4 shkolla të mesme u kanë kërkuar nxënësve para për përgatitjen e dëftesave, thonë nga Unioni i Shkollave të Mesme, edhe përkundër faktit që dëftesat janë falas dhe përgatitja e tyre duhet të kryhet falas nga ana e kujdestarëve. Nga UNSHM-ja kërkojnë nga Inspektorati i Arsimit që urgjentisht të publikojë raportin nga inspektimi që ka kryer në këto shkolla.
“Më 14 qershor komunikuam me Inspektoratin dhe kërkuam nga ky institucion që ta na dërgojë raportet e lartpërmendura. Për fat të keq deri sot ende nuk e kemi marrë të njëjtin. Shpresojmë që në ditët në vijim Inspektorati do t’i dërgojë këto raporte në adresën e UNSHM-së. Sot ne ju drejtohemi këtyre shkollave drejtpërdrejt, ne e dimë se kush jeni ju, ju vetë e dini se kush jeni, ktheni paratë sepse kjo është mënyra e vetme për ta zgjidhur këtë problem”, tha Era Aliu nga UNSHM-ja.
Nga Inspektorati Shtetëror për Arsim nuk deshën të japin detaje se çka është gjetur nga inspektimi që është bërë në shkolla, por vetëm shkurt informojnë se raporti do të publikohet nesër.
“Jemi nga përfundimi. Po presim që nesër t’i publikojmë raportet”, deklaruan nga Inspektorati Shtetëror i Arsimit.
E edhe pse ka raste të që është paguar për dëftesa, të njëjtat edhe mungojnë. Nga Byroja për Zhvillim të Arsimit kanë informuara se pandemia me virusin korona ka shkaktuar probleme edhe tek furnizimi me dëftesa, për këtë arsye nxënësit duhet të presin deri në fund të vitit për t’i marrë.
Ditë më parë, pas reagimit të Lidhjes së nxënësve të shkollave të mesme, Ministria e Arsimit konfirmoi se ka pasur raste të izoluara në disa shkolla ku janë paguar dëftesat, ndërsa shtuan se shkollat nuk guxojnë të marrin të holla nga prindërit dhe nxënësit për lëshimin e dëftesave. Rikujtojnë se pagesa e dëftesave bie në kundërshtim me Kushtetutën dhe ligjet.