Kur do të vijë radha për të votuar shkarkimin e ministrave të Alternativës, deputeti i pavarur Skënder Rexhepi thotë se do ta shtyp butonin vetëm për shkarkimin e ministrit të Shëndetësisë Bekim Sali, por jo edhe për ish-bashkëpartiakët e tjerë, për të cilët në ClickPlus foli fjalë miradije.
“Po unë do të votoj shkarkimin e ministrit të Shëndetësisë, do të votoj pa asnjë dyshim sepse dëmi më i madh që ju bë strukturave të Alternativës është mungesa e kurajos politike të udhëheqësisë që ta shkarkojnë atë për të përfituar më tepër partia politike”, tha Skender Rexhepi, deputet i pavarur.
Sipas Rexhepit, për fajin e ministrit Sali pësoi edhe subjekti politik Alternativa edhe ministrat e tjerë të partisë.
“Ministrat e tjerë asnjëherë unë nuk votoj për t’i shkarkuar. -As ministrin Çupi?
-Jo, jo. Ato janë njerëz të cilët janë dëm kolateral në kuadër të Alternativës, i dy njerëzve të cilët kanë vendosur ta dëmtojnë Alternativën për shkak tyre. Unë nuk votoj shkarkimin e asnjë udhëheqësi, ministri apo zv/ministri të Alternativës, përveç Bekim Sali, ministrit të Shëndetësisë”, deklaroi Skender Rexhepi, deputet i pavarur.
Por rikonstruimit të kabinetit qeveritar po i shpëton zv/ministri i Kulturës, Daim Luçi, për të cilin Rexhepi deklaroi se ka 8 muaj që Alternativa e ka shkyçur nga partia.
“-Ai është nën protektoratin tuaj? -Jo s’është në asnjë rast. Është i pavarur në lëvizjen e tij, por unë konsideroj se është një djalë i ri që ka perspektivë politike dhe së paku atë që mundesha ta them ishte se ky njeri do të mbesë, unë jam pjesë e shumicës. -Po a e keni parë ndonjë listë që edhe ai është për shkarkim? -Jo, s’ mund të jetë ai për shkarkim sepse Alternativa e ka shkyçur atë para 8 muajve. -Qysh mbijetoi nëse nuk është nën protektoratin tuaj? -Sepse kam qenë unë!”, tha Skender Rexhepi, deputet i pavarur.
Deri në fund të javës pritet të votohet kabineti i ri qeveritar, për të cilën Rexhepi tha se do të japë mbështetjen e tij por jo pa kushte.