Çmimi i naftës dhe gazit rriten për Galop! Institucionet qetësojnë – po monitorojmë situatën

Sulmi i Izraelit ndaj Iranit rriti çmimet e naftës së papërpunuar dhe gazit natyror në bursat botërore. Në më pak se një javë, çmimet e këtyre dy burimeve të energjisë janë rritur me rreth 20%. Sipas kreut të Komisionit Rregullator të Energjisë (KRrE), Marko Bislimovski, jemi larg kulmeve të disa viteve më parë.

“Për momentin, çmimi i naftës më duket 67.5 denarë, që është shumë larg nivelit kur kishim çmime prej 95-100 denarëve, kishim një kulm kur nafta ishte 110 denarë, benzina ishte 112 denarë dhe tani jemi shumë larg asaj situate. Sidoqoftë, nuk besoj se do të arrijmë në një situatë të tillë kur kishim çmime jashtëzakonisht të larta të derivateve të naftës”, tha Marko Bislimovski, kryetar i KRrE-së.

Qeveria thotë se rezervat me derivate të naftës janë plot. Sipas raportimeve, ato aktualisht mund të mbulojnë 76 ditë nga importet mesatare ditore, ndërsa plani i qeverisë është ta rrisë këtë në standardin europian prej 90 ditëve deri në fund të vitit.

“Vetëm gjatë muajit aktual, janë blerë 5 milionë litra dhe një blerje e re me një vëllim të ngjashëm është planifikuar deri në fund të vitit, gjë që është tregues i një qasjeje proaktive dhe të përgjegjshme ndaj menaxhimit të sigurisë energjetike”, tha Marija Miteva, zëdhënëse e Qeverisë.

Bislimovski njoftoi se nëse gjatë javës, në një mesatare pesëditore, ka një rritje ose ulje prej dy denarëve, çmimet do të përcaktohen në baza ditore. Megjithatë, ai shpreson se kjo nuk do të ndodhë. Qeveria thotë se do të ndërhyjë nëse ka një çrregullim në treg.

“Nëse ka një rritje të mundshme të çmimit të derivateve të naftës, do të merren masa të përshtatshme në kohën e duhur për të mbrojtur si qytetarët ashtu edhe ekonominë, për çka opinioni do të informohet në kohë dhe në mënyrë transparente”, tha më tej Miteva.

Mund të priten ndërprerje më të mëdha nëse Irani, për shkak të sulmeve nga Izraeli, mbyll Ngushticën e Hormuzit, përmes së cilës kalojnë çdo ditë 20% e naftës bruto në botë, kryesisht nga vendet e OPEK-ut si Arabia Saudite, Emiratet e Bashkuara Arabe, Iraku, Irani dhe Kuvajti. Përmes kësaj ngushtice gjithashtu kalon 20% e gazit natyror të lëngshëm nga Katari në Azi.

Por Bislimovski është më i shqetësuar për rritjen drastike të çmimit të gazit natyror. Ai thotë se rritja e çmimit të këtij burimi energjie ndikon drejtpërdrejt në rritjen e çmimit të energjisë elektrike. Megjithatë, e qetëson opinionin se nuk do të ketë ndryshime deri në fund të vitit 2025. Megjithatë, kjo nuk vlen për kompanitë sepse ato furnizohen në tregun e lirë të energjisë elektrike.