Elezi: Qeveria stabile, por ka bisedime me eksponentë të opozitës! Pollozhani: Nuk ka mosmarrëveshje në AKI, VLEN defokuson opinionin

By
Xhumadije Ibrahimi
-
0

Zërat për lëvizje të mundshme politike rikthejnë përplasjet mes VLEN-it dhe AKI-së. Amir Elezi nga VLEN thotë se Qeveria për momentin është stabile dhe nuk ka nevojë për zgjerim të koalicionit. Megjithatë, nuk e përjashton mundësinë për zgjerim të koalicionit, sipas tij, VLEN-i është i hapur për bisedime nëse ka interes nga eksponentë të opozitës për t’iu bashkuar koalicionit. Elezi konfirmon se tashmë ka bisedime në nivele të ndryshme.

“Ajo që vlen të thuhet është se momentalisht qeveria është stabile, nuk kemi nevojë, mirëpo nëse gjykon VLEN-i dhe, ka dëshirë edhe nga eksponentë të opozitës të bëhen pjesë e koalicionit tonë, në frymën e mbarëvajtjes së proceseve, ne jemi të hapur që të bisedojmë. Ajo që jam i sigurt është se ka bisedime në nivele të ndryshme dhe jam i sigurt”, tha amir Elezi.

Qëndrimet e Elezit i hedh posht Faton Pollozhani nga AKI, i cili thotë se bashkëpunimi brenda koalicionit është në nivelin më të mirë dhe më korrekt. Pollozhani njofoi se në Bërvenicë AKI garon e bashkuar, ndërkohë, akuzoi VLEN-in se po tenton të paraqesë mungesë koordinimi në opozitë.

“Ne flasim me përgjegjësi dhe seriozitet. Deri në momentin që ne flasim, bashkëpunimi në koalicionin AKI është në nivelet më të mira dhe më korrekte dhe ne kemi një sfidë elektorale në Komunën e Bërvenicës, ku garojmë si AKI dhe këtu nuk ka asnjë dilemë mes partive opozitare. Ajo që mundohen përfaqësues të VLEN-it ta nxjerrin si një lloj moskoordinimi, mendoj se gjërat janë të qarta në bllokun opozitar”, tha Faton Pollozhani.

Pollozhani theksoi se pas përfundimit të riorganizimit të brendshëm, BDI është e gatshme për zgjedhje. Sipas tij, zgjedhjet janë të nevojshme për t’ia kthyer legjitimitetin qytetarëve dhe që ata të përcaktojnë subjektin që do t’i përfaqësojë shqiptarët në Qeveri. Elezi nga VLEN tha se pas fitores në zgjedhjet lokale, ku u mposht BDI, tani janë të gatshëm dhe të bindur edhe në fitore të tjera kurdo që të jenë ato.

Mickoski: Nesër do të hapet konvikti studentor i rinovuar “Stiv Naumov”

By
Desk
-
0

Kryeministri Hristijan Mickoski paralajmëroi se nesër do të hapet konvikti studentor i rikonstruuar “Stiv Naumov” në Shkup, i cili do të jetë një objekt modern me kushte bashkëkohore për akomodimin e studentëve. Së shpejti, tha ai, pritet edhe hapja e konviktit “Kuzman Josifovski-Pitu” në Shkup. Të dy janë rinovuar për gati dy vjet në kuadër të planit për rikonstruim me faza të të gjitha konvikteve studentore në vend.

“Shumë shpejt do të ketë një konvikt të dytë studentor “Kuzman”, por edhe të gjitha konviktet studentore dhe të nxënësve dhe procesi i rikonstruimit dhe rinovimit të tyre tashmë ka filluar. Diçka që nuk është bërë me dekada. Ka shumë gjëra që duhen bërë. Prioritet pas prioriteti, një nga një, po i zgjidhim ato prioritete”, tha Mickoski.

Kryeministri potencoi se në infrastrukturën arsimore Qeveria ka investuar më shumë se 90 milionë euro në 26-27 muajt e fundit, nga të cilat, tha ai, gjysma janë drejtpërdrejt nga Ministria e Arsimit dhe Shkencës në fushën e konvikteve studentore.

