Ministri i Shëndetësisë, Azir Aliu, konfirmon se në procesin e planifikimit për sistemin shëndetësor po diskutohen tre opsione për të ardhmen e Qendrës së re Klinike në Shkup. Në intervistën për Radion Evropa e Lirë, ai theksoi se vendimi përfundimtar do të varet nga analiza profesionale e ekspertëve, ndërsa aspektet infrastrukturore dhe financiare do të jenë vendimtare. Sipas ministrit, një nga opsionet është rinovimi i Qendrës Klinike ekzistuese. Alternativa e dytë përfshin ndërtimin e një Qendre Klinike tërësisht të re në një lokacion të ri gjeografik, ndërsa opsioni i tretë është zhvendosja dhe ndërtimi i kompleksit të ri klinik në hapësirat e spitalit “8 Shtatori”.

“Në këtë moment po mendohet mes Qendrës Klinike ekzistuese – nga infrastruktura dhe mundësitë e tjera. Një nga opsionet është ndërtimi i një qendre klinike tërësisht të re në një pozicion gjeografik të ri. Dhe momenti i tretë është „8 Shtatori“, që do të thotë të ndërtohet kompleksi aty ku do të zhvendoset e gjithë Qendra Klinike si e tillë te „8 Shtatori“. Megjithatë, kjo është fazë shumë e hershme. Ekspertët në fund të ditës do të duhet të na thonë edhe nga këndvështrimi infrastrukturor, sa i përket fleksibilitetit dhe krijimit të proceseve të duhura që lidhen midis pjesës administrative, asaj klinike dhe pjesës akademike. E dini që Qendra Klinike është e lidhur ngushtë me fakultetin për shkak të asaj pjese të orientuar drejt kërkimit. Pra, jemi të kujdesshëm që kur të krijohet Qendra e re Klinike, të mos dëmtohet asnjë nga këto tre degë”, theksoi Azir Aliu – Ministër i Shëndetësisë.

Sa i përket trajtimit të pacienteve të  onkologjisë, ministri bëri të ditur se brenda një deri në dy javë, shërbimet onkologjike do të funksionojnë edhe në spitalin “8 Shtatori”, ndërsa po punohet që ato të jenë së shpejti të disponueshme edhe në spitalin e Manastirit. Sipas tij, shërbimet po zgjerohen gradualisht edhe në Tetovë, ndërsa Shtipi mbetet ende në përgatitje.

“Po, të jem i sinqertë, për “8 Shtatorin” prisja që puna të ecte më shpejt. Administrativisht, nga ana jonë kishim inspektorë që shkuan dhe përgatitën raport, kishte kërkesë nga këndvështrimi infrastrukturor. Shpresoj që pas raportit të dytë të mund të hapet ambulanca te “8 Shtatori”. Pres që të jetë për një deri në dy javë. Nuk pres të zgjasë më shumë se aq. Gjithashtu po punohet edhe në Tetovë dhe në Shtip. Shtipi është më larg për terapitë onkologjike pasi ende nuk jemi të përgatitur. Ndërsa në Tetovë, gjithashtu, disa nga procedurat ofrohen atje. Tani kolegët së bashku me klinikën universitare po bisedojnë që të mund të zgjerohet ai spektër i shërbimeve shëndetësore nga onkologjia atje”, u shpreh Azir Aliu – Ministër i Shëndetësisë.

Ndërkohë, ministri informoi edhe për investimet që po realizohen me marrëveshjen me Mbretërinë e Bashkuar, përmes së cilës me 205 milionë euro po ndërtohen dhe rinovohen kapacitete spitalore në Shtip, Tetovë dhe Kërçovë. Në Kërçovë dhe Tetovë pritet të ndërtohen ndërtesa të reja, ndërsa në Shtip do të riorganizohen objektet ekzistuese dhe do të ndërtohen hapësira të reja për fakultetin.

Qeveria dhe opozita me akuza të ndërsjella për inflacionin, i cili në tetor arriti në 4,5%. Sipas partisë opozitare LSDM, Maqedonia gjendet në fund të standardit të jetesës, në kundërshtim me sigurinë e qeverisë se inflacioni po bie, ai mbetet i lartë dhe zvogëlon fuqinë blerëse të qytetarëve.

“Qeveria nuk pranoi asnjë nga propozimet konkrete të LSDM-së – as propozimin për pagë minimale prej 500 eurosh, as heqjen e TVSH-së për produktet ushqimore. Dhe kështu vazhdon – në Buxhetin e ri për vitin 2026 nuk është parashikuar rritje e pagës minimale në 500 euro, as masa për uljen e çmimeve. Kjo do të thotë se gjatë gjithë vitit të ardhshëm qytetarët dhe punëtorët mund të presin një jetë edhe më të shtrenjtë, ndërsa Qeveria nuk do të ndërmarrë asgjë”, tha Bogdanka Kuzeska, zëdhënese e LSDM.

Nga VMRO-DPMNE thonë – nëse qytetarët do të ishin vërtet të pakënaqur me punën e VMRO-DPMNE-së, nuk do t’i jepnin një mbështetje kaq të madhe dhe bindëse në zgjedhjet lokale.

