Kryeministri Hristijan Mickoski thotë se pjesa me shkrim e provimit të jurisprudencës duhet të jepet në gjuhën në të cilën studenti ka përfunduar arsimin e lartë, ndërsa pjesa me gojë në maqedonisht, përcjell TV21. Ai theksoi se e drejta për arsim në gjuhën amtare nuk kontestohet, por sipas tij, funksionimi i sistemit gjyqësor kërkon një gjuhë të përbashkët, që në Maqedoni është maqedonishtja.

“Nuk e di se cilat janë përqindjet apo si i llogarisin atje. Qëndrimi i Qeverisë është i qartë. Sistemi i drejtësisë në Maqedoni është një gjë, ndërsa e drejta për të përfunduar arsimin e lartë në gjuhën amtare është një gjë tjetër. Askush nuk e konteston të drejtën për të përfunduar arsimin e lartë në çdo gjuhë që shteti e mundëson. Në Maqedoni, arsimi i lartë në fakultetet e drejtësisë zhvillohet në tri gjuhë të tjera, përveç maqedonishtes. Për ne si Qeveri, siç kam thënë shumë herë edhe në të kaluarën, është logjike që pjesa me shkrim të zhvillohet në gjuhën në të cilën është kryer arsimi i lartë, ndërsa pjesa me gojë, ku simulohet një mosmarrëveshje civile dhe penale, të zhvillohet në gjuhën e sistemit gjyqësor, sepse kjo përfaqëson një simulim para sistemit gjyqësor. Kjo nënkupton ligjin, ose më saktë, drejtësinë. Kur flasim për ligjin dhe sistemin gjyqësor, kemi parimin e lingua franca, domethënë përdorimin e një gjuhe të përbashkët. Në Maqedoni, kjo gjuhë është maqedonishtja. Në përputhje me rekomandimin e Komisionit të Venecias, të dhënë për Ligjin e atëhershëm për Gjuhët, të cilin Qeveria e mëparshme e miratoi në formën që ishte, duhet të respektohen opinionet e institucioneve ndërkombëtare. Kjo do të thotë se sistemi gjyqësor në Maqedoni duhet të mbetet me një gjuhë të përbashkët, lingua franca, ku gjuha maqedonase do të jetë gjuha zyrtare”, tha Mickoski.

Kryeministri Hristijan Mickoski deklaroi se nëse vendi nuk u kthehet vlerave familjare dhe nuk promovon familjet me shumë fëmijë, ekonomia e Maqedonisë do të jetë e para që do të goditet, përcjell TV21. Ai komentoi deklaratën e zëvendëskryeministrit dhe ministrit të Transportit, Aleksandar Nikolloski, sipas të cilit deri në vitin 2030 vendit do t’i nevojiten 50 mijë punëtorë të huaj në vit për të ruajtur nivelin aktual të Bruto Prodhimit të Brendshëm (BPB-së). Mickoski tha se ndoshta do të duhen më tepër se 50,000 punëtorë të huaj në vit.

“Po, ndonjëherë njeriu duhet t’i analizojë gjërat në thellësi. Dhe kur një vit e gjysmë më parë fola për vlerat familjare dhe fertilitetin, më etiketuan si të prapambetur, retrograd. Thanë se nuk dija për çfarë po flisja dhe nuk mbeta gjë pa lexuar për veten. Por, fatkeqësisht, kjo sfidë mbetet ende. Nëse nuk kthehemi drejt vlerave familjare dhe familjeve me shumë fëmijë, dhe nëse nuk i promovojmë ato vlera, fatkeqësisht, ekonomia e Maqedonisë do të jetë e para që do të goditet. Dhe ajo që thoshte zëvendëskryeministri dhe ministri i Transportit mund të jetë një nënvlerësim. Mund të na duhet shumë më tepër për të ruajtur aktivitetin ekonomik. Shikoni çfarë po ndodh në Evropën Perëndimore, ku për të ruajtur nivelin aktual të ekonomisë dhe për të pasur një rritje të lehtë të BPB-së nominale, është e nevojshme të lëshohen qindra mijëra, apo madje do të thoja miliona, leje pune për emigrantë çdo vit. Prandaj, sado që të duan të më tallin, unë do t’u qëndroj besnik politikave familjare, politikave për familjet e mëdha dhe politikave që nënkuptojnë një të ardhme për Maqedoninë si shtet, vende të reja pune për punëtorët e Maqedonisë dhe një ekonomi maqedonase më konkurruese, që rritet dhe jo vetëm mbahet në këmbë”, deklaroi Mickoski.