Rreth 1 mijë raste të reja me kancer të gjirit janë diagnostikuar vitin e kaluar në Maqedoni. Në Klinikën për Radioterapi dhe Onkologji, aktualisht janë rreth 7 mijë pacientë në trajtim aktiv. Nga Klinika thonë se gjatë vitit të kaluar janë futur terapi të reja, veçanërisht për pacientët me kancer të gjirit, ndërsa është rritur edhe numri i pacientëve që marrin trajtim specifik.

“Sa i përket statistikave institucionale, vitin e kaluar e përfunduam me 5.300 pacientë të rinj me lloje të ndryshme të kancerit. Në përgjithësi, numri po rritet, pra çdo vit kemi 200 deri në 300 pacientë të rinj më shumë. Ndërsa sa i përket prevalencës, pacientët që paraqiten të paktën një herë në Klinikë gjatë një viti kalendarik, bëhet fjalë për afro 20.000 pacientë në vit”, tha Igor Stojkovski.

Stojkovski tha se po punohet edhe për decentralizimin e shërbimeve. Një pjesë e shërbimeve tashmë ofrohen në Spitalin e Përgjithshëm të Qytetit “8 Shtatori” në Shkup, ndërsa synohet që onkologë nga Shkupi të angazhohen edhe në Spitalin Klinik të Manastirit. Sa i përket decentralizimit, Ana Marjanoviq nga “Hema-Onko” tha se si shoqatë kanë insistuar që procesi të bëhet në mënyrë që, para së gjithash, pacientët të kenë terapi të sigurt dhe kushte për ta marrë atë rregullisht, në kohë dhe në një atmosferë të denjë.

“Qëllimi nuk është vetëm që terapia të merret, por të sigurojmë që çdo pacient që nuk do të jetë në Klinikën e Onkologjisë, ta marrë terapinë në mënyrë të sigurt. Nga njëra anë, ne si pacientë e dimë më së miri se sa i madh është presioni mbi Klinikën e Onkologjisë. Kjo është edhe për shkak të mungesës së personelit, të cilin po përpiqen ta kompensojnë, por edhe për shkak të numrit të madh të ekspertëve në trajtimin e sëmundjeve, veçanërisht të kancerit të gjirit”, tha Ana Marjanoviq.

Stojkovski u pyet edhe se si do ta zgjidhin problemin me ndërprerjet në furnizimin me terapi, për çka tha se mund t’i bëjnë një paralajmërim distributorëve, pasi, siç tha, distributori i di pasojat që shkaktohen nga vonesat në furnizimin e terapisë për pacientët.

Qeveria për herë të dytë këtë vit e rishikoi arkën e shtetit. Shkurtohen edhe të hyrat edhe shpenzimet në buxhet, me nga 86,2 milionë euro. Sipas ministres së Financave, Gordana Dimitrieska-Koçoska, rebalanci i dytë nuk është rezultat i problemeve me likuiditetin e Buxhetit, por është harmonizim i projeksioneve buxhetore me kushtet e reja ekonomike deri në fund të vitit. Siç theksoi, ulja e akcizave për karburantet dhe ulja e TVSH-së për naftën nga 18 në 10 për qind kanë pasur efekt të drejtpërdrejtë mbi buxhetin. Përveç të hyrave, shkurtohen edhe shpenzimet, por edhe paratë për projekte kapitale – më së shumti në Ministrinë e Mjedisit dhe për Energjetikë.

“Projekti i ulët lidhet me uljen te mallrat dhe shërbimet dhe subvencionet, si rezultat i shpenzimit të disiplinuar dhe më efikas, duke siguruar njëkohësisht mjete shtesë për kategoritë më të rrezikuara të qytetarëve dhe për shërbimet shëndetësore. I ulim shpenzimet aty ku realizimi është më i dobët ose aty ku nuk bëhet fjalë për prioritete më të larta. Por, nuk kursejmë në atë që është më e rëndësishme. Sigurojmë mjete shtesë për kategoritë sociale të cenueshme dhe shërbimet shëndetësore. Te shpenzimet kapitale bëjmë korrigjim prej rreth 5,7 miliardë denarësh, para së gjithash për shkak të prolongimit të dinamikës së realizimit të projekteve të caktuara kapitale”, tha Gordana Dimitrieska-Koçoska.