“Ky është mesazhi më i qartë nga populli se ka besim në politikat që sjellin rezultate. Si mundet pikërisht partia që për vite me radhë dëmtoi buxhetin e shtetit për interesa personale dhe partiake, sot të mbajë konferenca për shtimin e standardit të jetesës dhe ekonomisë. Sa ironike është që LSDM flet për inflacionin, kur pikërisht në kohën e tyre shteti u përball me inflacion dyshifror dhe paqëndrueshmëri ekonomike”,s htojnë nga VMRO-DPMNE.

Statistikat kanë bërë të ditur se inflacioni vjetor në tetor është 4,5%. Nëse krahasohen dhjetë muajt e këtij viti me të njëjtën periudhë të vitit të kaluar, inflacioni ishte 4,1%. Rritje e madhe ka te çmimet e ushqimeve dhe pijeve joalkoolike, për 7%.

Nën moton “Magjia është në dituri”, në Tetovë Ministria e Arsimit së bashku me komunën e Tetovës kanë organizuar panel diskutimi për rritjen e cilësisë në arsimin. Ministrja e Arsimit, Vesna Janevska, tha se qeveria duhet të mendojë që arsimtarët të mos kenë presion nga prindërit, ndërsa qeveria duhet të organizojë trajnime të posaçme. Sipas Janevskës, duhet që edhe arsimtarëve t’u jepet mundësi që vetë ta organizojnë procesin arsimor dhe metodologjinë e punës.

“Në të kaluarën, profesioni i arsimtarit është devalvuar jo vetëm nga qeveria, por edhe nga presionet që i kanë nga prindërit, nga forca të ndryshme, nga pjesë të caktuara të shoqërisë, diçka që duhet të ndryshojë. Si do të ndryshojë, hartën do ta ndryshojmë, se do t’i lirojmë arsimtarët nga presionet që janë përgjegjësi e prindërve. A shteti është e domosdoshme të marrë masa tjera që do t’i motivojë, do t’i lirojë të punojnë në atë mënyrë që ata mendojnë se është më mirë për çka edhe janë trajnuar, do të ndryshojnë metodologjinë e mësimdhënies në bazë të dëshirës së tyre, por edhe do të vendosin mësim individual për grupe të caktuara të fëmijëve”, tha Vesna Janevska – Ministre e Arsimit.

Ndërsa për Kasamin, cilësia në arsim nuk është vetëm në objektet shkollore, por edhe në cilësinë e arsimit.

“Investimi në procesin mësimor nuk është vetëm në objektet shkollore, por në ngritjen e kapacitetit të arsimtarëve dhe punëtorëve arsimorë. Në përfshirjen e çdo fëmije në procesin e mësimdhënies, duke përfshirë çdo fëmijë, ne do të vlerësojmë angazhimin dhe kontributin e tyre nesër në shoqëri, se atë që ne sot ndërtojmë në bankat shkollore është e ardhmja ajo që na pret”, pohoi Bilall Kasami – kryetar i komunës së Tetovës.

Ministrja e Arsimit foli edhe për mungesën e librave në shkolla, duke hedhur topin tek drejtorët, ku sipas saj, problemi është tek drejtorët e shkollave dhe jo tek Ministria e Arsimit.

Fasule, lente, spec të kuq, piper, arra, lajthi me afat të skaduar deri në dy vjet… Këtë e kanë konstatuar javën e kaluar inspektorët e Agjencisë për Ushqim dhe Veterinari gjatë një kontrolli të jashtëzakonshëm tek një operator ushqimor. Janë konfiskuar dhe shkatërruar pa rrezik për shëndetin afërsisht 37 ton ushqim. Bëhet fjalë për sasi të mëdha arrërash, produkte drithërash dhe bishtajore, si dhe erëza të ndryshme, pa etiketa, të cilave u kishte skaduar afati i përdorimit nga një deri në dy vjet – njoftuan nga AUV.

“Në lidhje me produktet drithërore bëhet fjalë për sasi më të madhe fasule dhe lente. Nga erëzat kemi spec të kuq, piper. Arrërat, produktet që janë konfiskuar janë arra dhe lejthi. Gjobë prej 3.500 euro në kundërvlerë në denarë iu është vendosur operatorit dhe ndalim për kryerjen e veprimtarisë për shtatë ditë”, tha Oliver Milanov, Drejtor i AUV.

Kontrolle të jashtëzakonshme të forcuara gjatë javës së kaluar u kryen edhe tek operatorë të tjerë ushqimorë, përfshirë mishtoret, restorante, sanduiçari dhe supermarkete. U konstatuan disa parregullsi, si operatorë ushqimorë të paregjistruar, mungesë e trajnimeve të detyrueshme të punonjësve për sigurinë ushqimore, dhe vendosja në qarkullim e ushqimit të pasigurt.

“Në lidhje me kontrollet e jashtëzakonshme që kryem në mishtoret, gjatë përgatitjes së mishit pa etiketë dhe me afat të skaduar, janë konfiskuar gjithsej 130 kilogramë, përfshirë qebapë, pleskavica dhe qofte”, u shpreh Oliver Milanov, Drejtor i AUV.

Operatorët dhe personat përgjegjës janë gjobitur dhe u janë vendosur ndalime shtesë të përkohshme për kryerjen e veprimtarisë. “Janë dhënë gjithashtu urdhra për largimin e mangësive të konstatuara gjatë kontrolleve, dhe ushqimi i pasigurt që u gjet u shkatërrua pa rrezik”, thanë nga AUV.