Drejtori i Institucionit Kombëtar Muzeu Historik – Krushevë, Miha Oxhaklieski, sot ka dhënë dorëheqje të parevokueshme nga detyra, duke theksuar se vendimi është një akt personal, moral dhe etik, si dhe shprehje e përgjegjësisë ndaj institucionit dhe publikut, përcjell TV21.

Dorëheqja e Oxhaklieskit vjen pas reagimeve në opinion lidhur me xhirimin e videoklipit “Sexy Mama” nga reperi kosovar Don Xhoni, brenda monumentit “Makedonium” në Krushevë, i cili është trashëgimi kulturore e mbrojtur e shtetit.

Në dorëheqjen e tij, Oxhaklieskit thekson se në rastin konkret nuk është shkelur asnjë ligj, rregullore apo akt tjetër, dhe as nuk është vepruar në kundërshtim me ndonjë vendim të miratuar nga Bordi Drejtues i institucionit. Sipas tij, bëhet fjalë për një procedurë që ishte pjesë e një praktike tashmë të vendosur dhe të zbatuar më parë në institucion.

Megjithatë, siç thekson ai, drejtimi i një institucioni publik nënkupton përgjegjësi që nuk kufizohet vetëm në respektimin e normave ligjore, por kërkon edhe standarde të larta morale dhe etike, veçanërisht kur bëhet fjalë për besimin e publikut.

“Edhe pse nuk ka pasur qëllim për të shkelur ligjin, rregulloren apo ndonjë vendim, është bërë një lëshim i paqëllimshëm në vlerësimin e mënyrës se si një procedurë e caktuar mund të kuptohet nga publiku. Për këtë ndiej përgjegjësi morale dhe për këtë arsye e paraqes dorëheqjen”, thuhet në dorëheqjen e Oxhaklieskit.

Ai i ka kërkuar gjithashtu falje publikut për paqartësinë e krijuar dhe për lëshimin e paqëllimshëm, duke theksuar se kërkesa për falje është shprehje e respektit ndaj qytetarëve dhe institucionit të cilit i ka shërbyer.

“Muzeu Historik Kombëtar – Krushevë është një institucion me rëndësi të veçantë për kujtesën tonë kulturore dhe historike. Reputacioni i tij dhe besimi i publikut janë më të mëdha se çdo funksion dhe çdo individ që për një periudhë të caktuar e ushtron atë funksion”, thuhet në dorëheqje.

Oxhaklieski thekson se dorëheqjen e paraqet me ndërgjegje të pastër sa i përket përgjegjësisë ligjore, por me vetëdije të plotë për përgjegjësinë morale që mbart pozita e drejtorit të një institucioni publik.

Me këtë akt, siç thekson ai, i jep përparësi reputacionit dhe interesit të institucionit, përpara mbajtjes personale të detyrës.

Tre të akuzuar në rastin për falsifikimin e patentë shoferëve e kanë pranuar fajin dhe janë dënuar me burgim në procedurë të shkurtuar, përcjell TV21. Të akuzuarës së parë, e punësuar në Ministrinë e Punëve të Brendshme, i është shqiptuar dënim me burg prej dy vitesh e gjashtë muajsh, ndërsa i akuzuari i dytë dhe i treti janë dënuar me nga një vit e tre muaj burg. Për të tre është vazhduar masa e paraburgimit, njoftuan në një brifing në Gjykatën Themelore Penale Shkup.

Rasti ka të bëjë me futjen e paligjshme të kategorive në patentë shoferë, lëshimin dhe përdorimin e tyre. Nga Gjykata sqarojnë se bëhet fjalë për propozim-akuzë dhe, meqë nuk ka vlerësim të saj, menjëherë është caktuar seancë gjyqësore. Tre persona janë të paarritshëm për organet e drejtësisë, ndërsa për tre të tjerët, të cilët ishin në paraburgim, dje është mbajtur seancë, ku e kanë pranuar fajin dhe u janë shqiptuar dënime me burg.

Prokuroria Themelore Publike Shkup më 19 shtator ka ngritur propozim-akuzë kundër gjashtë personave për veprën penale të vazhduar “Falsifikim i dokumentit”, sipas nenit 378, paragrafi 3, në lidhje me paragrafin 1 të Kodit Penal.

E akuzuara e parë, e punësuar në Ministrinë e Punëve të Brendshme si këshilltare e re për dokumentet e udhëtimit në Departamentin për Çështje Administrative në Shkup, në periudhën nga shtatori i vitit 2020 deri në gusht të vitit 2026, në disa raste ka përdorur kodet e saj zyrtare për të ndryshuar patentë shoferët, duke u shtuar kategori, thuhet në aktakuzën e Prokurorisë.

Pesë të akuzuarit e tjerë janë shoferë të cilët, edhe pse nuk kishin dhënë provimin e vozitjes për kategoritë C dhe D, në marrëveshje me zyrtaren kanë paraqitur kërkesa për lëshimin e patentë shoferëve, në të cilat janë futur kategori për të cilat nuk i plotësonin kushtet ligjore.

Për tre të akuzuarit që janë të paarritshëm për organet e ndjekjes është propozuar caktimi i masës së paraburgimit pasi të kapen, ndërsa procedura ndaj tyre të vazhdojë në mungesë.

Në kuadër të të njëjtit rast, Prokuroria vazhdon me sigurimin e provave kundër edhe 21 personave të tjerë të dyshuar se kanë qenë ndërmjetësues ose përdorues të patentë-shoferëve të falsifikuar, ndërsa hetimi përfshin edhe abuzime të tjera të mundshme të lidhura me rastin.

Makineritë që po përdoren për ndërtimin e stadiumit të Shkëndijës në Haraçinë janë djegur, njoftoi kryetari i Komunës së Haraçinës, përcjell TV21. Ai tha se rasti po hetohet nga organet e rendit dhe bëri thirrje që përgjegjësit të zbulohen dhe të përballen me drejtësinë. Kryetari i Haraçinës theksoi se incidenti nuk do ta ndalë projektin dhe se punimet për ndërtimin e stadiumit do të vazhdojnë deri në përfundimin e tij.

“Djegia e makinerive që po punojnë në ndërtimin e stadiumit të Shkëndijës është një goditje ndaj një projekti që i shërben sportit, rinisë dhe zhvillimit të Haraçinës. Organet e rendit po hetojnë rastin dhe bëjmë thirrje që rasti të zbardhet sa më shpejt dhe përgjegjësit të dalin para drejtësisë. Por një gjë duhet të jetë e qartë: NUK NA NDAL ASKUSH. Punimet do të vazhdojnë. Projekti do të përfundojë. Stadiumi i Shkëndijës do të ndërtohet. Haraçina ka pritur 50 vite për këtë ditë. Nuk do të kthehemi prapa. Ata që duan ta ndalin zhvillimin, le ta dinë një gjë: Haraçina ka zgjedhur të ecë përpara. Sot mund të digjen makineri. Por nuk digjet vullneti për të ndërtuar. Stadiumi do të ndërtohet. Shkëndija do ta ketë shtëpinë e saj. Dhe një gjë tjetër duhet ta dinë të gjithë: nuk më frikësoni. Nuk ndalem përballë presionit, kërcënimeve apo pengesave. Unë do ta çoj këtë projekt deri në fund. Nuk ndalem derisa fëmijët e Haraçinës të shkelin në fushën e stadiumit të tyre. STADIUMI I SHKËNDIJËS DO TË NDËRTOHET!”, ka shkruar Daut Beqiri, kryetar i komunës së Haraçinës.