Me gjithsej 684.777 kilogramë mbeturina të grumbulluara, 70.688 pjesëmarrës, mbi 600 organizata, më shumë se 250 institucione shtetërore, shkolla nga e gjithë vendi dhe kompani të shumta, përfundoi edicioni i gjashtë i “Vikendi Gjeneral” – iniciativa më e madhe ekologjike në vend dhe në Ballkan.
Gjatë gjashtë viteve të ekzistencës së saj, kjo nismë ka mobilizuar mbi 170.000 qytetarë dhe ka mundësuar grumbullimin e rreth 2,2 milionë kilogramëve mbeturina, duke u shndërruar nga një iniciativë lokale në një lëvizje kombëtare për mbrojtjen e mjedisit.
Vetëm këtë vit, nga 8 deri më 10 maj, në kuadër të edicionit të gjashtë të “Vikendi Gjeneral”, u realizuan më shumë se 600 aksione pastrimi dhe 1.900 aktivitete edukative “Ora Eko” në 81 komuna të vendit.
Pas përfundimit të aksionit ekologjik, mbeturinat u mblodhën nga ndërmarrjet komunale lokale dhe u depozituan në mënyrë profesionale. Mbeturinat e selektuara, si plastika, kanaçet dhe letra, u morën nga Pakomak, ndërsa mbeturinat elektronike u trajtuan nga Nula Otpad.
Një nga arritjet më të rëndësishme të kësaj iniciative është tejkalimi i ndarjes mes “institucioneve përgjegjëse” dhe “qytetarëve”. Bashkëpunimi ndërmjet angazhimit qytetar dhe mbështetjes institucionale ka sjellë ndryshime të dukshme pozitive në shoqëri. Pikërisht kjo frymë bashkëpunimi u zhvillua me kalimin e kohës në atë që sot njihet si “Generalka Vikend”, duke kujtuar se një mjedis i pastër është përgjegjësi e përbashkët. Institucionet kanë detyrimin të menaxhojnë mbeturinat, por secili qytetar duhet të kontribuojë duke i hedhur ato në mënyrë të duhur dhe duke respektuar hapësirat publike.
Vlera më e madhe e kësaj iniciative nuk qëndron vetëm te sasia e mbeturinave të mbledhura, por edhe te ngritja e vetëdijes qytetare. Gordana Sofia dhe Hanes Jekl, iniciatorët e “Generalka Vikend”, theksojnë se përmes këtij aksioni ekologjik qytetarët mund të jenë bartës të ndryshimeve pozitive dhe jo vetëm vëzhgues apo kritikë pasivë. Sot ata krenohen që ideja e tyre është shndërruar në një lëvizje kombëtare që bashkon dhjetëra mijëra njerëz në të gjithë vendin.
“Që nga fillimi, “Vikendi Gjeneral” ka qenë një iniciativë për krijimin e ndryshimeve afatgjata në raport me mjedisin. Institucionet dhe kompanitë private kanë një rol të rëndësishëm dhe të pazëvendësueshëm në menaxhimin e mbeturinave, por një mjedis i pastër varet edhe nga zakonet e përditshme të qytetarëve. Prandaj synimi ynë është të promovojmë kulturën e përgjegjësisë personale dhe kujdesin për hapësirat që i ndajmë së bashku. Në një shoqëri shpesh të ndarë për shumë çështje, ‘Generalka Vikend’ tregoi se ekzistojnë vlera që na bashkojnë. Arritëm ta shndërrojmë shqetësimin për ndotjen në veprim konkret dhe të dëshmojmë se qytetarët mund të jenë nxitës të ndryshimeve pozitive. Synimi ynë është që hapësirat publike t’i perceptojmë si vazhdim të shtëpisë sonë. Vetëm në këtë mënyrë mund të ndërtojmë ndryshime të qëndrueshme dhe një të ardhme më të pastër për të gjithë”, thanë Gordana Sofia dhe Hanes Jekl nga Men and Mountain.
Megjithatë, fytyra e vërtetë e “Vikendi Gjeneral” nuk janë statistikat, por mijëra qytetarë që zgjedhin të angazhohen. Janë fëmijët që mësojnë për herë të parë çfarë do të thotë përgjegjësi ndaj mjedisit, prindërit që përfshijnë familjet e tyre në aksione ekologjike, nxënësit që frymëzojnë bashkëmoshatarët dhe vullnetarët që dëshmojnë se ndryshimi fillon nga secili individ.
Në bashkëpunim me “Vikendi Gjeneral”, Ministria e Arsimit dhe Shkencës, së bashku me UNICEF-in, zbatuan programin edukativ “ORA EKO”. Dhjetëra mijëra nxënës në të gjithë vendin mësuan të kombinojnë njohuritë mbi ekologjinë dhe ekonominë qarkulluese me aktivitete praktike.
Në një kohë kur shumë njerëz ndihen të dekurajuar dhe besojnë se ndryshimi është i pamundur, “Vikendi Gjeneral” përcjell një mesazh tjetër – se veprimi i përbashkët ka vlerë dhe se secili mund të jetë pjesë e zgjidhjes.
