Me presione dhe kërcënime të caktuara, por në përgjithësi zgjedhjet kaluan në mënyrë të drejtë dhe demokratike. Kështu, sekretari gjeneral i VMRO-DPMNE-së dhe shef i Shtabit Zgjedhor, Igor Janushev e vlerësoi votimin në rrethin e parë të zgjedhjeve presidenciale, pas përfundimit të ditës zgjedhore.
“Patëm fushatë zgjedhore me një sërë shkeljesh dhe le të kujtoj për përndjekjen, trysnitë e pushtetit dhe rrethanat në të cilat e zhvilluam këtë betejë. Por, do të përmend se në përgjithësi patëm një ditë të qetë zgjedhore”, tha Igor Janushev, shef i shtabit zgjedhor.
Me vlerësim të ngjashëm doli edhe zëdhënësi i VMRO-DPMNE-së, Dimçe Arsovski. E pyetëm nëse vlerësimi i këtillë do të thotë se dyshimet për falsifikim të zgjedhjeve për të cilat vazhdimisht ka folur lideri i partisë, Mickoski, kanë rënë në ujë?
“Do të mbes në qëndrimin se i gjithë procesi zgjedhor ka kaluar në atmosferë të drejtë dhe demokratike. Kemi pasur, ndoqëm përmes mediave, raste ku kishte dyshime për ryshfet zgjedhor, por kjo është puna e institucioneve të cilat duhet ta dëshmojnë këtë”, u shpreh zëdhënësi i VMRO-DPMNE-së, Dimçe Arsovski.
Ndryshe, Mickoski gjatë fushatës vazhdimisht përsëriste se dyshojnë se pushteti po përgatitet për t’i falsifikuar zgjedhjet, siç tha, ngjashëm siç ndodhi me referendumin. Dyshimet e këtilla, lideri i opozitës i ka shfaqur edhe gjatë takimeve me përfaqësuesit ndërkombëtarë, gjë që në opinionin publik interpretohej se VMRO-DPMNE-ja po përgatit terrenin për të thirrur në bojkot, nëse ka rezultat të dobët.
“Zoran Zaev dëshiron t’i vjedhë zgjedhjet presidenciale”
G: A keni dëshmi për këtë?
“Pas votimit për 2,4 sekonda dhe deri më tani nuk është proceduar asnjë padi penale. A duhet të ketë dëshmi më të madhe se kjo”, deklaroi Kryetari i VMRO-DPMNE-së, Hristijna Mickoski.
VMRO-DPMNE-ja për votimin në rrethin e parë zgjedhor deri te Komisioni Shtetëror i Zgjedhjeve ka dorëzuar mbi 10 ankesa. Ato kryesisht kanë të bëjnë me mospërputhjen e raporteve finale të numrit të fletëvotimeve me numrin e votuesve që kanë dalë në votim, lejimin që të votojnë personat që nuk janë në Listën Zgjedhore, fletëvotimet e shkëputura nga libri zgjedhor bashkë me numrin serial etj. Nga opozitarja theksojnë se këto ankesa nuk do të ndikojnë mbi rezultatin e raundit të parë zgjedhor.
Përgatiti: Svetllana Unkovska