Protesta në Kumanovë, kërkohet drejtësi për Almirin!

Gjysmë ore para protestës për rastin “Almiri”, policët po bëheshin gati ta siguronin objektin e gjykatës në Kumanovë.

E menjëherë pas tyre edhe organizatorët filluan të bëheshin gati për të protestuar.

Protesta filloi me thirrje “Drejtësi për Almirin”.

Protestuesit kërkonin që i akuzuari Boban Iliç të dërgohet në burg ndërsa babai i Almirit dhe të afërmit e tij të lihen të lirë.

 “Jemi këtu nga kjo gjykatë të kërkojmë që ta rishqyrtojnë këtë vendim dhe mos të tallen me drejtësinë, sepse revolta që i bëhet popullit mund të jetë shpërthim me përmasa të paparashikuara. Ne jemi të mbështetur për muri dhe nuk kemi ku të shkojmë më prandaj kërkojmë nga kjo gjykatë, drejtësi”, tha Fuat Aliu – familjar i Almirit.

 “Desha të iu them edhe institucioneve në Shkup, se unë do të shkoj në burg, do të dalë prej atje, por mos të mendojnë se do të mbetet me kaq. Edhe një ditë, vetëm një ditë, të flejë në burg, unë nuk do t’ia falë kurrë Qeverisë. Boll më ishte”, potencoi xhaxhai i Almirit, Sami Demiri.

Babai i Almirit, Sedat Aliu i cili është dënuar me gjashtë muaj burg, në protestë kujtoi edhe një premtim që para zgjedhjeve i kishte bërë zv.kryeministri aktual Artan Grubi.

 “Ishte Artani Grubi, i cili na ka thirrur në kabinetin e tij dhe na ka thënë se do të ndërmerret një komision parlamentar dhe deri në ditën e sotme, gati për 3 vite nuk është bërë asgjë. Çka është problem me ata, tallen me ne apo fitojnë poena politik”, shtoi babai i Almirit, Sedat Aliu.  

 “Edhe të mbytur, të malltretuar për 6 vite, tani edhe djemtë dhe nipin  të mi marrin në burg. Ku është kjo drejtësi? Edhe të mbysin edhe në burg të dërgojnë”, tha gjyshi i Almirit, Qani Aliu.

I pranishëm në protestë ishte edhe vëllai më i madh i Almirit, i cili kërkonte drejtësi për valluan e tij. Protesta të tillë do të mbahen edhe në Shkup më 26 shkurt, ndërsa revolta vjen ngaqë Gjykata e Apelit e konfirmoi dënimin me 6 muaj burg për babain e Almirit dhe nga 9 muaj për dy familjarët e tij. Ndërkohë Gjykata e Apelit, ka ulur dënimin nga 6 në 4 vite burg për Boban Iliq, i cili me veturë e kishte goditur për vdekje Almirin e vogël.