Komuna e Tetovës ka nisur një aksion për inkasimin e detyrimeve të prapambetura nga tatimi në pronë dhe taksat e tjera komunale. Shuma e papaguar për dy vitet e fundit e kalon shifrën e 6 milionë eurove, ku sipas komunës, borxhlinjtë më të mëdhenj rezultojnë të jenë vetë qytetarët, por edhe një numër kompanish private. Shefi i Financave në Komunën e Tetovës, Nuredin Dehari, bën me dije se nëse detyrimet e prapambetura nuk shlyhen brenda javës, do të fillohet me procedurat e përmbarimit me qëllim grumbullimin e mjeteve dhe zhbllokimin e llogarisë së komunës.

“Borxhi total i kompanive dhe qytetarëve në komunën e Tetovës është 340 milionë denarë dhe pjesa më e madhe është nga qytetarët që i detyrohen komunës, për tatim në pronë. Pjesa tjetër tek kompanitë, pjesa më e madhe janë taksat e firmës dhe tatimet në pronë që kompanitë nuk kanë paguar detyrimet që kanë ndaj komunës. Si komunë kemi njoftuar qytetarët dhe kemi lëshuar vendime. Kemi bë njoftim edhe për ata që nuk kanë arritur t’i marrin vendimet në adresë të tyre që të paraqiten në komunë, ndërsa nga një tetori do fillojmë me procedurat për ata që nuk i kanë realizuar pagesat për vitet paraprake”, u shpreh Nuredin Dehari – shef i Financave në Komunën e Kërçovës.

Përveç tatimeve komunale, banorët i detyrohen mbi një milion euro edhe Ndërmarrjes Publike Komunale “Sharri” për dy vitet e fundit. Për dallim nga NPK “Tetova”, ndërmarrja “Sharri” nuk ka borxhe po funksionon me stabilitet financiar.

“Ndërmarrja për momentin nuk ka borxhe aktive, dhe siç e dini ndërmarrja është mbi 6 milion denarë plus për gjashtë mujorin e parë, por me pagesën e borxheve do investojmë dukshëm në infrastrukturën nëntokësore, pasi që problemet që i patëm me rrogat i tejkaluam dhe ndërmarrja mban veten me mjetet që mbledh, por lus qytetarët që i kanë borxh Ndërmarrjes të drejtohen në zyra tona t’i shlyejnë borxhet”, theksoi Valon Zeqiri – drejtor i NPK “Sharri”.

Sfidë më vete mbetet Ndërmarrja Publike Komunale “Tetova”, e cila vazhdon të ketë përqindje të ulët të inkasimit, ndonëse ka shënuar ulje të dukshme të borxhit publik. Gjatë vitit 2021, NPK “Tetova” kapte shifrën e rreth 10 milionë eurove borxh, ndërsa sot ky borxh është reduktuar në rreth 2.6 milionë euro. Për të mbështetur funksionimin e kësaj ndërmarrjeje dhe stabilizimin e saj, Komuna e Tetovës ka ndarë bllok-donacione të posaçme për mbulimin e pagave dhe kontributeve të punonjësve.

Gratë janë shumicë në sektorin publik, por burrat dominojnë postet drejtuese. 57,5% e të punësuarve në sektorin publik janë gra, por ato nuk kanë qasje të barabartë në vendimmarrje, kështu konstaton raporti i Entit Shtetëror të Revizionit, cili përfshin periudhën nga viti 2020 deri në vitin 2024. Revizioni konstaton mungesë politikash efektive për avancimin e grave në pozita udhëheqëse. Në Kuvend, gratë përbëjnë 39,2% të deputetëve, ndër përqindjet më të larta në rajon.

“Analiza e kryer tregon se kuota e përcaktuar me ligj për gjininë më pak të përfaqësuar ka ndikim në pjesëmarrjen e grave në Kuvend. Në periudhën 2007–2024, pjesëmarrja e grave deputete varion nga 30 deri në 43 përqind, ndërsa në vitin 2024 ishte 39,2 përqind. Me këtë përqindje, vendi ka përfaqësim më të lartë të grave në parlament se 83 përqind e vendeve anëtare të Bashkimit Evropian, ndërsa krahasuar me vendet e rajonit që nuk janë anëtare të BE-së, renditet në vendin e parë”, thonë nga Enti Shtetëror për Revizion.

Që nga pavarësia, asnjë grua nuk ka drejtuar Kuvendin e Maqedonisë së Veriut. Edhe në Qeveri, përfaqësimi i grave mbetet i ulët – vetëm 3 nga 20 ministra janë gra. Në postet e zëvendëskryeministrave, ndërkaq, nuk ka asnjë grua. Raporti thekson se ndryshe nga Kuvendi, në Qeveri nuk ka kuotë ligjore për balancë gjinore.

