Zjarrfikësit në sherr me Shilegovin! Debati i nxehtë zgjati një orë, por pa zgjidhje

Zjarrfikësit: “Mos e përziej politikën, ne nuk po përzihemi kërkojmë të drejtat tona”.

Zjarrfikësit: “Kërkojmë atë që na takon”.

Shilegov: Këshilltar je?

Me tone të larta dhe akuza u zhvillua takimi në mes kryetarit të Shkupit dhe zjarrfikësve.

Shilegov: “Më fal, rrogë merr, ndërsa nuk e merr shtesën”.

Zjarrfikësi: “Po për mua ajo shtesë është shumë”.

Ky takim mes kryetarit të qytetit të Shkupit Petre Shilegov dhe zjarrfikësve erdhi pasi këta të fundit po  protestojnë për shtesën e rrogës prej 20 përqind të rrezikshmërisë, që nuk po e marrin.

Shilegov tha se aktualisht nuk ka asnjë bazë ligjore për pagesën e asaj që po kërkojnë. Sipas tij ligji duhet të ndryshohet në qershor të vitit 2021.

 “Në mënyrë që të ndihmojmë në përshpejtimin e këtij procesi ose për të pasur një bazë ligjore për t’i paguar ata, ne ofrojmë ndërmjetësim për të hyrë në atë proces, në mënyrë që diku në qershor 2021, kur ligji të hyjë në fuqi, thjesht deri atëherë ato të mos jenë zjarrfikësit e dëmtuar”, theksoi Petre Shilegov – Kryetar i Qytetit të Shkupit.

Por zjarrfikësit nuk i besojnë fjalëve të kryetarit të Shkupit. Thonë se deklarata e tij nuk është e besueshme se në janar të vitit të ardhshëm të ketë ndryshime në ligje për shkak se mund të shkojmë në kampanjë parazgjedhore.

“Nuk është e pranuar kjo për ne, për shkak se kryetari është tre vjet në Qeveri dhe ka qenë i njoftuar. Kishte kohë që ta rregullon këtë, për këto vite, por më falni nga janari i vitit të ardhshëm mund të ketë kampanjë parazgjedhore dhe më nuk e dimë a do ta mund ta rregulloj atë”, theksoi Dejan Isaevski – zjarrfikës.

Pas debatit që patën me Shilegovin, zjarrfikësit u nisën drejt godinës së qytetit të Shkupit, për ta vazhduar protestën.

Paratë që po i kërkojnë deri tani i kanë marrë vetëm zjarrfikësit të cilët kanë parashtruar padi.

Sipas Shilegovit ky problem është gati 15 vite dhe se tani është detektuar. Tha se është  formuar grup i punës i cili do të bëjë ndryshime në ligj, ndryshime që sipas tij do të fuqizohen në vitin 2021.