Kryeministri britanik, Keir Starmer refuzoi t’i bashkohet bllokadës së Ngushticës së Hormuzit, të paralajmëruar nga presidenti amerikan Donald Trump, në një kohë kur çmimet e naftës janë në rritje dhe ka frikë për presion të mëtejshëm ekonomik mbi qytetarët britanikë, raportoi DPA.
Trump kërcënoi se do të ndalojë cisternat që hyjnë ose dalin nga kjo rrugë kyçe për transportin e naftës dhe gazit, përcjell TV21. Kjo solli rritje të menjëhershme të çmimeve të naftës që në tregtimet e hershme, pasi ato tashmë ishin rritur për shkak të kontrollit të Iranit mbi ngushticën, si përgjigje ndaj luftës SHBA-Izrael.
Starmer pritet sot të diskutojë me qytetarët për koston e jetesës gjatë një vizite në Greater Manchester, ndërsa ministrja e Financave Rachel Reeves do të udhëtojë në Uashington për takime të Fondi Monetar Ndërkombëtar. Ajo paralajmëroi se “lufta në Iran do të ketë një kosto për familjet dhe bizneset britanike”.
Deputetët kthehen në Westminster pas pushimit të Pashkëve, pa përparim në zgjidhjen e krizës në Lindjen e Mesme dhe me një armëpushim të brishtë dyjavor në rrezik. Trump e paralajmëroi bllokadën pas dështimit të bisedimeve të paqes mes SHBA-së dhe Iranit në Islamabad, ku të dyja palët fajësuan njëra-tjetrën për dështimin.
Sipas një postimi të Trump në platformën Truth Social, ushtria amerikane do të fillojë “bllokimin e të gjitha anijeve” që përpiqen të hyjnë ose dalin nga Ngushtica e Hormuzit. Ai shtoi se “edhe vende të tjera do të përfshihen”, por Mbretëria e Bashkuar, sipas burimeve qeveritare, nuk do të marrë pjesë.
Megjithatë, Londra po bashkëpunon me Franca dhe partnerë të tjerë për krijimin e një koalicioni më të gjerë për mbrojtjen e lirisë së lundrimit. Starmer dhe presidenti francez Emmanuel Macron ranë dakord se nevojitet një qasje e koordinuar.
Këtë javë, Britania do të presë bisedime të reja për rihapjen e ngushticës, me fokus në presionin diplomatik ndaj Iranit, përfshirë edhe përmes sanksioneve.
Komanda Qendrore e SHBA-së njoftoi se bllokada e porteve iraniane do të nisë sot, por njëkohësisht theksoi se nuk do të pengohet liria e lundrimit drejt porteve jo-iraniane, gjë që pjesërisht bie ndesh me deklaratat e mëparshme të Trump.
Presidenti amerikan fajësoi Iranin për dështimin e negociatave, ndërsa ministri i Jashtëm iranian Abbas Araghchi u kundërpërgjigj se Uashingtoni po përdor “maksimalizëm” dhe “kushte të ndryshueshme”.