Me vete kanë marrë faturat e ujit e janë mbledhur në mes të lagjes.
Këto janë banorët e lagjes së Vizbegut ku thonë se pa përdorur ujin ju kanë ardhur faturat.
Sipas tyre, prej vitesh kjo lagje s’ka pasur ujë të pijshëm, thonë se për borxhin për të cilin ujin nuk e kanë shfrytëzuar janë ankuar edhe tek ujësjellësi për faturat e larta.
“S’kemi pasur ujë hiç, jo se nuk e kemi shfrytëzuar por nuk kemi pasur pikë uji. Prej vitit 2006 e këndej deri në vitin 2016 pikë uji s’ka pasur kjo lagje, e kanë bërë llogarinë vjetore edhe ta ka dërguar faturën ashtu paushall nuk kanë ardhur as me kontrollu ujin. Këto janë fakte të gjalla që i kemi nga Ujësjellësi ku thonë se këto persona shfrytëzojnë puset dhe këto fakte janë të atyre”, tha Musa Fera – banor.
Edhe Hajredin Kamberi banor i lagjes 37 të Vizbegut thotë se janë ankuar edhe tek Ujësjellësi për hallin e tyre por deri më tani nuk ka një zgjidhje.
Hajredin Kamberi: “Borxhi është 2-3 mijë euro secila shtëpi këtu ka nga 3-4 mijë euro krejt lagjeja”.
TV21: Sa shtëpi jeni këtu?
Hajredin Kamberi: “130 shtëpi më së paku në këtë lagje janë. Ujë s’kemi pasur ose ka rrjedhur kapak, dhe s’ka mundur që të furnizojë lagjen”.
Zoran Nedevski, udhëheqësi i sektorit të pagesave në ndërmarrjen publike Ujësjellësit thotë se patjetër duhet të paguhet borxhi dhe se nuk ka se si të bëhet ndryshe duke theksuar se ujë atje banorët kanë pasur që nga viti 2000. Ai shtoi se personat që kanë përdorur ujin nga puset sigurisht se nuk paguajnë por do të paguajnë për kanalizimin që kanë përdorur.
“Disa prej banorëve po ashtu shfrytëzojnë ujin e puseve, megjithatë ujin e drejtojnë tek sistemi i kanalizimit tonë. Dhe marrin faturat vetëm për shërbimin e drejtimit të ujit tek sistemi jonë i kanalizimit. Dua të theksoj dhe të potencoj të gjithë qytetarët që shfrytëzojnë ujin e bunarit duhet të kenë një matës të ujit për të matur sasinë e ujit në sistemin e kanalizimin të faturohet vetëm uji që drejtohet dhe pastrohet tek kanalizimi dhe jo për furnizimin me ujë se ne nuk e bëjmë”, deklaroi Zoran Nedevski – Udhëheqës i sektorit të pagesave të Ujësjellësit.
Përmbaruesi ju ka dhënë afat 10 ditë banorëve të kësaj lagje të paguajnë borxhin e mbetur, por banorët thanë se do të marrin edhe një avokat dhe do të ankohen për faturat e larta.