Partitë politike po matin forcën në Tetovë se kush do të sigurojë shumicë në Këshillin komunal të Tetovës. Kryetari i komunës, Bilall Kasami, pas votimit tha se pret që qytetarët të kenë votuar një Këshill i cili do të miratoj projekte dhe programe për të mirë e përgjithshme të Tetovës.
“Një përfaqësues i cili do të jetë zëri i tyre për të realizuar projekte zhvillimore për Tetovën. Për një Tetovë të cilën të gjithë e duam, për një Tetovë e cila do të ju krijojë mundësi të gjithë qytetarëve të saj pa marrë parasysh përkatësinë etnike, fetare dhe politike dhe për këtë angazhohemi ne”, tha Bilall Kasami, kryetar i komunës së Tetovës.
Bartësi i listës së këshilltarëve të Lëvizjes Besa, tha se këto zgjedhje janë të rëndësishme për Tetovën.
“Këshilli komunal është një organ tepër i veçantë dhe i rëndësishëm për komunën e Tetovës sepse të gjitha problemet që i ka qyteti zgjidhen nëpërmjet Këshillit”, tha Besar Durmishi, bartës i listës së këshilltarëve të Lëvizjes Besa.
Për Faton Ahmetin nga BDI, dita e sotme është festë.
“Me votën e tyre kanë mundësi të zgjedhin përfaqësuesit e tyre në kuadër të Këshillit komunal, përfaqësues të cilët do të jetën në shërbim të qytetarëve për të përmirësuar jetën e qytetarëve, për të ideuar, për të krijuar dhe buxhetor projekte të cilët do të kenë për qëllim një jetë më të mirë për të gjithë qytetarët e Tetovës”, pohoi Faton Ameti, bartës i listës së këshilltarëve të BDI-së.
Zgjedhjet e sotshme bartësi i listës së këshilltarëve të PDSH-së i sheh si rezultat i paaftësisë së kryetarit aktual Kasami.
“Shpresojmë se qytetarët do ta bëjnë ndryshimin dhe do të na votojnë neve. Pasi që nga kryetari aktual i kishim këto zgjedhje të parakohshme dhe ne nuk do të tolerojmë që të ndodhë përsëri e njëjte. Gjithashtu ne do të jemi zëri i qytetarëve në Këshillin e Tetovës ku edhe do të jemi organi korrigjues i kryetarit të komunës së Tetovës”, pohoi Visar Palloshi, bartës i listës së këshilltarëve të PDSH-së.
Nga ASh-ja thonë se sot është dita kur vendoset për të ardhmen e Tetovës dhe për të ardhmen e rinisë.
“Sot është një ditë e bukur për komunën e Tetovës dhe jo vetëm. Uroi që kjo ditë të kalojë në frymë demokratike dhe e qetë”, tha Abdulla Osmani, bartës i listës së këshilltarëve të ASH-së.
Elmedina Abdullahi nga “Më e mira për Tetovën” theksoi se është e rëndësishme që sot të qytetarët të kenë votuar me bindjen e tyre.
“Është shumë me rëndësi që ata të jenë vendimtar për mënyrën se si do të funksionojë Këshilli dhe komuna në vitet në vijim. Është shumë me rëndësi vota e tyre, por është edhe shumë me rëndësi vota e tyre të jenë në bazë të vullnetit dhe bindjes së tyre“, theksoi Elmedina Abdullahi, bartës i listës së pavarur të MMPT.
Nga Alternativa thonë se dita e sotme është ditë për të dënuar politikat e gabuara të zbatuara deri më tani.
“Të shprehim mendimin e tyre lirshëm për pëbërjen e re të Këshillit komunal të Tetovës dhe njëkohësisht të dënojnë politikat e deritanishme të gabuara që janë udhëhequr për Tetovën tonë, si dhe ka mundësi që me votën e tyre t’i japin kahje të re politikave të reja, të japin alternativa të reja Tetovës për të mirën e gjithë qytetarëve”, pohoi Faton Selami, bartës i listës së këshilltarëve të Alternativës.
Në komunën e Tetovës u votua për anëtarë të Këshilli komunal, ndërsa të drejtë vote kanë 84.072 qytetarë.