“Dhe afërsisht 45 milionë euro të tjera përmes programit AA, gjegjësisht përmes projektit të decentralizimit të mjeteve nga buxheti qendror në komuna, janë të destinuara për projekte në arsim, rikonstruim të shkollave fillore dhe të mesme. Investimet janë të mëdha dhe ky është një prioritet i kësaj Qeverie”, deklaroi Mickoski, duke u përgjigjur në pyetjen e gazetarëve pas promovimit të projektit kapital të SHA EMV për fazën e tretë të rivitalizimit të hidrocentraleve.

Arrestohet 60-vjeçari pasi dyshohet se i mori me dhunë paratë një personi

By
Desk
-
0

Një 60-vjeçar nga Koçani është privuar nga liria pasi dyshohet se në mënyrë të dhunshme i ka marrë paratë një 54-vjeçari, menjëherë pasi ky i fundit i kishte tërhequr nga bankomati.

Rasti ka ndodhur më 28 shtator 2026, rreth orës 17:15, në Koçan. Sipas njoftimit të policisë, nëpunës policorë të Njësisë Policore në Koçan e kanë ndaluar M.Gj. (60), nga Koçani.

Dyshohet se M.Gj. ia ka marrë me dhunë paratë D.M. (54), po ashtu nga Koçani, pasi ky i fundit i kishte tërhequr paratë nga një bankomat në afërsi të stacionit të autobusëve në Koçan.

Për rastin është njoftuar prokurori publik. Nga policia bëjnë të ditur se pas dokumentimit të plotë të rastit do të vijojë kallëzimi përkatës.

Studimi: Pagjumësia rrit rrezikun për goditje në tru, demencë dhe depresion

By
Desk
-
0

Pagjumësia mund të jetë e lidhur me një rrezik më të lartë për goditje në tru, demencë, depresion dhe probleme të tjera serioze shëndetësore, sipas një studimi të ri që ka analizuar rreth 20 studime të mëparshme, me miliona pjesëmarrës në vende të ndryshme të botës.

Hulumtues nga Austria, Gjermania, Italia dhe Zvicra kanë shqyrtuar një numër të madh studimesh për të vlerësuar ndikimin që pagjumësia mund të ketë në shëndetin fizik dhe mendor, raportoi “ABC News”.

Studimi, i publikuar në revistën shkencore “Sleep Medicine Reviews”, ka zbuluar se personat që vuajnë nga pagjumësia kanë 26 për qind më shumë rrezik për goditje në tru krahasuar me personat që nuk raportojnë probleme të tilla me gjumin.

Analiza tregoi gjithashtu lidhje mes pagjumësisë dhe problemeve të shëndetit mendor. Personat me pagjumësi rezultuan më të prirur për të përjetuar depresion dhe për të tentuar vetëvrasjen.

Pagjumësia është çrregullimi më i zakonshëm i gjumit dhe karakterizohet nga vështirësia për të rënë në gjumë ose për të pasur gjumë cilëso

Studiuesit gjetën gjithashtu një lidhje mes pagjumësisë dhe demencës, përfshirë sëmundjen e Alzheimerit.

Gjumi luan rol të rëndësishëm në proceset e trurit, përfshirë largimin e disa produkteve të mbetjeve që grumbullohen gjatë ditës dhe që janë lidhur me dëmtimin e funksioneve të trurit dhe sëmundjen e Alzheimerit.

Ekspertët shpjegojnë se mungesa e gjumit cilësor mund të ndikojë në këto procese.

“Kur fle, truri largon mbetjet”, shpjegon mjekja e specializuar në mjekësinë e gjumit, Thanuja Hamilton.

Sipas saj, mungesa e gjumit të mjaftueshëm ose cilësor mund të favorizojë grumbullimin e këtyre produkteve dhe, në perspektivë, të lidhet me rrezik më të madh për probleme të trurit.

Studimi raportoi gjithashtu se personat me pagjumësi kishin rreth 30 për qind më shumë gjasa për t’u shtruar në spital, për arsye të ndryshme shëndetësore.

Ekspertët theksojnë se marrëdhënia mes pagjumësisë, ankthit dhe depresionit mund të jetë komplekse.

Ankthi ose depresioni mund ta bëjnë më të vështirë rënien në gjumë. Në të njëjtën kohë, gjumi i dobët mund të rrisë ndjeshmërinë ndaj stresit, nervozizmin dhe simptomat e ankthit e depresionit.

“Kur nuk fle mirë, je më i irrituar, më i shqetësuar dhe më pak rezistent ndaj stresit”, tha Hamilton, duke shtuar se kjo mund ta bëjë një person më të cenueshëm ndaj ankthit dhe depresionit.

