-Me reformën në Armatë zgjidhet përfundimisht statusi i ushtarëve profesionistë që mbushin 45 vjeç, duke u mundësuar atyre të vendosin nëse dëshirojnë të vazhdojnë të shërbejnë në Armatë si personel civil, përmes transformimit të marrëdhënies së punës nga afat i caktuar në afat të pacaktuar, njoftoi ministri i Mbrojtjes, Vllado Misajllovski, Vendimi, sqaroi Misajllovski, është marrë sot në mbledhjen e Qeverisë, ndërsa zgjidhja është dakorduar dhe harmonizuar bashkërisht me Armatën dhe sindikatat e ushtarëve.

“Zgjidhja nënkupton që ushtarët profesionistë maqedonas më në fund dhe me të drejtë të mund të jenë të kënaqur dhe të sigurt për të ardhmen e tyre edhe pas moshës 45-vjeçare. Mbeten të gjitha mundësitë si deri më tani – dëmshpërblimi në vlerë prej dy pagash mesatare ose transferimi në një institucion tjetër shtetëror, por me këtë reformë krijojmë një zgjidhje që çdo ushtar profesionist të mund të qëndrojë në Armatë si personel civil”, deklaroi Misajllovski.

Kjo është një zgjidhje krejtësisht e re dhe, siç theksoi Misajllovski, nuk është pjesë e Marrëveshjes Kolektive, për të cilën negociatat vazhdojnë dhe pritet të nënshkruhet së shpejti.

“Vazhdojmë edhe me reformat e tjera. Sot pata një takim me ministren e Financave, ku dakorduam edhe disa lajme të mira. Së shpejti do të nënshkruhet marrëveshja kolektive. Natyrisht, vazhdojmë të punojmë me sindikatat dhe mendoj se në një të ardhme të afërt do të ketë edhe rritje të pagave. Këtë do ta bëjmë të ditur në periudhën e ardhshme. Mendoj se lajme të mira e presin Armatën, por edhe qytetarët maqedonas”, deklaroi Misajllovski.

Shefi i Shtabit të Përgjithshëm të Armatës, Lafçiski, theksoi se këto janë lajme të shkëlqyera për ushtarët profesionistë, duke pasur parasysh se kjo çështje e rëndësishme është zvarritur për më shumë se 15 vjet.

“Detyra e sigurimit të pronës dhe personave në kazermat dhe garnizonet e Armatës në mbarë vendin është përgjegjësi e komandave dhe njësive të vendosura në ato komanda, garnizone dhe kazerma. Kjo, pa përjashtim dhe sipas rregullit, është detyrë dytësore ose tretësore, pra një përgjegjësi shtesë për këto komanda dhe njësi. Duke pasur parasysh misionin dhe detyrat e tyre thelbësore, kjo gjithmonë përbën ngarkesë shtesë. Me këtë zgjidhje të propozuar, kjo përgjegjësi shumë e rëndësishme do t’u besohet pikërisht ushtarëve profesionistë që do të sistemohen në këto njësi”, deklaroi Lafçiski.

Ai siguroi se nuk ka personel më të përshtatshëm sesa ushtarët profesionistë që do të vendosin ta transformojnë marrëdhënien e tyre të punës për të kryer këtë detyrë.

“Kjo nuk është vetëm pikëpamja ime personale, por edhe qëndrimi i të gjithë gjeneralëve, komandantëve dhe të gjithë atyre që janë të përfshirë në komandimin dhe drejtimin e Armatës. Nuk ka personel më të përshtatshëm sesa ushtarët profesionistë që mbushin 45 vjeç dhe që do të vendosin ta transformojnë marrëdhënien e tyre të punës në këto njësi, për të kryer këtë detyrë të rëndësishme të sigurimit të kapaciteteve të Armatës”, deklaroi Lafçiski.

Siç u theksua, të ardhurat mujore, përfshirë të gjitha shtesat e pagës, do të mbeten të pandryshuara. Ata do të kenë mundësi të dalin në pension sipas të njëjtave kushte si pjesëtarët e tjerë, përkatësisht në përputhje me Ligjin për Shërbim në Armatë dhe Marrëveshjen Kolektive.

Vlerësimet janë se nga viti i ardhshëm rreth 100 ushtarë do ta shfrytëzojnë këtë mundësi. Siç theksoi Lafçiski, nuk do të ketë asnjë problem për përfshirjen e kësaj numri, pavarësisht se sa do të jetë ai.

“Struktura do të dimensionohet në mënyrë që të mund të përfshijë secilin që dëshiron. Nëse gjatë pesë viteve të ardhshme analizat tregojnë se do të kemi 500 ushtarë profesionistë që do ta plotësojnë kushtin dhe të gjithë 500 dëshirojnë të qëndrojnë dhe të jenë pjesë e Armatës, ne do ta mundësojmë këtë përmes strukturës së formacionit. Këtë mund ta bëjmë menjëherë: sapo ta mbushë moshën 45-vjeçare, që të nesërmen t’i transformohet marrëdhënia e punës dhe të përfshihet në atë njësi. Për më tepër, ata do të kenë mundësi të qëndrojnë në kazermat ku kanë punuar edhe deri më tani”, sqaroi Lafçiski.

