Bisedimet me partitë e tjera politike për mbështetje të ndërsjellë janë në zhvillim e sipër, dhe vendimi se me kë dhe ku do të japim mbështetje do të merret deri të mërkurën. Këtë e deklaroi kryetari i LSDM-së, Vjenko Filipçe, në lidhje me votimin në rrethin e dytë që do të mbahet javën e ardhshme.

“Ne do të marrim vendimin përfundimtar për mënyrën se si do të veprojmë dhe me kë do të koalicionojmë në ditët e ardhshme, më së voni deri të mërkurën. Brenda këtyre bisedimeve, absolutisht diskutojmë për të dyja gjërat – ku na duhet mbështetje dhe ku ne duhet të japim mbështetje. Bisedimet janë në zhvillim dhe do t’i finalizojmë gjatë ditës së nesërme, të martën, së voni”, tha Venko Filipçe.

A po zhvillohen bisedime me Levicën, pasi në ato vende ku LSDM hyri në rrethin e dytë nuk ka kundërkandidat nga Levica dhe anasjelltas. Kandidati për kryetar të Shkupit, Amar Mecinoviç, pret të marrë votat nga kandidati i tyre, por thotë se ende nuk kanë pasur bisedime.

“Besoj se për sa i përket vizionit që unë e promovoj dhe që ne e ndajmë, një pjesë e madhe e njerëzve që votuan për zonjën Kaja Shukovës dhe që besojnë se interesi publik duhet të jetë fokusi kryesor i një pushteti lokal, mund të më japin mbështetjen e tyre. Nuk kemi pasur asnjë bisedë me askënd, as gjatë parafushatës, as gjatë fushatës. Që kur kemi arritur në rrethin e dytë nuk kemi pasur bisedime”. tha Amar Mecinoviç.

Atmosfera e krijuar me thirrje për votime mbi bazë etnike, për atë se kush kë do të mbështesë në Bërvenicë apo Kërçovë, sipas Filipçes është e papranueshme.

“Mendoj se karakteri multietnik i vendit tonë, marrëdhëniet e mira ndër-etnike, janë diçka që duhet të mbetet prioritet. Nga ana tjetër, është fakt që qytetarët shpesh votojnë mbi baza etnike. Ne nuk do të veprojmë sipas dallimit etnik, diskutojmë me të gjithë aktorët politikë. Nuk është vetëm për Kërçovën apo Bërvenicën, bëhet fjalë për Shkupin, për mënyrën se si do të veprojmë në Karposh, në Kumanovë”, deklaroi Filipçe.

Filipçe gjithashtu u ankua se në komunat ku kanë kandidatë për kryetarë, ata janë përballur me presione para votimit, përfshirë kontrolle policore, financiare, përmes qendrave për punë sociale dhe u është ofruar edhe para për blerje votash. Për shkak të gjithë këtyre rrethanave, punuam në kushte vërtet të vështira, tha ai.

Në Kërçovë është vënë re një problem mjedisor. Lumi i ftohtë “Studençica”, aktualisht po përballet me mungesë drastike të ujit. Sipas raportimeve nga terreni, rreth 3 kilometra të shtratit të lumit janë pa rrjedhje fare. Gjendja ka shqetësuar njohësit e çështjeve ekologjike dhe shoqatën “Hunter Fish” . Ndryshimet klimatike, minimi i tokës dhe shfrytëzimi i pakontrolluar i burimeve ujore për bujqësi dhe industri, po përmenden si shkaqet më të mundshme të kësaj krize. Ekspertët paralajmërojnë se tharja e lumenjve mund të shkaktojë dëme të pariparueshme për ekosistemet e zonës dhe për furnizimin me ujë të komunitetit.

“Problemi më i madh është bërë në vet burimin e Lumit Treska dhe diku edhe 10 burime të tjera nga fshati Drugovë. Poshtë deri në Drugovë diku te 7- 8 burime që i di unë nuk janë më sepse me minimin në pjesën e epërme ku punohet në autostradë nga fuqia e demontimit të minimit, janë mbyllur, bllokuar ose kanë dëmtime serioze të gjithë këta burime, sidomos burimi kryesor i Lumit Treska në fshatin Izvor”, tha Mile Aleksoski

Besmir Elezi, kryetari i shoqatës Hunter Fish dhe koncesioner i lumenjve në Kërçovë thotë se bota e gjallë e ujerave në këto kushte nuk mbijeton.

“Ne para dy apo tre javësh si koncesioner që jemi, bëmë edhe lëshimin e peshkut autokton të troftës autoktone që jeton në këto ujëra, ajo e ka kohën e shumimit tani por me këto kushte nuk mund të ketë shumim adekuat”, deklaroi Besmir Elezi.

Banorët kërkojnë ndërhyrje urgjente nga institucionet lokale dhe shtetërore për të gjetur zgjidhje dhe për të parandaluar që situata të përkeqësohet edhe më shumë sepse shihet qartë se janë dëmtuar tre burimet kryesore të Lumit Treska, thotë Aleksosoki.

“Shteti seriozisht duhet ta kuptoj këtë situatë, të bëjnë hulumtime serioze se çfarë ka ndodhur, të shihet a ka shpëtim dhe zgjidhje që të kthehen ujërat”, tha Mile Aleksoski.

Për këtë situatë janë alarmuar të gjitha institucionet kompetente.