Studiuesit, megjithatë, paralajmërojnë se rezultatet nuk dëshmojnë se pagjumësia shkakton drejtpërdrejt goditje në tru, demencë, depresion apo probleme të tjera të analizuara.

“Rritja e rrezikut në nivelin e popullsisë nuk do të thotë se një individ me pagjumësi do të zhvillojë demencë, depresion ose do të pësojë goditje në tru”, tha Stefan Seidel, një nga autorët e studimit dhe profesor i neurologjisë në Universitetin Mjekësor të Vjenës.

Sipas tij, gjetjet janë një tjetër arsye për t’i marrë seriozisht problemet e vazhdueshme me gjumin, për të identifikuar shkaqet e mundshme dhe për të kërkuar trajtim të bazuar në prova shkencore kur është e nevojshme.

Çfarë mund të bëhet për të përmirësuar gjumin?

Ekspertët rekomandojnë disa zakone të thjeshta që mund të ndihmojnë në përmirësimin e cilësisë së gjumit.

Një prej më të rëndësishmeve është mbajtja e një orari të rregullt të gjumit. Sipas specialistëve, ritmi cirkadian, ose “ora e brendshme” e trupit, funksionon më mirë kur orari i gjumit dhe zgjimit është i qëndrueshëm.

Po ashtu, këshillohet që televizori dhe telefoni të fiken rreth 30 deri në 60 minuta para gjumit.

Konsumimi i kafesë dhe alkoolit në orët e vona gjithashtu duhet shmangur.

Ekspertët theksojnë se problemet me gjumin nuk duhet të konsiderohen thjesht si një shqetësim i përkohshëm, veçanërisht kur ato vazhdojnë për një periudhë të gjatë.

“Gjumi duhet të jetë pjesë e bisedës me mjekun kur flasim për shëndetin, në çdo moshë”, tha Luca Vignatelli, autori kryesor i studimit dhe studiues i lartë në Institutin e Shkencave Neurologjike IRCCS në Bolonjë.

Sipas studiuesve, rritja e ndërgjegjësimit për pagjumësinë dhe trajtimin e saj mund të ndihmojë që problemet e gjumit të identifikohen dhe të trajtohen më herët.

Komisioni Evropian propozon kufizimin e të drejtave për anëtarët e ardhshëm të BE-së

By
Desk
-
0

Komisioni Evropian do të propozojë kufizimin e disa të drejtave për anëtarët e ardhshëm të Bashkimit Evropian (BE), si dhe kalimin në vendimmarrje me shumicë të kualifikuar, në vend të unanimitetit, në një numër fushash, përfshirë edhe zgjerimin.

Këto janë elementet kryesore të strategjisë për zgjerimin që KE-ja do ta miratojë dhe publikojë më 7 tetor.

Qëllimi i këtyre dy propozimeve është që pranimi i anëtarëve të rinj të mos e vështirësojë edhe më tej procesin tashmë të komplikuar të vendimmarrjes brenda bllokut evropian.

KE-ja në strategji do të theksojë se zgjerimi duhet të përgatitet mirë, për përfitim të ndërsjellë. Nga njëra anë, kandidatët për anëtarësim duhet të jenë të gatshëm dhe të përmbushin kushte të rrepta, ndërsa nga ana tjetër, edhe BE-ja duhet të jetë institucionalisht, financiarisht dhe politikisht e gatshme që të mbetet funksionale edhe pas zgjerimit.

Sipas draftit të dokumentit, në të cilin ka pasur qasje Radio Evropa e Lirë (REL), mekanizmat për anëtarët e ardhshëm, që po përgatit Komisioni, do të synonin kufizimin e mundësisë për bllokimin e vendimeve gjatë viteve të para të anëtarësimit, ndërsa shtetet anëtare ekzistuese do të kishin në dispozicion instrumente për të reaguar nëse anëtaret e reja, pas anëtarësimit, devijojnë nga detyrimet e marra përsipër.

Anëtarët e ardhshëm pa të drejtë vetoje

Elementi më i ndjeshëm i draftit ka të bëjë me kufizimin e së drejtës së vetos, që në dokument quhet në mënyrë simbolike “detyrim i përkohshëm lidhur me vendimmarrjen në Këshillin e BE-së dhe Këshillin Evropian”.

