Edi Rama ia beson strategjinë e medias ish-kandidates së Vetëvendosjes, që vjen nga Maqedonia e Veriut

0

Kryeministri i Shqipërisë, Edi Rama, ia ka besuar këshillimin për çështjet e medias Vlerë Gjakovës, e cila e ka marrë zyrtarisht këtë detyrë para dy javësh. Kështu raporton Top Channel, duke iu referuar burimeve qeveritare.

Gjakova ka lindur në Maqedoninë e Veriut dhe për një periudhë të gjatë ka jetuar e vepruar në Kosovë. Në vitin 2018 iu bashkua Lëvizjes Vetëvendosje, ndërsa në zgjedhjet e vitit 2019 ishte kandidate për deputete nga kjo parti.

Top Channel raporton se shefja e kabinetit të kryeministrit, Vilma Guri, u ka dërguar një e-mail sekretarëve të përgjithshëm të ministrive, duke kërkuar që këshilltarët e medias të zhvillojnë takime me Gjakovën dhe t’i prezantojnë strategjitë e tyre të komunikimit.

Sipas profilit të saj në LinkedIn, Gjakova ka 18 vjet përvojë në strategjinë e medias dhe marrëdhëniet me publikun. Në të kaluarën ka punuar si zëdhënëse dhe përfaqësuese për marrëdhënie me publikun në EVN Maqedoni, si dhe ka bashkëpunuar me Komunën e Çairit, BIRN dhe organizata e kompani të tjera në rajon.

Në Bërvenicë deri në orën 11 kanë votuar 2.245 persona! Sallai: Jehona e votuesve është rritur për 4,71%

0

Deri në orën 11:00, në zgjedhjet e jashtëzakonshme për kryetar të Komunës së Bërvenicës kanë votuar gjithsej 2.245 qytetarë, njoftoi Nedime Sallai nga Komisioni Komunal i Zgjedhjeve, përcjell TV21. Sipas saj, pjesëmarrja është rritur për 4,71 pikë përqindjeje në krahasim me raundin e parë. Në të njëjtën periudhë kohore, në raundin e parë kishin votuar 1.480 qytetarë, ndërsa në raundin e dytë numri ka arritur në 2.245. Dalja më e lartë është regjistruar në vendvotimin 2044 në Stençë, me 22,12%, ndërsa më e ulëta në vendvotimin 2047 në Tenovë, me 5,33%.

“Bashkë me KSHZ-në, sot kemi qenë në terren dhe të gjitha vendvotimet janë hapur me kohë. Nuk ka pasur pengesa gjatë procesit të votimit. Sa u përket kundërshtimeve, deri më tani është paraqitur vetëm një kundërshtim, i cili është miratuar. Që nga mëngjesi, KSHZ-ja ka vënë në funksion një linjë telefonike pa pagesë, ku qytetarët mund të paraqesin ankesa dhe të informohen për të drejtën e votës. Gjithashtu, është në dispozicion edhe shërbimi në gjuhën e shenjave”, shtoi Sallai.

Kontroll në një lokal në Karposh, të miturit kapen në gjendje të dehur!

0

Policia ka kryer sot një kontroll në një objekt hotelierik në territorin e komunës së Karposhit, në Shkup, pas informacioneve se aty u shërbehej alkool personave të mitur.

Sipas njoftimit të MPB-së, gjatë kontrollit janë gjetur të mitur në gjendje të dehur. Tetë persona janë shoqëruar në Stacionin Policor të Karposhit, ndërsa testimi me alkooltest ka konfirmuar praninë e alkoolit në organizmin e të gjithëve.

Një person që ndodhej në lokal është dërguar në Klinikën e Toksikologjisë në kompleksin klinik “Nëna Terezë”, për marrjen e ndihmës mjekësore.

“Pas dokumentimit të plotë të rastit, do të parashtrohet kallëzim përkatës në bazë të nenit 204 të Kodit Penal – ‘Shërbimi i pijeve alkoolike personave të mitur’”, thuhet në njoftimin e Policisë.