Duke iu përgjigjur pyetjeve të gazetarëve lidhur me protestën e paralajmëruar nga Sindikata e Pavarur më 7 nëntor, Misajllovski tha se secili ka të drejtë demokratike të protestojë, por theksoi se përballë tij janë sindikatat që përfaqësojnë 99,9 për qind të të punësuarve në Ministrinë e Mbrojtjes dhe në Armatë.

“Secili ka të drejtë të protestojë për çështje të ndryshme. Konkretisht, kjo sindikatë që nga dita e parë vetëm përhap urrejtje dhe negativitet, çdo ditë me gënjeshtra dhe manipulime, veçanërisht kundër meje. Por kjo është pjesë e politikës dhe demokracisë dhe nuk kam asnjë problem me këtë. Për mua është më e rëndësishme t’i zgjidh çështjet e ngritura nga sindikatat, punonjësit dhe ushtarët. Ajo që është interesante është se kjo sindikatë asnjëherë nuk ka propozuar ndonjë zgjidhje të mirë dhe as nuk dëshiron të negociojë, por vetëm dërgon njoftime në media për çështje që nuk janë zgjidhur prej 35 vitesh. Unë këtu publikisht tregoj se çfarë do të bëjmë dhe ju e shihni se ato realizohen”, deklaroi Misajllovski.

Ministri i Mbrojtjes, Vlado Misaillovski, paralajmëroi se së shpejti do të nënshkruhet marrëveshje e re kolektive për Armatën, e cila parasheh edhe rritje të pagave. Ai informoi se dje është mbajtur një takim tjetër me sindikatat, ku është diskutuar për përmirësimin e rreth 20 neneve të marrëveshjes kolektive.

“Ka mendime të ndryshme, por besoj se së bashku do të gjejmë një mënyrë, pasi secila prej sindikatave propozon zgjidhje për përmirësime. Ne, natyrisht, shohim se si mund t’i mundësojmë këto ndryshime, duke pasur parasysh implikimet financiare. Por, ajo që është e mirë, shumë shpejt do të ketë lajme të bukura, e ato janë rritja e pagave dhe marrëveshja e re kolektive”, deklaroi Misaillovski.

Në konferencën e përbashkët për shtyp me shefin e Shtabit të Përgjithshëm të Armatës, gjeneral-majorin Sashko Lafçiski, dhe përfaqësuesit e sindikatave në mbrojtje, ministri tha se këto sindikata përfaqësojnë 99,9 për qind të të punësuarve në Ministrinë e Mbrojtjes dhe në Armatë. Misaillovski theksoi se marrëveshja kolektive tani po respektohet në masën më të madhe dhe shprehu pritjen që me kalimin e viteve të zvogëlohen paditë dhe humbjet financiare.

“Vetëm gjatë këtyre dy viteve sa jam ministër, nga buxheti janë paguar mbi 26 milionë euro për padi. Kjo ka ndodhur sepse punonjësit e Ministrisë dhe Armatës është dashur t’i marrin ato mjete. Tani po humbim në gjykata për shkak të çështjeve që datojnë nga viti 2019. Por, me pagesën e mjeteve po zvogëlohen edhe paditë”, tha Misaillovski.

Ai bëri të ditur se sot, në një takim me ministren e Financave, ka arritur marrëveshje për sigurimin e mjeteve financiare për rritjen e pagave.

“Shumë shpejt do t’i dëgjoni lajmet e mira. Do të duhet ta rishikojmë buxhetin, pasi do të marrim mjete shtesë. Qëllimi im është që Ministria e Mbrojtjes dhe Armata të jenë institucioni më i mirë”, deklaroi ministri.

Sipas tij, buxheti për vitin e ardhshëm do të rritet, ndërsa paralajmëroi edhe projekte të reja, investime kapitale dhe paga më të larta.

“Do të fillojmë me ndërtimin e Shtëpisë së Armatës, ndërsa në çdo kazermë do të ketë objekte të reja që do t’i modernizojmë. Së bashku me shefin e Shtabit kemi rënë dakord që programi i modernizimit të NATO-s të ketë mjete shtesë. Gjithashtu, do të sigurojmë uniforma të reja luftarake dhe do të rinovojmë gjithçka që është e nevojshme gjatë vitit të ardhshëm”, tha Misaillovski.

Ministri paralajmëroi gjithashtu se janë paraparë mjete shtesë për blerjen e dronëve dhe sistemeve kundër dronëve. Ai shtoi se muajin e ardhshëm pritet të mbërrijnë edhe dy helikopterë të rinj.