Hotelierët me kërkesa të reja deri te Qeveria! Me pakon e pestë të përfshihen pesë kërkesat e tyre

Pesë kërkesa të reja të hotelierëve deri te qeveria. Do të insistojnë që kërkesat e tyre të përfshihen me pakon e pestë ekonomike kundër krizës. Ata u shprehën të pakënaqur për shkak se nuk kanë marrë pjesë në mënyrë aktive në krijimin e pakos së re ekonomike. Sot Qeverisë ia dërguan pesë kërkesat e tyre. Shteti dhe Qeveria duhet të ndërmarrin obligim dhe përgjegjësi të plotë për ekzistencën e industrisë së hotelerisë deri në përfundimin e pandemisë duke krijuar masa të veçanta ekonomike për ndihmë financiare dhe ndihmë të pakthyeshme, thuhet në kërkesën e shkruar të hotelierëve.

 “Masa e parë është kërkesë në lidhje me vazhdimin e subvencionimit të rrogave për të punësuarit në industrinë e hotelerisë dhe kjo të jetë pa kushte. Kërkesa e dytë është grant, ndihmë e pakthyeshme për klubet e natës dhe restorante të kategorizuara dhe e njëjta të vlejë për të gjithë hotelierë. Masa e tretë është qasje e shpejtë deri te kreditë e paralajmëruar pa interes”, deklaroi Zdravko Josifovski – Oda e Pavarur e Hotelierëve.

Përmes kredive pa interes, Josifovski sqaroi se hotelierët do të mund të marrin hua prej bankave komerciale, të marrin kredi për t’i paguar obligimet dhe humbjet prej periudhës së fundit. TVSH e sheshtë sipas premtimeve në 10% për të gjithë shërbimet hotelierike në të gjitha objektet e hotelerisë, kjo është masa e katërt e hotelierëve. Kërkesa e fundit është prolongim i të gjitha proceduarve të përmbaruesve, për shkak të, siç thonë, pamundësisë për t’i paguar me kohë obligimet, si pasojë të masave restriktive me të cilat u ballafaquan periudhën e fundit. Nga Qeveria këto ditë arriti konfirmim se ka para për pakon e pestë ekonomike. Kryeministri Zaev tha se gjithçka do të varet prej kohëzgjatjes së krizës. Nëse e njëjta zgjat pak më gjatë, atëherë do të nevojitet rebalanc i ri i Buxhetit për t’i siguruar paratë e nevojshme.

 “Shteti tashmë ka  siguruar 50 milionë euro për programin Covid, në mënyrë shtese ka 17 milionë euro për rroga, nëpër resorët ka rreth 30 milionë euro. Shpresojmë se nuk do të jenë përsëri 12 muaj, por se do të jenë një dy tre muaj varët nga vaksina. Nëse kriza, mos dhasht zoti, zgjat, do të bëjmë rebalanc të Buxhetit dhe do të sigurojmë para”, potencoi Zoran Zaev – Kryeministër i Maqedonisë së Veriut.

Gjatë krijimit të çdo pakos së re, Qeveria kontakton me një pjesë të odave, por jo edhe me odën tonë, ankohen hotelierët. Ata nuk dinë nëse kërkesat e tyre do të përfshihen dhe nëse do të thirren në takim në Qeveri. Me krijimin e drejtë të pakos së pestë ekonomike e cila hotelierëve ua garanton ekzistencën, hotelierët do të mund t’i ruajnë në mënyrë të përhershme vendet e punës të të punësuarve në këtë sektor, thuhet në paralajmërimin e tyre që ia dërguan Qeverisë.