Lideri i Alternativës, Afrim Gashi ka kujtuar 11 shtatorin e vitit 2001, ku Kullat Binjanke në Nju-Jork të Amerikës ishin në cak të sulmeve terroriste.
“Dita e sotme para 20 viteve ka qenë një ditë shokuese për të gjithë ne. Miku dhe aleati strategjik i shqiptarëve – Shtetet e Bashkuara të Amerikës – ishte goditur nga një sulm terrorist, në të cilin e humbën jetën rreth 3.000 njerëz ta pafajshëm. Në kohën kur rajoni ynë sapo kishte dalë shpëtuar nga era e barotit, për çka na kishin ndihmuar pikërisht miqtë amerikanë, sulmi terrorist në Nju-Jork na tronditi pa masë. Edhe sot kur i kujtojmë, ato skena janë traumatike dhe tronditëse. Dhe, pas 11 Shtatorit bota ndryshoi pakthyeshëm. Armiku i padukshëm – terrorizmi – u bë tmerri që na bashkoi të gjithëve për ta mbrojtur njerëzimin dhe njerëzoren. Duke e kujtuar 20-vjetorin e këtij sulmi, edhe një herë e përsërisim se miqësia jonë me SHBA-në është e fuqishme dhe strategjike, ndërsa ne jemi përjetë mirënjohës që ky Mik i Madh i yni ishte me ne në çastet tona më të vështira”, shkroi Gashi, transmeton TV21.