ASh vendosi për të hyrë në Qeveri. Resorët me të cilët do të drejtojë tashmë janë përcaktuar.
“Domethënë dy ministri janë të sigurta e Shëndetësisë dhe e Drejtësisë dhe e treta do të jetë ose për zv/kryeministër për çështje ekonomike ose resori MShIA. Zëvendësministrat që i takojnë ASh-së janë zv/ministri i Mbrojtjes dhe i Bujqësisë”, tha Arben Taravari, kryetar i ASH-së.
Por cilat janë emrat të cilët do të drejtojnë me këto dikastere? Jozyrtarisht TV21 mëson se ministri i Shëndetësisë Bekim Sali do të zëvendësohet me Fatmir Mexhitin, ai i drejtësisë Nikolla Tupançevski me Krenar Llogën, vendin e zv/ministrit të Mbrojtjes Bashkim Asani pritet ta zërë Tiron Jajaga.
Ilmi Aziri nga ASh do të vijë në pozitën e zv/kryeministrit për Ekonomi, por ky opsion është vetëm nëse Alternativa qëndron në Qeveri. E nëse del, ASh në vend të këtij dikasteri do ta marrë Ministrinë e Administratës dhe Shoqërisë Informatike. Jozyrtarisht flitet se Ministria e Mjedisit të cilën e drejton BDI do të kalojë nën udhëheqje të LSDM-së.
Lidhja Socialdemokrate ka shpresa të mëdha tek Aleanca për Shqiptarët. Thonë se me partnerin e ri do ta luftojnë korrupsionin e do të avancohet sundimi i ligjit.
“Shumica qeverisëse e zgjeruar do të përkujdeset që askush mos të mbetet vetë këtë dimër dhe ripërtërirja e ekonomisë të nisë që këtë vit. Po krijohen kushte për avancimin e sundimit të së drejtës dhe luftës kundër korrupsionit. Përkrahje më të madh fiton plani për partneritetin strategjik me ShBA-në dhe avancimin e raporteve mes fqinjëve. Freskimi i kuadrove do të sjell energji të re në realizimin e masave dhe politikave të qeverisë së udhëhequr nga LSDM, në interes të të gjithë qytetarëve dhe ardhmërinë e vendit”, pohoi Bogdanka Kuzeska, zëdhënëse në LSDM.
Hyrja e ASh-së në Qeveri pritet që ta bëjë më të qëndrueshme shumicën parlamentare, ndërsa zotimi kryesor i partisë së Taravarit për hyrjen në këtë Qeveri është ndihmesa për rrugën europiane, duke dhënë mbështetje për ndryshimet kushtetuese si dhe luftën kundër korrupsionit.