Presidenti i klubit të futbollit Botev, Ilijan Filipov, është vrarë gjatë natës në Plovdiv, raportojnë mediat bullgare, duke iu referuar Ministrisë së Punëve të Brendshme të Bullgarisë.
Tragjedia ka ndodhur derisa Filipov po kthehej në shtëpi pas një ndeshjeje futbolli. Sipas të dhënave paraprake, shkak i vdekjes ka qenë një plagë me armë zjarri në kokë.
Në një konferencë për media, policia dhe prokurorët konfirmuan vrasjen, por nuk dhanë detaje të tjera për shkak të fshehtësisë së hetimit.
Në vendin e ngjarjes aktualisht po zhvillohen veprime procedurale dhe hetimore. Autoritetet po hetojnë të gjitha pistat e mundshme lidhur me incidentin.
Filipov ishte edhe biznesmen i njohur dhe pronar i kompanive të transportit dhe ndërtimit.