prej 185 km/h.
Ai është shoqëruar në stacion policor, ndërsa pas dokumentimit të plotë të rastit, ndaj tij do të parashtrohet kallëzim penal përkatës.