Sipas këtij propozimi, anëtarët e ardhshëm do të zotoheshin të mos kundërshtonin vendimet e Këshillit në fushat në të cilat kërkohet unanimitet.

Ky propozim do të zbatohej për çështjet institucionale dhe çështjet që lidhen me zgjerimet e ardhshme.

Në këmbim, siç thuhet në draft, institucionet evropiane do të angazhoheshin për të gjetur një zgjidhje të kënaqshme kur një anëtar i ri t’i referohej interesave thelbësore kombëtare.

Marrëveshjet e reja, sipas burimeve të REL-it të njohura me përmbajtjen e dokumentit, do të përfshiheshin në një deklaratë të përbashkët që do t’i bashkëngjitej Traktatit të Anëtarësimit. Deklarata do të miratohej para Traktatit të Anëtarësimit.

Klauzolat mbrojtëse

Përveç mekanizmave ekzistues që kanë vlejtur për anëtaret e mëparshme, KE-ja do të propozojë shtimin e dy mekanizmave të rinj, që lidhen me çështjet financiare dhe institucionale.

Mekanizmi financiar mbrojtës do t’i mundësonte KE-së që, për një periudhë të kufizuar pas anëtarësimit, të propozojë masa proporcionale nëse ka prova të qarta ose rrezik serioz se mangësitë në sundimin e ligjit po rrezikojnë menaxhimin financiar të buxhetit të BE-së ose mbrojtjen e interesave të tij financiare.

Klauzola institucionale do të zbatohej në rast të një “shkeljeje veçanërisht të rëndë”, kur Këshilli i BE-së do të mund të miratonte masa të përshtatshme dhe proporcionale, përfshirë pezullimin e përkohshëm të disa të drejtave që rrjedhin nga anëtarësimi.

Komisioni, përmes këtij dokumenti, do të paralajmërojë gjithashtu forcimin e masave në rast të përkeqësimit të sundimit të ligjit, demokracisë dhe të drejtave themelore pas përfundimit të negociatave të anëtarësimit.

Ndryshime të propozuara edhe në institucionet e BE-së

Duket se anëtarësimi në BE nuk do të nënkuptojë që anëtaret e ardhshme do të kenë automatikisht edhe komisionarët e tyre, pasi sipas propozimit të ri kjo nuk do të vlejë as për anëtarët ekzistues.

Komisioni, në fakt, propozon që numri i komisionarëve, i cili aktualisht korrespondon me numrin e shteteve anëtare, të reduktohet në dy të tretat e numrit të shteteve anëtare, me rotacion rreptësisht të barabartë.

Komisioni mbështet gjithashtu zbatimin më të gjerë të votimit me shumicë të cilësuar, si dhe bashkëpunimin e shtuar të një grupi shtetesh kur nuk ka unanimitet.

Drafti, ndër të tjera, propozon që vendimmarrja me shumicë të cilësuar të zbatohet në hapat ndërmjetës të procesit të zgjerimit, siç janë hapja dhe mbyllja e kapitujve, ndërsa unanimiteti do të vlente vetëm për vendimin përfundimtar për pranimin e një anëtareje të ardhshme në BE./rel

Putin firmos dekretin e ri, ushtria ruse shtohet me 15,500 trupa

By
Desk
-
0
Russian President Vladimir Putin speaks during a meeting with government officials via video conference at the Novo-Ogaryovo residence outside Moscow, Russia, Monday, March 22, 2021. Photo: Ap via RSS

Presidenti rus Vladimir Putin ka firmosur një dekret për rritjen e numrit të personelit të ushtrisë ruse me 15,500 trupa. Ky është urdhri i katërt i këtij lloji i firmosur nga Putin gjatë këtij viti.

Sipas dekretit, numri i përgjithshëm i personelit të Forcave të Armatosura të Rusisë do të arrijë në 2,441,630 persona, nga të cilët 1,550,500 do të jenë personel ushtarak.

Putin kishte firmosur më herët gjatë këtij viti edhe tre dekrete të tjera, në muajt mars, qershor dhe korrik. Në total, që nga muaji mars, numri i personelit ushtarak rus është rritur me 47,860 trupa. Presidenti rus nuk ka dhënë një arsye të drejtpërdrejtë për këtë vendim. Rritja e numrit të ushtrisë vjen në një kohë kur lufta në Ukrainë vazhdon dhe të dyja palët kanë pësuar humbje të mëdha.

