Ndërtime të larta në Butel, por a ka mjaftueshëm parkingje? Banorët druajnë nga kaosi urban

Kjo është një ndërtesë 12 katëshe në rrugën Hristijan Todorovski Karposh në lagjen Butel të Shkupit. Për këtë dhe të tjera shpesh ka pasur reagime, e madje për disa edhe protesta të banorëve të cilët druajnë se jo vetëm që po u zihet drita, por po u merret edhe hapësira për parking. Objekti konkret ka vetëm 1 kat parkim nëntokësor, por investitori siguron se nuk do të ketë problem të me parkimet.

-Duhej të ndërtoheshin 1 apo 2 nivele?
-Nuk është e rëndësishme kjo. Ajo nuk është rregull. Ne kemi një nivel i cili në të gjithë parcelën bodrumi është bërë në një nivel. Në këto hapësira parkimi që i shihni këtu, të gjitha makinat, për të gjithë banorët, madje edhe për 2 makina për një apartament, këtu mund të parkohen në mënyrë komode.
-Por a janë shitur dhe sa ka interes për blerjen e vendeve për parkim?
-Një pjesë e aparamenteve janë shitur, një pjesë jo. Por ato që janë shitur, të gjithë të mos them 95% kanë blerë hapësirë për parkim. Pse? Sepse kushtet për blerjen e një vendparkimi ishin shumë praktike. Një vendparkim e shesim për 3000-4000 euro. Në Fushë Topanë, Çair, Karposh nën 10-15 mijë nuk mund të blesh hapësirë parkimi- deklaroi Vullnet Selimi, Investitor.

Objektiështë në hapësirë prej rreth 3000 metrave katrorë.

-Këtu, nuk na është dhënë aqsa na takon. Në të gjitha komunat e tjera në Shkup me këtë parcelë që ne e posedojmë, marrin leje për ndërtesa më të mëdha. Partneri im Fatmir Etemi shumë kujdesej deri ku duhet të ndërtojmë, që të mos dalim nga pikat e parapara. Na takonte edhe më shumë.- shtoi Vullnet Selimi, Investitor.

Banorët e kësaj ane druajnë se Buteli nga lagja urbane do të kthehet në kaos urban. Për shqetësimet e butelasve e pyetëm kryetarin aktual të komunës, Darko Kostovskin, të cilin dy ditë e kërkojmë me telefon, porsot e takuam në një ngjarje.

-Pse nuk jeni i kapshëm për mediat?
-Ku më kërkuat?
-Me telefon.
-E gjithë kjo ndërtesë është ndërtuar gjatë mandatit të Velimir Smilevskit dhe pyetjen duhet t’ia parashtroni atij. Edhe unë e pyeta para fushatës. Në lidhje me atë se si është rregulluar, besoj se është sipas ligjit- pohoi Darko Kostovski, Kryetar i Butelit.

Kostovski shton se angazhohet që e gjithë kjo që ka ndodhur gjatë mandatit të kaluar që të mos ndodh në të ardhmen, për shkak se, siç tha, komunës së Butelit nuk i duhen ndërtesa por jetë e qetë.

Kohë më parë në Butel ka pasur edhe protesta nga banorët për ndërtime të tjera në këtë lagje, të cilët ankoheshin se po u zihet drita e diellit nga ndërtimet e shumta dhe të larta.