VMRO-DPMNE akuza kundrejt Osmanit / “Ka folur vetëm shqip në vizitë zyrtare”

VMRO-DPMNE kërkon dorëheqje nga ministri për Punë të Jashtme Bujar Osmani për shkak se në takimin me ministrin e Jashtëm të Spanjës, José Manuel Albarez Bueno, Osmani sipas tyre ka folur vetëm në gjuhën shqipe, duke anashkaluar kështu gjuhën maqedonase. Nga kjo parti kërkojnë që të ketë përgjegjësi penale dhe organet përkatëse të vendit të reagojnë menjëherë.

“Kjo është me e pakta që mund të bëj pas një lëvizje të tillë jo shtetërore, e cila është poshtëruese ndaj të gjithë qytetarëve të Maqedonisë. E turpshme, jo shtetërore dhe poshtëruese është sjellja e Bujar Osmanit i cili në cilësi të ministrit të Jashtëm në takim ndërkombëtarë nuk e përdorë gjuhën maqedonase si gjuhë zyrtare të Republikës së Maqedonisë. Përkatësisht nga vizita zyrtare e Osmanit me ministrin për Punë të Jashtme të Spanjës nëpërmjet konferencës për media shihet qartë se Osmani përdorë vetëm gjuhën shqipe”, tha Marija Miteva, zëdhënëse e VMRO-DPMNE-së.
Por në çfarë gjuhë foli në të vërtetë Osmani dhe si e prezantoi Maqedoninë e Veriut në konferencën e organizuar për media bashkë me homologun e tij spanjoll.

“Mirë se erdhe kolegu im i nderuar José Manuel Albarez Bueno ministër për Punë të Jashtme i BE-së dhe bashkëpunimit me Mbretërinë e Spanjës. Vend ky me të cilin po krijojmë gjithnjë më shumë partneritet dhe miqësi…

“Më lejoni që t’i uroj mirëseardhje kolegut tim të nderuar José Manuel Albarez Bueno ministër për Punë të Jashtme i BE-së dhe bashkëpunimit me Mbretërinë e Spanjës. 8 muaj më parë patëm vizitën historike të kryeministrit Pedro Sançez…,” ishte shprehur Bujar Osmani, ministër i Jashtëm.

Osmani edhe në pyetjet e gazetarëve është përgjigjur edhe në dy gjuhë. Akuzave të VMRO-DPMNE-së i janë kundërpërgjigjur nga ministria e Jashtme nga ku edhe i përgënjeshtrojnë në tërësi akuzat e kësaj partie.

“Në interes të së vërtetës, na lejoni t’i demantojmë plotësisht informacionet për zbatimin e papërshtatshëm të Ligjit për përdorimin e gjuhëve gjatë takimeve dhe/ose konferencës për media me Ministrin e Punëve të Jashtme të Mbretërisë së Spanjës, José Manuel Albarez Bueno. Zbatimi i Ligjit për Gjuhët në të gjitha ngjarjet e organizuara nga Ministria e Punëve të Jashtme, të cilat, meqë ra fjala, janë të shpeshta, publike dhe të shumta, zbatohet gjithmonë si duhet. Në çdo ngjarje, Ministri i drejtohet publikut vendas në dy gjuhët zyrtare të përcaktuara me Kushtetutë dhe Ligjin për Gjuhët, me ç’rast Ministria ofron përkthim të duhur për mediat e pranishme”, thonë nga Ministria e Punëve të Jashtme.

Nga dikasteri i diplomacisë kërkojnë që VMRO-DPMNE të kërkoj falje publike për krijimin e panevojshëm të konfuzionit në opinion mbi baza etnike, duke nxitur kështu tensione dhe ndarje etnike në shoqëri.