Ministria e Arsimit dhe Shkencës është fajtore për dështimin e procesit arsimor në nivel shtetëror, ndërsa po rrezikon edhe vitin e ri shkollor, akuzojnë nga opozitarja Aleanca për Shqiptarët, duke theksuar se ministrja Milla Carovska e la arsimin pa infrastrukturën e duhur dhe pa plan për mësim nga distanca.
“Sot jemi në mes të qershorit dhe Ministria e Arsimit dhe Shkencës nuk merr asnjë hap në organizimin e shkollës nga shtatori në format siç i njohim në shkollë dhe jo në mësim në distancë. Nga ana tjetër nuk merr asnjë hap as për përmirësimin e as të infrastrukturës për mësim në distancë duke lënë në neglizhencë edhe krijimin e sistemit për menaxhim të arsimit por edhe krijimin e infrastrukturës”, deklaroi Azir Aliu – ASH.
Opozita shqiptare kërkon që nga shtatori nxënësit të rikthehen në bankat shkollore, por siç shtojnë, me mos vaksinimin e mësimdhënësve situata është e paqartë. Nga Ministria e Arsimit thonë se po bëjnë përpjekje për imunizim të arsimtarëve, por shtojnë se kjo nuk varet tyre.
“Ministria e Arsimit dhe Shkencës është në koordinim të vazhdueshëm me Ministrinë e Shëndetësisë dhe po bëhen përpjekje për vaksinimin të kuadrit arsimor. Të gjithë duam që nxënësit të kthehen në shkollë sepse e dimë që mësimi me prani fizike është në interes të fëmijëve , por ky vendim nuk varet nga MASH, por nga gjendja epidemiologjike dhe vlerësimet që jep Komisioni për Sëmundje Infektive”, thanë nga MASH-i.
Një Kërkesë tjetër e opozitares ASh është edhe anulimi i digjitalizimit të librave, pasi që siç thonë reformat për digjitalizimin e arsimit janë të përshpejtuara dhe kanë nevojë për përfshirje të gjerë të ekspertëve. Mirëpo nga kabineti i Ministres Carovska theksojnë se reforma në arsim fillor është sjell në konsultim me të gjitha palët e prekura, ndërsa sipas tyre, çdo anulim i reformës do të ishte dëm i drejtpërdrejt tek fëmijët.