Sofja zyrtare ka konfirmuar se nesër Ministrja e jashtme bullgare Velisllava Petrova-Çamova do të takohet me homologun e saj nga Maqedonia e Veriut Timço Mucunski, në kuadër të Samitit për Korridorin 8. Për momentin ende nuk dihet formati dhe mënyra e takimit, pasi në vetë notën diplomatike thuhet se ato do të përcaktohen në mënyrë plotësuese. Mesazhet e kryeministrit Mickoski janë se Maqedonia dhe Bullgaria vetëm përmes bisedimeve mund ta tejkalojnë mosmarrëveshjen dhe të arrihet zgjidhje që vendi sa më shpejt të bëhet pjesë e Bashkimit Evropian.

“Do të shohim në çfarë formati dhe si do të duket ai takim, nëse do të jetë “pull aside”, nëse do të jetë takim bilateral në margjinat e Samitit për Korridorin 8, megjithatë ky është një aktivitet multilateral, të shohim se si do ta organizojë nikoqiri. Mesazhet tona janë të qarta se vetëm përmes dialogut mund të arrijmë deri te zgjidhja e kësaj gjendjeje në të cilën ndodhemi aktualisht, se ne jemi për marrëdhënie të mira fqinjësore dhe duam sa më shpejt ta realizojmë qëllimin tonë strategjik për të qenë pjesë e Bashkimit Evropian, diçka që e kemi merituar shumë kohë më parë”, tha Mickoski.

Nga LSDM-ja thonë se nga takimi i nesërm nuk presin asgjë dhe madje thonë se bisedimet e paralajmëruara të dy ministrave nuk janë aspak të nevojshme, pasi të premten presidentja e Komisionit Evropian e konfirmoi identitetin dhe gjuhën maqedonase.

“Pse ka nevojë tani, pasi kjo është konfirmuar, të shkojmë në Sofje dhe të bisedojmë për kornizën negociuese? A nuk është kjo përpjekje që, në vend të evropianizimit, të bëhet bilateralizimi i procesit, a nuk është kjo përpjekje për të hapur dhe rinegociuar gjëra tashmë të dakorduara dhe të garantuara nga korniza negociuese? Nga takimi nuk presim asgjë produktive”, deklaroi Fani Karanfilova Panovska –LSDM.

Këto bisedime vijnë në një kohë kur Komisioni Evropian propozon të hiqet e drejta e vetos, në mënyrë që vendet anëtare të votojnë me shumicë të kualifikuar gjatë hapjes dhe mbylljes së kapitujve negociues për vendet kandidate. Mickoski vlerësoi se mesazhet e komisares evropiane për zgjerim, Marta Kos, nënkuptojnë konfirmim të keqpërdorimit të vetos nga disa vende anëtare, por edhe të asaj që ai ka theksuar se ndryshimet kushtetuese duhet të kenë efekt të shtyrë.

“Është e qartë se nga vendet anëtare është njohur ajo që disa prej vendeve anëtare brenda Bashkimit Evropian po bëjnë dhe po përpiqen që, me një manovër të tillë, t’u mundësohet kandidatëve të arrijnë në fazën për të qenë anëtarë në kuadër të Bashkimit Evropian dhe kjo është shumë e ngjashme me atë që ne themi kur bëhet fjalë për ndryshimin e Kushtetutës, që ai ndryshim praktikisht të bëhet i zbatueshëm në momentin kur ne t’i përfundojmë negociatat”, deklaroi Mickoski.

Përveç propozimit për heqjen e vetos, Marta Kos propozon edhe që vendet e reja anëtare të kenë një periudhë kalimtare prej 15 vitesh, gjatë së cilës mund të sanksionohen nëse shkelin standardet demokratike, sundimin e ligjit ose parimin e bashkëpunimit besnik me Unionin. Në rast të shkeljes, anëtarët e rinj mund të mbeten pa të drejtë vote ose pa një pjesë të fondeve evropiane.

Dy seritë e vaksinës BCG kundër tuberkulozit, për të cilat dyshohet se kanë shkaktuar osteomielit te katër fëmijë në Kroaci, në vendin tonë tashmë janë shfrytëzuar dhe janë jashtë përdorimit. Kjo pasi serive të këtyre vaksinave u ka skaduar afati në qershor të këtij viti, njoftoi ministri i Shëndetësisë, Sasho Klekovski.

