Banorët e lagjes Dardania në qytetin e Tetovës për çdo ditë janë duke e duruar erën kundërmuese të një pjese të kanalizimit të qytetit. Rreth 25 metra kanalizim është i hapur në këtë lagje. Autoritetet komunale për vite të tëra nuk kanë gjetur zgjidhje për këtë problem. Banorët kërkojnë nga komuna që sa më shpejt të zgjidhet pasi nuk i le të qetë në shtëpitë e tyre.
“Kemi kërkuar nga autoritetet komunale që të vijnë dhe të zgjedhin problemin e këtij kanalizimi të hapur i cili me vite të tëra po pengon banorët e lagjes “Dardania” nga ku kundërmon erë e keqe dhe e padurueshme veçanërisht në ditët e verës, mirëpo nuk kemi hasur në mirëkuptimin e autoriteteve komunale”, tha Artan Etemi, banor i lagjes “Dardania”.
“Realisht pengon shumë sidomos në kohën e verës kur temperaturat ngriten, është një erë e padurueshme që na pengon tepër natën edhe dritaret nuk mund ti mbajmë hapur se kundërmon erë shumë e keqe”, tha Besnik Mustafi, banor i lagjes “Dardania”.
Nga komuna e Tetovës thonë se tashmë kanë projekt që përfshin shtratin e lumit si dhe rrugën në këtë pjesë të kësaj lagje, por për shkak të pandemisë dhe për shkak të zgjedhjeve punimet kanë ngelur pa filluar.
Grafike Komuna e Tetovës:
“ Për rajonin në fjalë, në lagjen Dardania që përfshin dhe rrugën “29 Nëntori” kemi projekt final i cili është në kofinancim edhe me Qeverinë ose Ministrinë për implementimin e jetës së etnitetit rom por që pranvera e këtij viti na ka zënë fillimisht me shpalljen e zgjedhjeve të jashtëzakonshme e më pas edhe Pandemia me Covid 19”
Banorët e kësaj lagje druajnë se gjatë verës mund të paraqitet ndonjë epidemi, pandemia e Covid 19 ka bërë që ata të jenë edhe më të frikësuar për jetën e tyre dhe të fëmijëve të tyre. Derisa Qeveria dhe komuna të zgjidhin këtë problem, banorët e lagjes “ Dardania” do të duhet të zgjohen dhe të bien në gjumë me erën e kanalizimit të qytetit të Tetovës.