Dy persona arrestohen në Gostivar, sekuestrohen kokainë dhe marihuanë

0

Dy persona nga Gostivari, të moshës 42 dhe 48 vjeç, janë arrestuar sot gjatë një aksioni policor kundër tregtisë së paligjshme me drogë.

Sipas njoftimit të Policisë, ndërhyrja është realizuar në rrugën “Beliçica” në Gostivar, në momentin e një blerjeje-shitjeje të dyshuar të narkotikëve. Gjatë kontrollit te personat janë gjetur kokainë dhe marihuanë.

Me urdhër gjykate, policia ka kontrolluar edhe shtëpinë e njërit prej të arrestuarve, ku janë gjetur dhe sekuestruar edhe gjashtë paketime me kokainë, si dhe para në prerje të ndryshme.

“Dy personat janë ndaluar në stacionin policor për procedurë të mëtejshme, pas së cilës ndaj tyre do të parashtrohen kallëzimet përkatëse”, thuhet në njoftimin e Policisë.

Dy të arrestuarit do të përballen me procedurat e mëtejshme ligjore.

Goditën me molotov dhe sfera metalike policinë në Tiranë, arrestohen 6 persona

0

Gjashtë persona janë arrestuar pas akteve të dhunës gjatë protestës së mbajtur dje në Tiranë, njofton Policia e Shtetit. Mes të arrestuarve janë katër persona të moshës 18 deri në 38 vjeç, njëri prej tyre shtetas i huaj, si dhe dy të mitur.

Gjithashtu, tre persona janë proceduar penalisht, ndërsa dy të tjerë janë shpallur në kërkim. Gjatë kontrolleve, policia ka sekuestruar bomba molotov në posedim të dy prej të arrestuarve.

Në vijim të veprimeve hetimore dhe procedurale, të kryera nën drejtimin e Prokurorisë, për dokumentimin ligjor të akteve të dhunës gjatë tubimit të zhvilluar ditën e djeshme, u arrestuan shtetasit:

A. Sh., 26 vjeç, L. K., 18 vjeç, F. Ç., 38 vjeç, K. R., 35 vjeç (shtetas i huaj), si dhe 2 shtetas të mitur.

Gjithashtu, u proceduan penalisht 3 shtetas dhe u shpallën në kërkim 2 të tjerë.

Gjatë kontrolleve, shtetasve L. K. dhe A. Sh. iu gjetën dhe iu sekuestruan bomba molotov.

Specialistët për Hetimin e Krimit, në bashkëpunim me Prokurorinë, vijojnë veprimet për dokumentimin e plotë të veprimeve të kundërligjshme të kryera gjatë tubimit, identifikimin e shtetasve të tjerë të përfshirë dhe vënien e tyre përpara përgjegjësisë ligjore.

Materialet procedurale iu referuan Prokurorisë për veprat penale “Vrasja e punonjësit të Policisë”, e mbetur në tentativë, “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Kundërshtimi i punonjësit të Policisë së rendit publik”, “Shkelja e rregullave mbi lëndët plasëse dhe djegëse”, “Pengimi i qarkullimit të mjeteve të transportit”, “Shkatërrimi i pronës me zjarr” dhe “Mbajtja pa leje dhe prodhimi i armëve shpërthyese dhe i municionit”.

FBI: Koreja e Veriut qëndron pas vjedhjes rekord prej 6.3 miliardë dollarësh në Binance

0

Byroja Federale e Hetimeve e SHBA-së ( FBI ) tha të shtunën se Koreja e Veriut qëndronte pas sulmit kibernetik ndaj bursës së kriptomonedhave Binance, në të cilin u vodhën 6.3 miliardë dollarë fonde.