Përparimi i forcave ruse në fushën e betejës është ngadalësuar këtë vit. Përdorimi i gjerë i dronëve nga të dyja palët e ka bërë më të vështirë lëvizjen e formacioneve të mëdha ushtarake. Ndërkohë, në javët e fundit janë raportuar edhe përparime të forcave ukrainase në disa pjesë të frontit.

Rusia kreu mobilizimin e fundit të pjesshëm në shtator të vitit 2022, pas disa humbjeve në fushën e betejës. Dekreti i atëhershëm për mobilizimin mbetet ende në fuqi.

Prej muajsh ka pasur spekulime për një mobilizim të ri në Rusi. Në gusht, shërbimet ukrainase të inteligjencës pretenduan se Moska synon të rekrutojë deri në 300 mijë persona gjatë këtij viti për t’i dërguar në front, si dhe një numër të ngjashëm vitin e ardhshëm.

Disa analistë kanë parashikuar gjithashtu mundësinë e një vale të re mobilizimi, duke iu referuar masave të marra nga autoritetet ruse për rritjen e rekrutimit. Megjithatë, Putin i ka hedhur poshtë këto pretendime, duke i cilësuar si “marrëzi të plotë”. Kremlini ka deklaruar se nevojat e ushtrisë po mbulohen përmes ushtarëve me kontratë dhe vullnetarëve.

Presidenti ukrainas Volodymyr Zelensky ka reaguar ndaj dekretit të ri të Putinit, duke thënë se Rusia tashmë ka nisur një proces shtesë rekrutimi dhe po përdor mënyra të ndryshme për të rritur numrin e ushtarëve.

Zelensky tha gjithashtu se Ukraina ka të dhëna të reja sipas të cilave Koreja e Veriut po përgatitet të dërgojë rreth 10 mijë ushtarë të tjerë në Rusi, përveç rreth 8 mijë trupave që, sipas tij, ndodhen tashmë atje. Pretendimet për rekrutimin e ushtarëve nga vende të tjera dhe për përgatitjet për mobilizim të ri vijnë në një kohë kur Rusia po përpiqet të ruajë numrin e forcave të saj në front, ndërsa lufta në Ukrainë vazhdon.

Argjentina kërcënon Britaninë për ishujt Falkland

By
Desk
-
0

Presidenti i Argjentinës, Javier Milei, ka kërcënuar se do të nisë një proces gjyqësor kundër qeverisë britanike, nëse ajo nuk ndalon punimet për kërkimin e naftës në brigjet e Ishujve Falkland.

Në një postim në rrjetet sociale, Milei i ka dhënë një afat prej dy javësh projektit “Sea Lion” të fushës së naftës, një sipërmarrje e përbashkët mes kompanive izraelite dhe britanike, që të anulohet.

Kompanitë këmbëngulin se kanë licenca të vlefshme të lëshuara nga Britania.

Komentet e tij rrisin tensionet mes Mbretërisë së Bashkuar dhe Argjentinës lidhur me sovranitetin mbi arkipelagun, të njohur në Argjentinë si “Las Malvinas”, më shumë se 40 vjet pasi një forcë ushtarake britanike dëboi trupat argjentinase që kishin pushtuar territorin në vitin 1982.

Milei ka thënë se, nëse afati prej dy javësh nuk respektohet, ai kishte “udhëzuar ministrinë e Jashtme dhe ekipet ligjore që të nisin arbitrazh ndërkombëtar” kundër Mbretërisë së Bashkuar, lidhur me atë që ai e ka quajtur “plaçkitjen e paligjshme të burimeve tona përmes Projektit Sea Lion”.

Ai ka paralajmëruar Mbretërinë e Bashkuar se, nëse “shfrytëzimi i paligjshëm” i rajonit nuk përfundonte brenda dy javësh, Argjentina do ta çonte çështjen përpara Tribunalit Ndërkombëtar për të Drejtën e Detit.

Tribunali Ndërkombëtar është një organ i pavarur gjyqësor me seli në Hamburg, i cili është përgjegjës për zbatimin e drejtë të Konventës së Kombeve të Bashkuara për të Drejtën e Detit.

Kjo lëvizje vjen menjëherë pasi Milei kritikoi ashpër OKB-në në fjalimin e tij në Asamblenë e Përgjithshme, për dështimin e saj për të vepruar lidhur me sovranitetin e Ishujve Falkland.