Koçoska konfirmoi se para dy ditësh vendi është huazuar jashtë vendit me një mini-euroobligacion prej 150 milionë eurosh me kamatë prej 5,25%. Tha se kjo është në kuadër të huamarrjes së paraparë për këtë vit. Tha se, edhe pse në Qeveri ka kaluar vendim për huamarrje prej 250 milionë eurosh, megjithatë shuma është më e vogël për shkak të kamatave të larta në tregje. Paralajmëroi edhe se në fillim të vitit të ardhshëm do të ketë huamarrje të re për kthimin e euroobligacionit të vjetër prej 500 milionë eurosh.

“Si mendojnë t’i shërbejmë 500 milionë euro në mars. Ja, nëse kanë ndonjë shkop magjik dhe dinë diçka, le të vijnë, le të thonë. Ja, i ftoj të vijnë, le të thonë, le të më japin një propozim. Si mendoni që për tre muaj të grumbulloni ju para në buxhet, të paguani paga, pensione dhe të shërbeni borxhe, ndërkohë që po them 500 milionë euro vetëm në bazë të principalit të euroobligacionit, po ku janë kamatat, ku janë kamatat e kredive të tjera, kështu që atë pjesë unë fare nuk e komentoj. Normalisht që duhet të ketë huamarrje, sepse ne jemi qeveri e përgjegjshme”, deklaroi Gordana Dimitrieska-Koçoska.

Me rebalancin e dytë, deficiti buxhetor mbetet në projeksionin e mëparshëm prej 4,1 për qind të BPV-së. Mbetet edhe projeksioni për rritjen e BPV-së prej 3,5 për qind dhe inflacioni prej 3,5%. Koçoska tha se gjendja globale është shumë e pasigurt dhe paralajmëroi se në fund të vitit do të ketë rishpërndarje të reja nga arka e shtetit.

Në rastin gjyqësor “Lotaria” dëshmoi dëshmitari i prokurorisë Aleksandar Andonov, drejtor i sektorit për parandalimin e larjeve të parave dhe financimit të terrorizmit në SH.A. “Lotaria Shtetërore”. Ai tha se ka qenë njëri nga 6 anëtarët e komisionit për zbatimin e procedurës së furnizimit publik për blerjen e VLT aparateve. Në pyetjet e prokurorit dhe pyetjeve të kryqëzuara nga pala mbrojtëse, dëshmitari Andonov tha se në aspektin formal-juridik tenderi për aparatet VLT ka qenë gjithçka në rregull.

“A keni marr pjesë në procedurën për furnizimin e VLT aparateve në Lotarinë shtetërore?
A keni njohuri çfarë ndodhi me VLT, përkatësisht a janë vënë në përdorim për nevojat e Lotarisë?”, tha Daniel Kocev, Prokuror Publik

“Po, si anëtar i komisionit për zbatimin e procedurës në aspektin juridik të tri ofertave, ku u vendos zgjedhja e ofertës më të favorshme. Ne kemi vepruar sipas vendimeve të sjella paraprakisht, ku ishte paraparë plani për furnizime publike që paraqet një lloj dokumentacioni që evidentohen të gjitha tenderët e Lotarisë. U sjell marrëveshja kornizë që e bashkëngjit në ‘ESJN’, me ç’ rast u ballafaquam me kontroll të Drejtorisë për furnizime publike pasi që shuma e tenderit ishte e lartë, nëse e njëjta ishte zbatuar sipas Ligjit për furnizime publike. Pas saj morëm procesverbal dhe pastaj u realizua blerja e VLT. U dorëzuan kërkesat në DAP dhe Ministri të Financave, por aparatet ndodhen më magazinat e lotarisë”, tha Aleksandar Andonov, Dëshimtar

Elenko Milanov – avokat i Përparim Bajramit: “A i kishte dokumentet e duhura tenderi?”
Dëshimtari Aleksandar Andonov: “Po, në aspektin formal-juridik i kishte dokumentet në rregull.”