Në mënyrë specifike, FBI tha se hakerat nga grupi TraderTraitor, i cili mbështetet nga regjimi i Koresë së Veriut, ishin përgjegjës për sulmin kibernetik në shkallë të gjerë. Ajo vuri në dukje se zbuloi se anëtarët e këtij grupi u përpoqën të konvertonin fondet e vjedhura në kriptomonedhë ethereum, duke parashikuar se do të pasojnë veprime të ngjashme.

Ndërkohë, platforma Binance njoftoi se ka zëvendësuar 90% të fondeve të vjedhura . Pjesa e mbetur prej 10% ka të bëjë me asete dixhitale (tokena) me më pak likuiditet, që do të thotë se ato kërkojnë më shumë kohë për t’u marrë.

“Ne kemi zëvendësuar 90% të aseteve të vjedhura dhe jemi të përkushtuar të mbulojmë 10% të mbetura. Përdoruesit tanë nuk do ta mbajnë barrën financiare të këtij incidenti”, siguroi bashkë-CEO i Binance, Richard Teng.

Sulmi kibernetik konsiderohet nga ekspertët si vjedhja më e madhe e kriptomonedhave ndonjëherë . Hetimi paraprak tregoi se shkelja mund të ketë filluar nga një laptop i hakuar që i përkiste njërit prej inxhinierëve të platformës, duke u lejuar hakerëve të fitojnë akses në një nga sistemet e saj dhe të bëjnë tërheqje të paligjshme, sipas Binance.

“Gjenerata Z sundon”, mijëra të rinj protestuan në mbi 30 qytete gjermane! Regjistrohen incidente të izoluara

0

Mijëra të rinj dolën të shtunën në rrugët e më shumë se 30 qyteteve gjermane në kuadër të protestave me moton “Gjenerata Z sundon”, duke kërkuar përmirësimin e arsimit, kosto më të përballueshme të jetesës dhe më shumë pjesëmarrje në vendimmarrjen politike.

Demonstratat nisën kryesisht në mënyrë paqësore në qytete si Berlini, Mynihu, Hamburgu, Frankfurti, Këlni, Shtutgarti dhe Mainz.

Megjithatë, gjatë pasdites dhe mbrëmjes, në disa zona u regjistruan incidente, përplasje me forcat e rendit dhe dëmtime të pronës.

Në Berlin, pjesëmarrja rezultoi më e ulët se pritshmëritë e organizatorëve. Nga rreth 10 mijë protestues të parashikuar, sipas organizatorëve dhe policisë morën pjesë afërsisht 5 mijë persona. Protestat në kryeqytet vijuan kryesisht pa incidente serioze.

Situata u tensionua më shumë në Frankfurt, Hamburg, Këln dhe Shtutgart. Në Frankfurt, protestues të maskuar hodhën fishekzjarrë, shishe dhe objekte të tjera drejt policisë, ndërsa disa vitrina dyqanesh në rrugën tregtare “Zeil” u dëmtuan. Autoritetet raportuan edhe për disa policë të plagosur.

Në Hamburg, pas përfundimit zyrtar të demonstratës, grupe protestuesish ngritën barrikada, u vunë flakën objekteve në rrugë dhe hodhën gurë e shishe ndaj efektivëve. Policia ndërhyri me topa uji dhe spraj me piper për të kontrolluar situatën.

Ndërkohë, në Këln marshimi i planifikuar u anulua me marrëveshje mes organizatorëve dhe autoriteteve, por më vonë pati përplasje me policinë, e cila rrethoi qindra protestues. Edhe në Shtutgart dhe Frankfurt pati përdorim të piroteknikës dhe incidente të izoluara.

Pavarësisht përshkallëzimeve në disa qytete, shumica e protestave u zhvilluan paqësisht, me pjesëmarrësit që theksuan kërkesat për reforma në arsim, përmirësim të kushteve të jetesës dhe më shumë vëmendje ndaj shqetësimeve të të rinjve.