Ai ka thënë se OKB-ja ishte shndërruar në “një organizatë të padobishme” që u shërben vetëm “parazitëve arrogantë të veshur si burokratë me qëllime të mira”.

Që atëherë, sekretari britanik i Mbrojtjes, Wes Streeting, ka thënë se Argjentina “nuk ka aftësinë” t’i rimarrë ishujt me forcë.

Milei kishte thënë më parë se fusha e naftës Sea Lion përbënte “një rrezik të qartë dhe të menjëhershëm”.

Fusha e naftës Sea Lion, rreth 209 kilometra larg Ishujve Falkland, përmban rreth 1.7 miliardë fuçi naftë, sipas vlerësimeve.

Dy kompani nafte, britanikja Rockhopper Exploration dhe izraelitja Navitas Petroleum, pritet të fillojnë nxjerrjen e naftës nga fusha brenda dy viteve.

Në një referendum të vitit 2013, banorët e ishujve votuan me shumicë dërrmuese për të mbetur territor britanik përtejdetar, 99.8% votuan pro, ndërsa vetëm tre persona votuan kundër.

Forcat argjentinase kanë zbarkuar në Falklande në vitin 1982 për të paraqitur pretendimin territorial, duke shkaktuar një luftë 74-ditore për territorin, gjatë së cilës një forcë ushtarake britanike i dëboi ato.

Konflikti ka shkaktuar vdekjen e 255 ushtarakëve britanikë, tre banorëve të ishujve dhe 649 ushtarakëve argjentinas.

Rita Ora kalon testin e vozitjes

By
Desk
-
0

Ylli i muzikës pop, Rita Ora, ka kaluar testin e vozitjes pasi ka marrë mësime për më shumë se një dekadë.

Këngëtarja 35-vjeçare ka marrë mësime për vite me radhë dhe tani ka konfirmuar se ka marrë zyrtarisht patentë shoferin, duke publikuar një fotografi ku shihet duke mbajtur certifikatën e re dhe duke pozuar pranë veturës së autoshkollës “Dollar Driving School” në Los Angeles.

Rita publikoi një seri fotografish nga ditët e fundit në Instagram dhe shkroi: “Ka qenë një javë”.

Këngëtarja u fotografua për herë të parë duke marrë mësime për vozitje në vitin 2014, pasi i dashuri i saj i atëhershëm, DJ Calvin Harris, thuhet se i kishte blerë një veturë në vlerë prej 100 mijë funtesh për ta inkurajuar që të mësonte të voziste, pasi ata ishin zhvendosur për të jetuar së bashku në Los Angeles.

Një burim i kishte thënë në atë kohë gazetës The Sun: “Rita nuk ka pasur kurrë nevojë të shqetësohej për mënyrën se si do të lëvizte – me taksi, metro apo në këmbë. Në LA nuk funksionon kështu. Nëse nuk ke veturë, është e pamundur të bësh pothuajse asgjë. Ajo nuk dëshiron të jetë e varur nga Calvini, për të qenë ai që drejton veturën.”

Megjithatë, Ritës iu desh të priste edhe 12 vjet për ta kaluar testin.

Rita u nda nga Calvini në vitin 2014 dhe tani është e martuar me regjisorin Taika Waititi.

Këngëtarja së fundmi zbuloi se shpreson të krijojë familje me bashkëshortin e saj, i cili tashmë ka dy fëmijë, Te Hinekahu, 14 vjeç, dhe Matewa Kiritapu, 10 vjeç, me ish-bashkëshorten Chelsea Winstanley. Rita tregoi se i kishte ngrirë vezët kur ishte në mesin e të 20-ave.
Rita i tha revistës The Times: “Ai thotë: ‘Bravo që ke menduar përpara, vajzë’.”

Këngëtarja e hitit “Hot Right Now” fillimisht kishte frikë se do të ishte “e pamundur” të kishte një fëmijë me Taikan, pasi të dy janë gjithmonë shumë të zënë, por ajo ka marrë frymëzim nga ish-kryeministrja e Zelandës së Re, Jacinda Ardern, e cila u bë nënë e vajzës Neve në vitin 2018.

Kongresistë republikanë kërkojnë të mos i zgjatet licenca Industrisë së Naftës së Serbisë

By
Desk
-
0

Dy republikanë në Dhomën e Përfaqësuesve të Shteteve të Bashkuara i kanë bërë thirrje administratës së presidentit Donald Trump që t’i vazhdojë sanksionet ndaj Industrisë së Naftës së Serbisë (NIS), raportoi të hënën mediumi amerikan The Hill.

