Deputeti i VLEN-it Shaqiri me propozim për LSDM-në: Tërhiqeni ligjin për branitellat, e përpilojmë një të përbashkët edhe për UÇK-në

Deputeti i koalicionit VLEN, Rijad Shaqiri, i është përgjigjur propozimit të djeshëm të zëdhënëses së LSDM-së Bogdanka Kuzevska, e cila duke folur në DailyClick të TV21, tha se mund të kërkohet zgjidhje ligjore për statusi i ish-ushtarëve të UÇK-së. Shaqiri u kërkon socialdemokratëve ta tërheqin propozim-ligjin për ndryshimin e ligjit për Branitellat dhe bashkë të arrijnë në një Ligj të përbashkët kur do të përfshiheshin edhe ish ushtarët e UÇK-së.

“Ja unë nga këtu u bëj thirrje të gjithë përfaqësuesve politik edhe përfaqësuesve të LSDM-së, le të urdhërojnë ta tërheqin ligjin në fjalë, ulemi që nga nesër e përpilojmë një ligj të përbashkët, ku do t’i përfshijmë edhe ish ushtarët e UÇK-së dhe gjithë të inkuadruarit në luftën e 2001-shit, ku do të bëjmë një zgjidhje të përhershme dhe Maqedonia njëherë e përgjithmonë do ta zgjidhë çështjen e ish ushtarëve të UÇK-së dhe pjesëtarëve të forcave të armatosur, dhe njëherë e përgjithmonë do t’i drejtohemi rrugës së integrimeve europiane dhe nuk do të merremi me çështjet të cilat i takojnë të kaluarës”, tha Rijad Shaqiri.

Në Daily Click, Kuzeska duke folur rreth propozim-ligjit për Branitellat, u shpreh se mund të flitet edhe për pjesëtarët e UÇK-së, gjersa akuzoi kryetarin e kuvendit Gashin për standarde të dyfishta.

TV21: Kjo do të thotë se jeni të hapur për ndryshime të propozim zgjidhjes ligjore duke i përfshirë në të edhe pjesëtarët e UÇK-së?

“Se mund të kërkohet zgjidhje”, tha Bogdanka Kuzeska.

TV21: Në të njëjtën zgjidhje ligjore?

“Këtë nuk mund ta dija, sepse propozues është Sllavjanka Petrovska. Por atë që e dimë si parti, është se mund të flitet dhe të kërkohet zgjidhje”, tha Kuzeska.

Deputetja e LSDM-së Petrovska ka dorëzuar në Kuvend propozim-ndryshime të ligjit për Branitellat, që parasheh rritje të kompensimit financiar për invalidët dhe familjet e pjesëtarëve të ARM-së që humbën jetën në konfliktin e vitit 2001 por edhe të zgjerohet edhe me pjesëtarë të tjerë të ish pjesëtarëve të forcave të sigurisë. Ligji ka mbetur i bllokuar në Komisionin kuvendor për Politikë sociale që drejohet nga deputetja e FE-së Ilire Dauti.