Protestat e “Gjeneratës Z” konsiderohen ndër mobilizimet më të mëdha të të rinjve në Gjermani gjatë muajve të fundit, duke tërhequr vëmendjen e politikës dhe opinionit publik në mbarë vendin.

Fidan: Pothuajse të gjitha vendet pajtohen se lufta e re mes SHBA-së dhe Iranit duhet shmangur

0

Ministri i Jashtëm i Turqisë, Hakan Fidan, ka deklaruar se gati të gjitha vendet e pranishme në tryezën e bisedimeve janë dakord që duhet shmangur një konflikt i ri midis Shteteve të Bashkuara dhe Iranit dhe se diplomacia duhet të ketë gjithmonë prioritet.

Fidan i bëri këto komente në një intervistë për mediat shtetërore turke, në anën e takimit të ministrave të Jashtëm të G20-së që po zhvillohet në Atlanta të shtetit të Xhorxhias në SHBA.

Sipas tij, mosmarrëveshja midis SHBA-së dhe Iranit, e cila ka çuar në mbylljen e ngushticës së Hormuzit, duhet zgjidhur sa më shpejt që të jetë e mundur, në mënyrë që rrugët kritike tregtare të rihapen.

“Ka një ndjenjë pritjeje dhe kureshtjeje se si do të zhvillohen bisedimet e vazhdueshme midis SHBA-së dhe Iranit dhe nëse do të lindë apo jo një konflikt i ri,” tha ministri turk.

Ai përfundoi duke theksuar se “praktikisht të gjitha vendet në tryezë janë dakord se një konflikt i ri duhet shmangur dhe se diplomacia duhet të ketë vazhdimisht një shans.”

Ngushtica e Hormuzit është një nga rrugët më të rëndësishme të transportit të naftës dhe gazit në botë. Mbyllja e saj ka shkaktuar shqetësime të mëdha për tregtinë ndërkombëtare dhe furnizimin me energji. Deklarata e Fidanit vjen në një moment të tensionuar në rajon, ku bisedimet diplomatike shihet si rruga kryesore për të shmangur përshkallëzimin e situatës.

Turqia, e cila ka mbajtur një pozicion të ekuilibruar në çështjet e Lindjes së Mesme, vazhdon të theksojë rëndësinë e dialogut dhe zgjidhjeve paqësore.

Deri në ora 9, në Bërvenicë kanë votuar 646 qytetarë! Rritet jehona e votuesve krahasuar me raundin e parë

0

Dalja në votime në raundin e dytë të zgjedhjeve të parakohshme për kryetar të Komunës së Bërvenicës deri në orën 09:00 është 3,98 për qind. Të drejtën e votës e kanë shfrytëzuar 646 qytetarë, njoftoi zëdhënësja e Komisionit Shtetëror të Zgjedhjeve (KSHZ), Radica Todorovska-Aleksovska, përcjell TV21. Sipas të dhënave të para të pranuara nga KSHZ-ja, dalja në votime është rritur për 1,52 pikë përqindjeje krahasuar me raundin e parë të zgjedhjeve, të mbajtur më 18 tetor. Në atë kohë, deri në orën 09:00 kishin votuar 400 qytetarë, përkatësisht 2,46 për qind e votuesve të regjistruar.

Dalja më e lartë deri në orën 09:00 është regjistruar në vendvotimin 2037, ku kanë votuar 8,7 për qind e votuesve, ndërsa dalja më e ulët është shënuar në vendvotimin 2048, me vetëm 1,25 për qind. Zëdhënësja e KSHZ-së bëri të ditur se votimi ka filluar në orën 07:00 dhe të gjitha vendvotimet janë hapur me kohë. Deri më tani, procesi zgjedhor po zhvillohet në atmosferë të qetë.

Në zgjedhjet e parakohshme për kryetar të Komunës së Bërvenicës, qytetarët zgjedhin mes dy kandidatëve. Të drejtë vote kanë gjithsej 16.256 qytetarë, të cilët votojnë në 24 vendvotime.