“Në periudhën nga viti 2014 deri në vitin 2024, pjesëmarrja e grave në Qeveri si ministre varion nga 14 deri në 31 përqind, si zëvendësministre nga 7 deri në 25 përqind, ndërsa si sekretare shtetërore nga 6 deri në 31 përqind. Në përbërjen e Qeverisë 2024–2028, nga 20 ministrat me resor, vetëm tre janë gra, përkatësisht 15 përqind, ndërsa nga pesë zëvendëskryeministrat nuk ka asnjë grua”, theksojnë nga Enti Shtetëror për Revizion.

Raporti i Revizionit tregon se rruga drejt barazisë gjinore në vendimmarrje ende përballet me pengesa institucionale dhe shoqërore. Mungesa e mekanizmave të qartë për emërime, monitorimi i pamjaftueshëm dhe gjuha e urrejtjes ndaj grave vazhdojnë të ndikojnë në përfaqësimin e tyre në pozitat drejtuese. Revizioni kërkon masa konkrete nga institucionet dhe partitë politike për të krijuar kushte të barabarta dhe një mjedis më të sigurt për gratë në jetën publike.

Kryeministri Hristijan Mickoski të premten do ta presë presidenten e Komisionit Evropian me çështjen rreth perspektivës evropiane të vendit, por edhe me propozimin që Bashkimi Evropian të përfshihet në bisedimet me Bullgarinë. Bisedimet e deritanishme me Sofjen zyrtare, sipas Mickoskit, nuk kanë pasur kurrfarë thelbi dhe, siç thotë ai, që argumentet të dëgjohen në mënyrë objektive, është logjike që në tryezën e bisedimeve të jetë i pranishëm edhe Bashkimi Evropian.

“Vlerësoj se, që të kemi ndonjë efekt, që të kemi thelb në ato bisedime, është mirë të ketë përfaqësues nga Komisioni Evropian, nga Bashkimi Evropian, që t’i dëgjojnë argumentet. Nëse argumentet tona nuk qëndrojnë, atëherë ne jemi të gatshëm t’i pranojmë argumentet e tjera, por le t’i dëgjojmë argumentet. Të flasim për kartat e vetë Bashkimit Evropian, të flasim për vlerat, të flasim për memorien institucionale, ne jemi të gatshëm. Jemi të gatshëm për të gjitha këto të ulemi dhe të bisedojmë dhe të gjejmë një mënyrë, aq sa është e nevojshme, derisa të arrijmë të gjejmë një mënyrë”, tha Mickoski

Mesazhet e von der Leyen që do t’i përcjellë të premten do të jenë të një rëndësie të veçantë, më së shumti për shkak të paralajmërimeve se së shpejti BE-ja duhet ta publikojë strategjinë e re evropiane, përkatësisht përshpejtimin e integrimit evropian për 4 vende, por jo edhe për Maqedoninë. Këtë informacion e publikoi “Politico”, por Mickoski thotë se nuk është i sigurt se vendi është përjashtuar nga ky proces.

“Pra, nuk e di, do të duhet ta pyesni Bashkimin Evropian. Nëse kjo është e saktë, tani unë nuk do ta komentoja atë që publikon një medium, supozoj se ai i referohet burimeve të caktuara nga Bashkimi Evropian. Do të duhet ta pyesim Bashkimin Evropian nëse kjo është së pari e saktë dhe, nëse është e saktë, pse është kështu. Edhe pse anëtarësimi në Bashkimin Evropian është një proces në të cilin kandidatët vlerësohen mbi bazën e meritave, atëherë për mua është e palogjikshme nëse kjo është e saktë. Por së pari duhet të shohim nëse është kështu apo nuk është. Informacionet e mia nuk thonë se është kështu”, deklaroi Mickoski.

Mickoski paraqitet si mbrojtës i interesave kombëtare, por e gjithë kjo është gënjeshtër, ai ka ndërtuar një mur rreth vendit, thotë kryetari i LSDM-së, Venko Filipçe.

Nuk kemi rrugë tjetër përveç rrugës drejt dhe në Evropë. Ajo që Hristijani ka ndërtuar një mur rreth vendit, paraqitet si mbrojtës i interesave kombëtare, kjo është vetëm një tjetër gënjeshtër e tij e madhe, sepse zhvillimi i vërtetë, përparimi, sistemi, mirëqenia e qytetarëve janë jashtë këtij muri që ai ka ndërtuar. Ndërsa këtu çfarë kemi, këtu kemi vetëm ujë të ndotur me fekale, për të cilin ai nuk kujdeset!, tha Filipçe.

Von der Leyen e fillon vizitën rajonale nga nesër, me ç’rast do t’i vizitojë Tiranën, ndërsa të enjten do të mbërrijë në Prishtinë dhe Podgoricë, pas së cilës të premten do të jetë në Shkup.