Forcat ruse kryen sulme dhe granatime të reja në periferi të kryeqytetit Kiev dhe qytetin perëndimor Llavov afër Polonisë. Sulmet raketore në periferi të Llavovit ishin goditja më e afërt deri te qendra e qytetit, i cili u shndërrua në udhëkryq për njerëzit që ikin nga pjesët e tjera të Ukrainës dhe njerëzit që hyjnë për të ndihmuar apo për të luftuar, transmeton TV21.
“Sot ishte kryer një sulm mbi Llavovin. Alarmi kundërajror reagoi, forcat e armatosura (faleminderit shumë) reaguan. Ishin rrëzuar disa raketa të lansuara nga Deti i Zi. Siç e dini, katër prej tyre goditën një fabrikë për riparim të aeroplanëve”, tha Maksim Kozicki, guvernator rajonal i Llavovit.
Në ndërkohë, liderët botërorë angazhohen që të nisë një hetim për sulmet e reja mbi caqet civile, duke përfshirë shkolla, spitale dhe objekte banimi.
“Kjo është një çmenduri. Është një objekt për fëmijë të moshës parashkollore. E shihni sa është dëmtuar objekti për fëmijë të moshës parashkollore. I falënderoj Zotit që askush nuk ishte brenda çerdhes dhe shkollës. 6 ndërtesa ishin dëmtuar dhe askush nuk mund të jetojë më në to. Tani duhet të presim njerëz. Por, ja edhe një fakt – lufta është kundër civilëve. Këtu nuk shoh ushtarë, kjo nuk është asnjë bazë ushtarake, por këtu ka vetëm banesa, banesa civile”, tha Vitalij Kliçko, kryetar i Kievit.
Rusët vazhdojnë të pohojnë se bëhet fjalë për një operacion special dhe se avancojnë në drejtim të realizimit të qëllimit të tyre.
“Në Mariupoll, njësitë e Republikës Popullore të Donjeckut të mbështetura nga forcat e armatosura ruse, e ngushtojnë rrethin dhe luftojnë kundër nacionalistëve në qendrën e qytetit”, tha Igor Konashenkov, zëdhënës i Ministrisë së Mbrojtjes së Rusisë.
Deri më tani, siç bëjnë me dije autoritetet lokale, Mariupolin e kanë braktisur rreth 30.000 civilë. Kuvendi i Qytetit të Mariupolit, kumtoi se “janë shkatërruar 80% e banesave”, kurse rreth 350.000 banorë po qëndrojnë në strehimoret dhe bodrumet e tyre.
Afër 130 njerëz janë shpëtuar nga bodrumi i teatrit i cili ishte goditur nga sulmet ajrore ruse në qytetin jugor Mariupoll, njoftuan zyrtarët. Qindra persona fshiheshin në këtë teatër, i cili shërbente si strehimore për civilët e shpërngulur. Serhi Taruta, ish-shef i rajonit të Donjeckut, tha se përpjekjet për shpëtim janë penguar për shkak të mosfunksionimit të shërbimeve sociale dhe frikës se sulmet ruse mund të përsëriten./TV21