Prokuroria Themelore Publike në Manastir, bazuar në procedurën paraprake të zhvilluar dhe provat e siguruara, ka ngritur aktakuzë ndaj pesë mjekëve internistë nga Spitali Klinik i Manastirit “Dr. Trifun Panovski”, për veprën penale “Vepra të rënda kundër shëndetit të njerëzve”, sipas nenit 217 paragrafi 4, në lidhje me nenin 207 paragrafi 3, në lidhje me paragrafin 1 të Kodit Penal, përcjell TV21. Sipas Prokurorisë, ata akuzohen se në periudhën nga 28.05.2024 deri më 04.06.2024, në Repartin e Mjekësisë Interne të spitalit, kanë trajtuar në mënyrë të pakujdesshme një paciente 40-vjeçare, duke shkaktuar përkeqësimin e gjendjes së saj shëndetësore, që ka rezultuar me vdekje.

Pacientja ishte paraqitur në spital pas një kontrolli dhe rekomandimi nga mjeku amë, i cili kishte shprehur dyshimin për inflamacion të venave – tromboflebit. Por, pas kontrollit fillestar në repartin e mjekësisë interne, pa anamnezë të plotë dhe analiza të detajuara, asaj i ishte vendosur diagnoza artrit reumatoid dhe i ishte dhënë terapi, pas së cilës ishte lëshuar në shtëpi.

“Si rezultat, nuk ishte përcaktuar në kohë gjendja e saj e vërtetë shëndetësore, përkatësisht nuk ishte zbuluar dhe diagnostikuar tromboza dhe nuk ishte ndërmarrë me kohë terapia dhe trajtimi i duhur për këtë gjendje. Kështu, ishte humbur mundësia reale për zbulimin dhe trajtimin në kohë të procesit trombotik, për parandalimin ose kufizimin e përparimit të tij, si dhe të përkeqësimit të mëtejshëm të gjendjes shëndetësore të pacientes”, thuhet në njoftimin e Prokurorisë.

“Më 01.06.2024, pacientja, me dhimbje të forta në bark dhe gjendje të përkeqësuar të përgjithshme, u paraqit sërish për kontroll në spital. Edhe pse këtë herë u shtrua në spital, gjatë katër ditëve në vijim, pavarësisht vlerave jonormale të analizave laboratorike dhe biokimike, asnjë nga mjekët kujdestarë nuk ndërmori ekzaminime shtesë diagnostikuese për të përcaktuar shkaqet dhe terapinë e duhur, informon Prokuroria.

Për këtë arsye, gjendja shëndetësore e pacientes vazhdoi të përkeqësohej ndjeshëm. Pasditen e 04.06.2024, ajo kërkoi ndihmë mjekësore në një klinikë private në Shkup, ku u pranua në gjendje të rëndë të përgjithshme.

“Gjatë ndërhyrjes urgjente kirurgjikale u konstatua trombozë e arteries mezenterike të sipërme dhe të poshtme, me gangrenë të plotë të zorrës së hollë dhe të trashë. Gjendja tashmë ishte e paoperueshme dhe më 05.06.2024, pacientja ndërroi jetë, thuhet në njoftimin e Prokurorisë.

Agjencia për Siguri Kombëtare (ASK), në koordinim me Ministrinë e Punëve të Brendshme (MPB) dhe Prokurorinë Themelore Publike (PTHP), po ndërmerr aktivitete për zbulimin dhe pengimin e një rrjeti propagandistik në vend, për të cilin vlerësohet se ka agjendë destruktive dhe keqdashëse, të orientuar drejt ndikimit në diskursin publik në favor të interesave të huaja, përcjell TV21. Janë ndërmarrë veprime hetimore ndaj një shtetasi të Maqedonisë, i lidhur me faktorë të huaj që janë krijues të një aparati propagandistik me një rrjet portalesh të integruara edhe në hapësirën mediatike në Maqedoni, njoftojnë nga ASK.

Është kryer kontroll në shtëpinë e tij, me ç’rast janë gjetur dhe sekuestruar gjësende, të cilat aktualisht janë duke iu nënshtruar ekspertizës shtesë. Aktorët e vërtetë të këtij rrjeti propagandistik, i cili, siç theksojnë nga ASK-ja, është në funksion të interesave ruse, fshihen përmes pseudo-portaleve të klonuara, të regjistruara me domen të Maqedonisë në internet. Përmes këtyre pseudo-portaleve përhapen lajme të rreme dhe dezinformata, si dhe riformësohen narrativat për ngjarjet aktuale, duke minuar besimin në institucionet dhe duke nxitur urrejtje dhe jotolerancë etnike e kombëtare.

“Agjencia për Siguri Kombëtare, në koordinim me institucionet e tjera kompetente, në mënyrë të vazhdueshme ndërmerr aktivitete për zbulimin dhe pengimin e një rrjeti propagandistik në vend, i cili ka agjendë destruktive dhe keqdashëse për të ushtruar ndikim në diskursin publik, në favor të interesave të huaja. Në kuadër të aktiviteteve të përbashkëta të koordinuara të ASK-së, MPB-së dhe PTHP-së, më 18.09.2026 janë ndërmarrë veprime hetimore ndaj një shtetasi maqedonas, i lidhur me faktorë të huaj që janë krijues të një aparati propagandistik me një rrjet portalesh të integruara edhe në hapësirën mediatike maqedonase”, thuhet në njoftim.

Nga ASK sqarojnë se, për shkak të dyshimit të bazuar se është kryer vepra penale “Shkaktimi i urrejtjes, përçarjes dhe jotolerancës kombëtare, racore dhe fetare”, sipas nenit 319 të Kodit Penal, “Zbulimi i sekretit zyrtar”, sipas nenit 360 të Kodit Penal dhe “Përhapja e materialeve raciste dhe ksenofobike përmes sistemit kompjuterik”, sipas nenit 394-g të Kodit Penal, është kryer kontroll në shtëpinë e tij, me ç’rast janë gjetur dhe sekuestruar gjësende, të cilat aktualisht janë duke iu nënshtruar ekspertizës shtesë.

“Aktorët e vërtetë të këtij rrjeti propagandistik, i cili është në funksion të interesave ruse, fshihen përmes pseudo-portaleve të klonuara, të regjistruara me domen maqedonas të internetit. Përmes këtyre pseudo-portaleve përhapen lajme të rreme dhe dezinformata, si dhe riformësohen narrativat për ngjarjet aktuale, duke minuar besimin në institucionet dhe duke nxitur urrejtje dhe jotolerancë etnike e kombëtare. Aktivitetet e përmendura janë vazhdimësi e aktiviteteve hibride proruse të penguara më herët ndaj një shtetasi maqedonas, të lidhur me këto rrjete propagandistike, ndaj të cilit ishte ngritur edhe kallëzim penal për veprën penale “Përhapja e materialeve raciste dhe ksenofobike përmes sistemit kompjuterik”, sipas nenit 394-g të Kodit Penal”, thuhet në njoftim.

Nga ASK-ja theksojnë se, në kuadër të kompetencave, do të vazhdojnë të ndërmarrin aktivitete në drejtim të zbulimit dhe parandalimit të aktiviteteve subversive-propagandistike përmes një rrjeti portalesh të lidhura me struktura politike rajonale proruse, përmes të cilave drejtpërdrejt minohen proceset strategjike të integrimit evropian të vendit.