Nëse deri në muajin mars nuk sillet aktvendim për lëndën Target-Fortesa, ish shefit të DSK-së Sasho Mijallkov ekziston mundësia t’i bie akuza për veprën penale, ndikim mbi shkatërrimin e dy sistemeve të ndjekjes së komunikimit, thonë nga shoqata Thjerrëza e gjelbër.
Në nëntor të vitit 2018, Mijallkovit iu shqiptua paraburgimi i parë për këtë rast.
“Në Target-Fortesa për 3 vepra, në shkurt vjetërsohet njëra akuzë dhe do të mbetët vetëm me dy akuza. Nëse Sasho Mijallkov ka qenë pozitiv me Covid-19 dhe ka qenë në izolim, janë anuluar seancat atëherë përse avokatët e tij përfaqësojnë lëndë të tjera, a duhet edhe ata të jenë në izolim”, tha Vasko Todorovski – shoqata “Thjerrza e Gjelbër”.
Nga gjykata Penale thonë se asnjëra nga veprat për të cilët akuzohet Mijallkov deri në këtë moment nuk është vjetërsuar.
“Asnjëra nga veprat penale për të cilat akuzohet tek lënda Target-Fortesa, deri në këtë moment nuk është vjetërsuar. Gjykata Penale Shkup informon publikun se lënda ende është aktive dhe po zhvillohet për të gjitha akuzat për të cilat akuzohet në aktakuzë”, thonë nga Gjykata Penale –Shkup.
Ndryshe në këtë lëndë, Mijallkov ngarkohet edhe me dy akuza si “keqpërdorim të detyrës dhe autorizimeve zyrtare” dhe “shoqëri kriminele”, akuza këto që tani për tani nuk mund të vjetërsohen, për shkak se janë më të rënda.
Në lëndën Target- Fortesa gjithsej 177 persona deri më tani kanë parashtruar kërkesë për dëmshpërblim për më së paku 25 milion euro për përgjimin joligjore që iu është bërë. Përveç kësaj lënde, ish shefi i DSK-së për momentin akuzohet edhe në disa lëndë të tjera si “Tortura” për arrestimin e Lube Boshkoskit, më pas në rastin “Arka” (Trezor) për porositjen e pajisjes për Drejtorinë e pestë e cila për momentin është në procedurën e dëshmive, ndërsa në lëndën Titanik 2, i janë shqiptuar 3 vite burg për parregullsi zgjedhore.