Tetovë, në dy xhami nuk u fal namazi i Bajramit! Abazi: Asnjëherë s’kam respektuar vendimet e Reis Sulejman Rexhepit

Vendimi për faljen e namazit të Fitër Bajramit nuk është respektuar nga dy imamë të xhamive në Tetovë. Dyert e xhamive të fshatit Poroj dhe Glloxhë këtë mëngjes ishin të mbyllura. Imami i xhamisë së fshatit Poroj Maksut Abazi thotë se këtë vendim e ka marrë për sigurinë e qytetarëve duke e marr parasysh  situatën me Covid-19 dhe mendimin e ekspertëve.

“Duke parë se çfarë ndodh në Botë, duke parë rrezikun  nga ky virus  vdekjeprurës dhe  duke parë parasysh shtetet si Arabia Saudite që është Meka, qendra ku besimtarët për çdo lutje drejtohen nga ajo pesë herë në ditë  është e mbyllur në shtetrrethim  me orë policore, Turqia andej, nuk mbetet arsye që ne ti hapim xhamitë. Këto vendime që merren janë ekspertët  jo ne hoxhallarët”, tha Maksut Abazi, imam i xhamisë së Porojit.

Maksuti shkoi edhe më tej duke thënë se ai asnjëherë nuk është pajtuar me vendimet e Reis Ulemasë Sulejman Rexhepi që nga viti 2006 kur është zgjedhur ai në krye të BFI-së , duke thënë se edhe paratë e besimtarëve i ka investuar në xhami dhe fshat.

“Unë mendoj se Bashkësia Fetare si institucion me dekada  sidomos dekadën  e fundit nuk ka mbrojtur interesin e besimtarëve  se kjo luftë nuk është tash është disa dekada  andej vendosëm që më të jetë fundi  dhe njëherë e përgjithmonë të ndahen dhe dallohen  shallëbardhit nga fytyrizinjtë. Unë të hollat me fitra  që nga viti 2000 që kanë ardhur si imam i kamë mbajtur këtu  i kamë shfrytëzuar për mirëmbajtjen e xhamisë  dhe jashtë oborrit të xhamisë kamë punuar me gjelbërime  me  zbukurime të trotuareve  nga vetë fondi i qytetarëve “, tha Maksut Abazi, imam i xhamisë së Porojit.

Megjithatë të gjitha xhamitë e tjera në Tetovë dhe rrethinë kanë falur namazin e Fitër Bajramit. Imami i xhamisë së Larme në Tetovë tha se  besimtarët kanë qenë të njoftuar me kushtet që duhet t’i përmbushnin  për të kryer ritet fetare në xhami.

“Falënderoj donatorët që kanë sjellë maska kështu që kemi pas mundësi që  ata që nuk kanë pasur maska  kanë mund të marrin në xhami që t’i plotësojnë të gjitha kushtet.  Edhe udhëzimet janë në vende të caktuara  dhe çdo besimtar mund ta merr fletët dhe të njoftohet me kushtet që duhet t’i plotëson. Mendoj se ne u kemi dhënë udhëzime besimtarëve dhe kushtet plotësohen“, tha Abdylbaki Kasami, imam i xhamisë së Larme.

Për shkak të numrit të madh besimtarët nuk kishin mundësi të ruajnë  distancën sociale, megjithatë ata  në hyrje të xhamisë  dezinfektoheshin dhe ishin të obliguar që të mbanin maska. Ndërsa para dhe pas namazit  të gjithë xhamitë në Tetovë kanë qenë të dezinfektuara. Imamët kanë bërë apel që vizitat nëpër familjarë të mos realizohen për shkak të evitimit të përhapjes së virusit.