Më datë 11 qershor 2025, në ambientet e Teatrit Shqiptar në Shkup, u mbajt ceremonia promovuese e Shoqatës për afirmimin e artit, kulturës dhe gruas “Gonxhet”, një organizatë e re që vjen si përgjigje ndaj nevojës për më shumë hapësirë, përfaqësim dhe vlerësim të gruas shqiptare në jetën kulturore dhe shoqërore të vendit.
Nën një atmosferë solemne e njëherazi të ngrohtë, të pranishëm ishin figura nga arti, kultura, akademia, diplomacia, përfaqësues të institucioneve dhe shoqërisë civile – të cilët mirëpritën themelimin e kësaj shoqate si një hap të guximshëm dhe të nevojshëm për kohën.
Ceremonia u hap me fjalën përshëndetëse të kryetares së shoqatës, znj. Miranda Hashani, e cila theksoi se “Gonxhet” nuk është thjesht një emër, por një mision – për të mbështetur, frymëzuar dhe afirmuar gruan përmes artit, kulturës dhe krijimtarisë.
Në vijim, fjalë rasti mbajtën edhe personalitete të mirënjohura si:
• znj. Mirlinda Kusari Purrini, kryetare e Shoqatës Afariste të Gruas “SHE-RA” nga Kosova,
• z. Avni Qahili, gazetar dhe autor tekstesh,
• znj. Valdeta Hajdari Kasapi, përfaqësuese e ITSHKSH-së,
• Prof. Dr. Veland Ramadani, profesor universitar,
• si dhe këngëtarja e njohur Edona Llalloshi – të cilët përçuan mesazhe inkurajuese për misionin e shoqatës dhe rolin e saj në promovimin e barazisë përmes artit dhe kulturës.
Mbrëmja u pasurua nga një program artistik i kuruar me kujdes, ku publiku pati rastin të përjetojë:
një monolog emocional nga Elhame Bilalli,
performanca violinistike nga Dea Taipi dhe Endrit Zajmi,
një krijim “live” i një luleje Gonxhe nga Afërdita Kiki, dhe në fund Miranda Hashani riktheu këngën “Më foli zemra” duke rikujtuar që kjo këngë ju ndërpre shumë vite më parë dhe se ajo e ruante si një kujtim të çmuar, duke theksuar se kënga ishte ndër të preferuarat e ikonës së muzikës shqiptare, Nexhmije Pagarusha.
Ngjarja u përmbyll mes duartrokitjeve dhe mesazheve të mbështetjes, duke dëshmuar se “Gonxhet” vjen si një zë i ri dhe i nevojshëm në peizazhin kulturor dhe shoqëror shqiptar.