Nga KSHZ-ja rikujtojnë se edhe në raundin e dytë qytetarët mund të shfrytëzojnë linjën telefonike pa pagesë 0800 555 44, ku mund të marrin informacione për çështjet që lidhen me ushtrimin e të drejtës së votës.

Për personat me dëmtim të dëgjimit është në dispozicion numri telefonik 076 488 360, përmes të cilit mund të marrin informacione në gjuhën e shenjave përmes video-thirrjes. Nga Komisioni njoftuan se opinioni do të informohet rregullisht për rrjedhën e votimit dhe daljen në zgjedhje përmes konferencave për shtyp dhe komunikatave.

Konferenca e ardhshme për shtyp është paralajmëruar për në orën 11:30 në Bërvenicë, në ndërtesën e komunës, ku ndodhet edhe Komisioni Komunal Zgjedhor.

Kaká përlotet në “San Siro”, futet në “Hall of Fame” të Milanit para fitores në derbi ndaj Interit

0

Legjenda e Milanit dhe e Brazilit, Kaká, u përfshi në Sallën e Famës së klubit (AC Milan Hall of Fame), në një ceremoni të mbajtur para një stadiumi të mbushur plot me tifozë në “San Siro”, më 1 nëntor, para derbit të Serie A-së kundër Interit.

Kaká, i cili ka luajtur për Milanin nga viti 2003 deri në vitin 2009 dhe më pas nga viti 2013 deri në vitin 2014, është një nga futbollistët më të dekoruar në historinë e klubit. Gjatë periudhës së tij të parë me kuqezinjtë, ai fitoi titullin e Serie A-së, Ligën e Kampionëve dhe Topin e Artë.

Braziliani shënoi golin e tij të parë kundër Interit në tetor të vitit 2003, duke kontribuar në fitoren 3-2 të Milanit. Në një letër drejtuar tifozëve para ndeshjes, ai shkroi:

“ Të dashur tifozë të Milanit, derbi do të mbetet përgjithmonë i gdhendur në kujtesën time. Shënimi i golit tim të parë në këtë ndeshje ishte një ndjenjë vërtet e veçantë. Disa momente magjike nuk harrohen kurrë dhe disa dashuri nuk përfundojnë kurrë”.

Ai e përfundoi mesazhin me fjalët: “Forza Milan!”.

Gjatë pranimit të çmimit për përfshirjen në Sallën e Famës, Kaká u emocionua dukshëm nga pritja e ngrohtë dhe duartrokitjet e tifozëve kuqezi.

Në derbin e zhvilluar mes Milanit dhe Interit, kuqezinjtë triumfuan me rezultatin 3-1, duke vazhduar serinë pozitive ndaj rivalëve të qytetit në sezonin 2026/27 të Serie A-së.

Nën drejtimin e trajnerit Ruben Amorim, Milani ka regjistruar tashmë tetë ndeshje radhazi pa humbje ndaj Interit në të gjitha garat, me gjashtë fitore dhe dy barazime.

Milani kaloi në epërsi të dyfishtë që në dhjetë minutat e para. Christian Pulisic shënoi në minutën e katërt, ndërsa Adrien Rabiot realizoi golin e dytë në minutën e dhjetë. Të dy golat erdhën pas asistimeve të Diego Moreiras.

Interi ngushtoi epërsinë në minutën e 22-të përmes Alessandro Bastonit, i cili shënoi me kokë pas një harkimi të Manuel Akanjit.

Më pas, në minutën e 43-të, Moreira shënoi golin e tretë për Milanin, duke vulosur epërsinë e kuqezinjve para përfundimit të pjesës së parë.

Në pjesën e dytë, Interi pati vështirësi të krijonte raste të rrezikshme, pavarësisht 19 goditjeve drejt portës. Portieri i Milanit, Mike Maignan, bëri disa pritje vendimtare, duke ruajtur epërsinë dhe duke mos lejuar që rezultati të ndryshonte deri në fund.