Në Tetovë uji vazhdon të mos jetë i pijshëm. Analizat kanë treguar se i njëjti  nuk preferohet për pije, ndërsa burimi i Leshnicës vazhdon të jetë jashtë funksionit, shkaku se uji është i turbullt. Sipas drejtorit të NPK Sharri, Valon Zeqiri, për momentin kemi 240 litra ujë në sekondë, ndërsa mungesë ka në lagjen 146 ku tash më 24 orë nuk kanë ujë për pije.

“Gjendja në Tetovë vazhdon të jetë e njëjtë. Uji vazhdon të mos jetë i pijshëm, në bazë të analizave që i kemi marr dje dhe sot nuk e preferojmë që të pihet pasi që presim analiza më të detajuara mikrobiologjike që i kemi bërë dhe ata analiza presim që nesër t’i marrim rezultatet dhe të dalim me rezultate konkrete. Për sasinë e ujit kemi 240 litra ujë në sekondë së bashku me puset që i kemi aktivizuar dhe filtër  stacioni vazhdon të jetë akoma jashtë funksionit, pasi që kemi ujë të turbullt dhe në bazë të reshurve që kanë rënë mbrëmë kemi ujë të turbullt nga burimet e Leshnicës”, tha Valon Zeqiri – Drejtor i NPK Sharri.

Nga koalicioni VLEN njoftojnë se përfaqësuesit e koalicionit, Izet Mexhiti, Zeqirija Ibrahimi dhe Arben Fetai, zhvilluan takim me kandidatin e pavarur për kryetar të Komunës së Studeniçanit, Azem Sadikun. Nga VLEN thonë se në raundin e dytë t[ zgjedhjeve lokale, do ta mbështesin Sadikun.

“Në takim u diskutua për bashkërendimin e mbështetjes së VLEN-it në raundin e dytë të zgjedhjeve lokale, si dhe për planet zhvillimore të Studeniçanit dhe mundësitë që hapen për këtë komunë në bashkëpunim me pushtetin qendror.
VLEN dhe kandidati Sadiku ndajnë vizionin e përbashkët për zhvillimin e Karshiakës, për investime të reja, përmirësim të infrastrukturës dhe ndërtimin e një komune moderne e të qëndrueshme. Kandidati Azem Sadiku shprehu mirënjohje për mbështetjen e VLEN-it dhe u zotua se do të vazhdojë projektet e filluara dhe do të punojë me përkushtim për interesat e qytetarëve të Studeniçanit”, thonë nga VLEN.

Nga koalicioni AKi i kanë quajtur shpifje akuzat e koalicionit VLEN, për bashkëpunim të AKI-së me Levicën.

Në lidhje me: VLEN: Vota për AKI-në është votë për Levicën

“Koalicioni VLEN vazhdon të bëjë atë që di më së miri – mashtrimin. Duke u përpjekur të fshehë faktin e hidhur të fitores me votat e VMRO-DPMNE-së në Çair, Tetovë, Strugë, Dibër е kështu me radhë, ata tani shpifin se gjoja Aleanca Kombëtare për Integrim (AKI) mbështetet nga votat e Levicës. I bëjmë me dije opinionit publik se është vetë Hristijan Mickoski ai që hapur i ka kërcënuar liderët e VLEN-it të kenë kujdes në veprimet dhe deklaratat e tyre politike. Madje, nënkryetari i VMRO-së, Aleksandër Nikollovski e tha qartë: “Bilall Kasami nuk duhet të turpërohet apo të ndihet në siklet që maqedonasit në Tetovë votuan për të në raundin e parë. Tani ai duhet t’u përgjigjet atyre njerëzve, sepse ata janë mbështetësit e tij”. Kjo tregon se kush i komandon dhe kush i dirigjon”, thonë nga AKI.

Nga AKI thonë se do të korrin fitore në raundin e dytë të zgjedhjeve lokale më 2 nëntor.

“Më 2 nëntor, shqiptarët do të flasin qartë dhe me dinjitet – do t’i thonë JO vasalëve të VMRO-së dhe Mickoskit, duke zgjedhur rrugën e dinjitetit dhe përfaqësimit të vërtetë politik. E për pak desh harruam një pyetje që kërkon përgjigje të sinqertë: Pse hoqët dorë nga mbështetja e kandidatit Haqim Ramadani në Bërvenicë?”, thuhet mes tjerash në kumtesën e AKI.

Drejtoria e të Ardhurave  Publike ka publikuar në faqen e saj zyrtare një seksion të ri me pyetje dhe përgjigje për detyrimet tatimore, përcjell TV21. Në këtë bazë të zgjeruar njohurish janë përfshirë 260 pyetje, të ndara në tre kategori – për TVSH-në, tatimin personal mbi të ardhurat dhe tatimin mbi fitimin.

Qëllimi është t’u mundësohet qytetarëve dhe kompanive qasje e shpejtë dhe e lehtë në informacione të sakta për zbatimin e ligjeve tatimore. Nga DAP theksojnë se baza do të përditësohet vazhdimisht sipas ndryshimeve ligjore dhe praktikave të reja.

Kjo iniciativë është pjesë e Planit Strategjik 2025–2027, që synon rritjen e transparencës, digjitalizimin e shërbimeve dhe forcimin e besimit mes institucioneve dhe tatimpaguesve. Të gjitha pyetjet dhe përgjigjet janë të publikuara në: ujp.gov.mk

Nga Ministria e Shëndetësisë thonë se interesimi për vaksinim kundër gripit sezonal po rritet vazhdimisht. Sipas MSH-së, deri më tani janë regjistruar mbi 70 mijë qytetarë, ndërsa më shumë se 22 mijë persona janë tashmë të vaksinuar në mbarë vendin.

Vaksinimi, siç theksohet në kumtesë, po zhvillohet në 35 pika vaksinimi, prej të cilave pesë ndodhen në Shkup. Të gjithë qytetarët e interesuar mund të paraqiten përmes aplikacionit vakcinacija.mk ose përmes mjekut të tyre amë.

“Në organizim të Ministrisë, ekipe preventive nga institucionet shëndetësore në mbarë vendin po vazhdojnë me vaksinimin në terren dhe në kushte shtëpie për personat e moshuar dhe të palëvizshëm, si dhe për personat me aftësi të kufizuara”, shtojnë nga MSH.

Me vaksinim falas janë përfshirë kategoritë e rrezikuara të popullsisë, siç janë: personat mbi 65 vjeç, personat me sëmundje kronike, punonjësit shëndetësorë, gratë shtatzëna, fëmijët nga 6 muaj deri në 5 vjeç, personat e vendosur në institucione për mbrojtje sociale të të moshuarve dhe punonjësit në këto institucione.