A ka pasur ngacmime seksuale në ushtrinë e Maqedonisë? Për këtë temë kemi biseduar mbrëmë në Click Plus në TV21 me ministren e Mbrojtjes Sllavjanka Petrovska.
“Nëse diçka më vjen si informacion, qoftë me shkrim, qoftë me gojë, gjithmonë pa hezitim dhe njëkohësisht pa gjykuar, sepse nuk jam unë ajo, pa e kryer unë vetë hetimin, menjëherë e thërras shefin e Inteligjencës Ushtarake dhe e njoftoj për të gjitha informacionet që i kam marrë”, tha Sllavjanka Petrovska, ministre e Mbrojtjes.
Deputeti Dragan Kovaçki dje në seancën për çështjet e deputetëve i prezantoi indicet e këtilla. Ministrja thotë se informacioni duhet të kontrollohet, që burimi të mos jetë sërish i rremë, sikur ai se ka një haciendë, gjë që tashmë është në proces gjyqësor.
Petrovska po ashtu tha se Armata në të ardhmen do të pajiset me helikopterë dhe dronë të rinj.
“Shpresoj se gjatë nëntorit do të mund të prezantohen pozitat përfundimtare dhe të sjellim atë vendim. Por gjithashtu deri në fund të këtij viti do të fillojë në mënyrë formale procesi për blerjen e dronëve për shkak se është bërë analizë, shtabi gjeneral i Armatës në njësitë e tyre e bëri dhe përfundoi analizën e cila tregoi ku dhe në cilat segmente të mbrojtjes dronët mund të jenë të dobishëm”, pohoi Sllavjanka Petrovska, ministre e Mbrojtjes.
Pyetjes nëse mendon që të gjendet në listën e deputetëve në zgjedhjet e ardhshme parlamentare, Petrovska tha se ka shumë projekte që duhet realizuar në Ministrinë e mbrojtjes.
“Unë sinqerisht kam planifikuar edhe shumë projekte, kjo që u bë deri më tani është vetëm një pjesë. Megjithatë ka shumë projekte për të cilët mendoj se ka hapësirë dhe do të realizohen në Ministrinë e mbrojtjes dhe Armatë në mandatin tim të ardhshëm si ministre e mbrojtjes”, tha Sllavjanka Petrovska, ministre e Mbrojtjes.
Modernizimi i armatës do të jetë fokusi kryesorë, theksoi Petrovska.