NIS-i është nën sanksione amerikane për shkak se shumica e pronësisë së saj është në duart e kompanive ruse.

Pronarët rusë gëzojnë 56.15 për qind të aksioneve, prej të cilave 44.85 për qind i përkasin kompanisë shtetërore Gazprom Neft.

Kongresistët republikanë Joe Wilson dhe Keith Self i dërguan të premten letër Departamentit amerikan të Thesarit, në të cilën kundërshtuan zgjatjen e lehtësimit nga sanksionet për NIS-in.

“Po ju shkruajmë për t’ju kërkuar me respekt që ta rishikoni zgjatjen e të gjitha licencave shtesë të përkohshme që do t’i mundësonin Industrisë së Naftës së Serbisë të vazhdojë punën, pavarësisht sanksioneve amerikane që lidhen me pronësinë e saj ruse”, thuhet në letër.

Letra i është drejtuar sekretarit amerikan të Thesarit, Scott Bessent.

NIS-i i kërkoi javën e kaluar Departamentit amerikan të Thesarit t’ia lëshojë një licencë të re, e cila do t’i mundësonte vazhdimin e punës.

Licenca e tanishme për NIS-in, e lëshuar nga Zyra për Kontrollin e Pasurive të Huaja (OFAC) në kuadër të Departamentit amerikan të Thesarit, skadon më 30 shtator.

Administrata amerikane vendosi sanksione ndaj NIS-it në fillim të vitit 2025, me qëllim për t’ia pamundësuar Rusisë përdorimin e të ardhurave nga sektori energjetik për luftën në Ukrainë.

Për më shumë se një vit, sanksionet janë shtyrë, ndërsa qëkurse kompania hungareze MOL u shfaq si blerëse e interesuar, licenca e OFAC-it për për veprimtarinë e NIS-it është rinovuar periodikisht.

NIS-i furnizon 80 për qind të nevojave energjetike të Serbisë, por është në pronësi shumicë të gjigantëve energjetikë rusë Gazprom Neft dhe Gazprom, të cilët janë nën sanksionet e SHBA-së.

Wilson dhe Self shprehin shqetësim se përjashtimet po i mundësojnë NIS-it që t’i zvarrisë negociatat për shitjen e aksioneve ruse në kompani.

Në janar, kompania hungareze MOL njoftoi se kishte arritur marrëveshje me Gazprom Neft për blerjen e aksioneve të tij në shumicë në NIS, por marrëveshja ende nuk është përmbyllur.

“Negociatat për marrëveshjen përfundimtare të blerjes janë ende duke vazhduar, ndërsa MOL-i i ka kërkuar departamentit tuaj miratim të mëtejshëm për vazhdimin e operimit, pavarësisht përparimit të kufizuar”, thanë kongresistët.

“Për më tepër, Serbia vazhdon të mbajë lidhje të ngushta politike dhe ekonomike me Rusinë dhe, ndryshe nga shumica e vendeve evropiane, nuk ka vendosur sanksione ndaj Moskës pas pushtimit e Ukrainës në shkurt të vitit 2022”, shtuan ata.

Për shkak të lidhjeve mes Serbisë dhe Rusisë, shqetësime janë shprehur edhe në Kongresin amerikan.

Gjatë një debati në mesin e shtatorit në Kongres, u shpreh shqetësim dypartiak për marrëdhëniet e Serbisë me Rusinë dhe Kinën, ndërsa u ngritën edhe pyetje nëse, në kuadër të Dialogut Strategjik SHBA-Serbi, është diskutuar për “ndikimin keqdashës” të Moskës dhe Pekinit./REL

Moti sot në Maqedoni

By
Desk
-
0

Moti do të jetë i ndryshueshëm me vranësira dhe periudha me diell. Në pjesët juglindore do të ketë kushte për reshje të dobëta shiu. Do të fryjë erë e dobët deri mesatare nga drejtimi verilindor.

Temperatura maksimale do të jetë nga 19 deri në 26°C.

Në Shkup, moti do të jetë i ndryshueshëm me vranësira dhe periudha me diell. Do të fryjë erë e dobët deri mesatare nga drejtime të ndryshueshme. Temperatura maksimale do të arrijë deri në 25°C

1...353637...13,364Page 36 of 13,364