Avokati i të akuzuarit të dytë, ish-zëvendës kryeministrit Artan Grubi tha se edhe dëshmitari i dytë i organit të akuzës ka vërtetuar teorinë e palës mbrojtëse se të akuzuarit nuk kanë bërë vepër penale. Ai tha se Grubi pritet të lirohet nga arresti shtëpiak më 13 tetor kur edhe i skadon kjo masë dhe i njëjti do të mbrohet në liri, me masën e sigurisë duke lënë në garanci prona të paluajtshme në vlerë prej 335 mijë euro, si banesa në pronësi të tij dhe familjarëve të tij se nuk do të arratiset sërish.

“Faktet i vërteton gjykata! Deklarata e dëshmitarit të sotëm e vërtetoi teorinë tonë të rastit se nuk ka përfshirje të Artan Grubit në furnizimin publik në kuadër të punës së Lotarisë Shtetërore. Dëshmitari e sqaroi si funksionon tenderi dhe cilat veprime janë ndërmarrë, thjesht neve asgjë nuk na prek që do të ishte e kundërta e teorisë së rastit”, tha Goce Ristevski, avokati i Artan Grubit.

Tri seancat e radhës më 9,15,16 Tetor anulohen me kërkesë të prokurorisë.
Seancat e radhës mbahen me 20 dhe 21 Tetor me dëshmitaret Hrista Najdanov dhe Naxhije Hoxha!

Lëshohet linjë e re e autobusit për studentët e Universitetit “Nënë Tereza” në Shkup. Do të lëvizë në çdo 50 minuta.

Rektori i këtij universiteti Bekim Fetaji deklaroi se tani më ka 2 linja të autobusit 17 dhe 17a që do të qarkullojnë në 24 stacione. Ai bëri të ditur se në shkurt do të ketë linjë të re që do të lëviz në çdo 15 minuta.

“Qarkullon në shumë pjesë 24 stacione, por pjesa kryesore për ne është që përfshihet pjesa e Bit Pazarit përballë UKIM-it elektoratit, pastaj vjen këndej nga rruga e plastikave dhe do të vjen deri këtu tek ne, pastaj rrethrrotullohet te ambasada e Amerikës dhe kthen majtas nga muzeu dhe kjo pjesë pastaj i lidh studentët me të gjithë pikat tjera”, tha Bekim Fetaji.

Sa i përket ndërtimit të kampusit të ri, rektori Bekim Fetaji bëri të ditur se tre fakultete janë transferuar në objektin e Lidhjes së Sindikatave. Bëhet fjalë për Fakultetin e Shkencave Sociale, Fakultetin e Shkencave Humane dhe Fakultetin e Arkitekturës dhe Ndërtimtarisë.
Mbikëqyrësi i punimeve, Oliver Kolevski, deklaroi se aktualisht po punohet në tre nga nëntë objektet e parapara për t’u ndërtuar në fazën e parë.

“Aktualisht, është duke u zhvilluar procedura e tenderit për kontraktorin mbikëqyrës. Kur të përfundojë kjo procedurë, do të fillojë prishja dhe në atë pikë të gjitha objektet e tjera do të jenë përfunduar. Nga këto 3 objekte, njëri po e përfundon fazën e plotë të ndërtimit brenda dy javësh dhe dy të tjerët do të përfundojnë diku në fillim të dhjetorit”, tha Oliver Kolevski.

Gurthemeli për ndërtimin e kampusit të ri të Universitetit “Nënë Tereza” në Shkup u vendos më 7 mars 2026. Sipas planit, i gjithë kampusi parashihet të përfundojë brenda pesë vitesh.