“Ne siguruam informacionet për dy seritë e vaksinave për të cilat vërtetohet se ka efekte anësore, ato janë seritë nga vitet 2022 dhe 2023, afatet e tyre kanë përfunduar në Maqedoni tashmë para disa muajsh. Pra vaksina të tilla nuk ka më në përdorim në vendin tonë. Kemi kërkuar nga institucionet kompetente, nga Komisioni dhe IShP të bëjnë analizë, sepse për momentin nuk ka raste të evidentuara me efekte të padëshiruara nga vaksinat, të bëjmë analizë të hollësishme dhe të shohim nëse ka diçka të paediventuar në evidencë te ne në “Termini im””, deklaroi Sasho Klekovski, ministër i Shëndetësisë.

Për shkak të panikut të krijuar te qytetarët nga efektet anësore të vaksinat BCG në Kroaci të cilat janë nga prodhues bullgar, e të cilat përdoreshin edhe te ne, Klekovski njoftoi se tani do të furnizohen me vaksina nga Japonia.

“Sot kemi arritur marrëveshje me UNICEF-in që të sigurojmë sasi për një vit nga prodhuesi japonez, pra jemi në procedurë për të siguruar vaksina nga Japonia”, shtoi Klekovksi.

Përndryshe prodhuesi bullgar thekson se raportimi i katër rasteve problematike në Kroaci nuk do të thotë domosdoshmërish se është konstatuar problem me cilësinë e vaksinës. Ndërkaq nga Komisioni për Imunizim në vendin tonë thonë se efektet e padëshiruara eventuale shëndetësore mund të paraqiten pas disa javësh por edhe pas disa vitesh. Në vendin tonë rreth 15 mijë foshnja në vit e marrin vaksinën kundër tuberkulozit dhe ende nuk janë paraqitur ndërlikime shëndetësore.

Në Tregun e Gjelbër të Tetovës ka gjithsej 360 tezga, prej të cilave rreth 130 janë të lira. Pasi hapësirë ka për të gjithë, prapëseprapë problem i madh mbetet shitja në rrugë. Kjo i revolton tregtarët që paguajnë qira për tezgat. Thonë se shitja ka rënë shumë dhe nuk po nxjerrin dot as paratë e qirasë, gjersa ata që shesin në trotuare nuk kanë asnjë harxhim.

-Gjëja është shumë normale se njeriu ndalet me veturë, i marrin gjërat edhe ikën. Këtu as parking ka, asgjë s’ka. Kjo është e gjitha vëlla. Ne marrim mall, nuk shitet malli. Mundohemi, pengojnë, me të madhe pengojnë ata jashtë. Sa më parë të bëjmë thirrje deri te kryetari i komunës. Ne kemi, sepse është shumë më mirë se të gjithë këto qiradhënës që paguajnë qiranë, më kupton?

-Na pengojnë, prapëseprapë na pengojnë!

Shitja është më e dobët kjo është?

-Ne paguajmë qira këtu, paguajmë  çfarë është kjo.

Tregtarët e tjerë tregojnë se brenda tregut kushtet janë shumë më të mira, ka higjienë, kamera dhe malli është i sigurt, prandaj kërkojnë që të gjithë të futen brenda e të punojnë me ligj.

-Shitësit pengojnë pak jashtë. Unë vetë jam prodhues. Se unë isha jashtë duke shitur, ata erdhën inspektorët e më thanë ‘hyr brenda’. Edhe unë hyra brenda se kishte vend të lirë. 260 denarë në muaj i paguan e nuk maltretohesh në rrugë të lësh aty përpara… Ajo kjo ishte kohë katastrofë! Tani këtu higjiena është më e mirë, çdo gjë e rregullt, e ruan mallin vetë, me kamera, me gjëra.

Përgjegjësit e tregut të Tetovës thonë se të gjithë ata që shesin jashtë mund të hyjnë brenda, por duke ndenjur në rrugë po u bëjnë dëm të madh tregtarëve që paguajnë rregullisht

“Përafërsisht tregu disponon me 360 tezga, ku kuptohet se 120 deri 130 përafërsisht janë të lira. Edhe pse ato nuk duken të lira, për arsye se shfrytëzuesit që janë brenda paguajnë shembull një tezgë dhe shfrytëzojnë dy ose tre tezga për arsye se janë të lira. Të gjithë ato që janë të interesuar që shesin jashtë, mund të drejtohen te zyrat tona dhe ne do t’u ofrojmë tezga të lira”, theksoi Avzi Rizvani – përgjegjës i tregut.

Tregtarët presin që inspektorët të dalin në terren dhe t’i largojnë shitësit nga rruga, në mënyrë që secili të punojë barabartë e me rregull. Nga Komuna e Tetovës kanë lënë vetëm ditën e enjte të shitet edhe në trotuare pasi që atë ditë është edhe ditë tregu, por ky problem është me vite dhe assesi të gjendet zgjidhje.