Sot dyert e komunës së Vrapçishtit ishin të mbyllura. Punëtorët që erdhën në zyrat e tyre në mëngjes nuk kishin asnjë informacion se çfarë po ndodhte.

Disa prej tyre treguan përmes telefonit se dyert i kishte mbyllur ish-kryetari i komunës, Isen Shabani.

Ky i fundit thotë se mandati i tij përfundoi dje dhe se nuk ka më arsye të qëndrojë në komunë.

 “Mua dje më datë 9 nëntor më ka mbaruar mandati. Sot është data dhjetë dhe për këtë duhet ta pyesni Qeverinë, apo të besueshmin e Qeverisë. Ai nga sot duhej të ishte në detyrë, dhe sigurisht përgjegjësia është e Qeverisë dhe të besueshmit të Qeverisë se përse dera është mbyllur. Mandati im dje ka përfunduar dhe sot unë jam qytetar i lirë”, tha Isen Shabani, ish-kryetar i komunës së Vrapçishtit.

Ai nuk ka ndërmend t’i hapë dyert e komunës, dhe kur u pyet nëse do t’ua dorëzonte çelësat personit të caktuar nga Qeveria, deklaroi se çelësat i ka kryeministri dhe ai është ai që duhet t’i dorëzojë. Ai gjithashtu përshëndeti Qeverinë dhe tha se është i gatshëm të bashkëpunojë me ta në çdo mënyrë.

“Po le të shkoj të kryeministri ai do ia jep çelësin. Kjo do ngel tek ne, sepse unë nuk dorëzoj mandat. Po t`i kisha humbur zgjedhjet unë do e pritsha në zyrën time dhe sipas normave unë do i dorëzoja mandatin. Por në këtë situatë dhe këto turbulenca apo lojëra të fëlliqura që mundohen të bëjnë ortakët VLEN dhe VMRO të mirë menduar dhe orkestruar, do përballemi, këtu jemi në çdo kohë”, pohoi Isen Shabani, ish-kryetar i komunës së Vrapçishtit.

Ndryshe, në komunën e Vrapçishtit, raundi i parë i zgjedhjeve lokale dështoi për shkak të mosmarrjes së censusit të nevojshëm. Zgjedhjet pritet të zhvillohen pas 60 ditësh, dhe gjatë kësaj periudhe komunën pritet ta drejtojë një person i besuar i emëruar nga Kryeministri, gjë që pritet të ndodhë gjatë javës së ardhshme.

Pas 12 vitesh Fatmir Dehari lëshon postin e kryetarit të Komunës së Kërçovës dhe ia lë Aleksandër Jovanovskit. Komisioni Komunal Zgjedhor ua dorëzoi çertifikatat këshilltarëve komunal dhe kryetarit të ri të Komunës.

Pas marrjes së mandatit kryetari aktual i Komunës së Kërçovës Aleksandër Jovanovski tha se do të përkushtohet për të realizuar punë të mira për qytetin dhe qytetaret pa dallim përkatësie etnike.

“Nga kjo foltore ju premtoj punë të sinqertë, te vlefshme dhe me përkushtim për të realizuar të gjitha projektet të cilat i kemi premtuar. Dua tua bëjë të qartë të gjithëve se nuk do te kemi asnjë problem nga ana ime, unë do të mundohem të kemi bashkëpunim të mirë me të gjithë të punësuarit dhe t’i përmbushim pritshmëritë e qytetarëve tanë, si higjienën, projektet që i premtuam”, tha Aleksandër Jovanovski – Kryetar i komunës së Kërçovës.

Pas eventit solemn kryetari i ri u prit në zyrë nga kryetari në ikje Fatmir Dehari i cili e njoftoi Jovanovskin me projektet e nisura dhe të nënshkruara, të cilat sipas Deharit kapin vlerën e 7 milionë eurove investime kapitale. Dehari pasi përshëndeti të punësuarit me të cilët ka punuar 12 vite, falënderoi mërgimtarët dhe gjithë qytetarët e vendit.

“Zgjedhjet përfunduan, uroj për qetësi dhe kthjelltësi të qytetarëve tanë. E thash më herët e them edhe një herë nuk drejtoj ndaj askujt gishtin e fajësisë apo të bëjë rolin e gjykatësit. Gjykatësi më i mirë për çdo njërin nga ne duke filluar nga unë është ndërgjegjja dhe le të mbesi në ndërgjegjen e çdo njërit. Puna, përkushtimi apo e gjithë ajo që ka ndodhur brenda kësaj kohe. Ndaj askujt nuk kam luftë përveç luftë ndaj vetes sime, ndaj askujt nuk kërkoj ndryshim përveç vetes sime. Jam njeri, mund edhe të kem gabuar dhe për çdo gabim timin ju kërkoj ndjesë, falje, çdo qytetari që mund eventualisht të jetë i prekur”, pohoi Fatmir Dehari, ish- kryetari s Komunës së Kërçovës.

Përbërja e re e Këshillit Komunal është e përbërë prej 19 këshilltarëve: 5 këshilltarë ka AKI, 3 këshilltarë janë nga Koalicioni VLEN, 2 këshilltarë nga kandidati pavarur, 8 këshilltarë VMRO-DPMNE-ja dhe 1 LSDM-ja.