Shtyhet debati për raportin për Maqedoninë! Deputetët bullgarë me kritika të ashpra ndaj raportuesit Vajc

Shqyrtimi i Raportit për Maqedoninë është shtyrë për më 24 qershor. Propozimi erdhi nga raportuesi për vendin, Tomas Vajc, i cili ishte në shënjestër të kritikave nga kolegët eurodeputetë bullgarë. Vajc, në fillim të debatit në komision në Parlamentin Europian, theksoi se janë zhvilluar debate intensive politike për këtë raport, por qëllimi i tij nuk është të zgjidhë  mosmarrëveshje dypalëshe.

“Unë qëndroj plotësisht pas Raportit tim. Të gjitha grupet ishin të përfshira në negociata, të gjitha grupet morën pjesë në formimin e këtyre kompromiseve. Ky është një Raport i Parlamentit Europian dhe i Bashkimit Europian për vendin që është në proces të anëtarësimit, e në këtë rast ajo është Maqedonia e Veriut. Ky Raport nuk ka për qëllim, nuk ekziston për të zgjidhur çështje dypalëshe mes Bullgarisë dhe Maqedonisë së Veriut”, tha Tomas Vajc, raportues për Maqedoninë.

Autoritetet vendase prisnin që Raporti të miratohej, veçanërisht sepse Vajc kishte theksuar ekzistencën e një identiteti dhe gjuhe të veçantë maqedonase. Megjithatë, eurodeputetët bullgarë presin një hetim mbi rrethanat në të cilat Vajc e ka shkruar Raportin.

“Me të vërtetë besoj se gjatë kësaj periudhe udhëheqja e Parlamentit do të bëjë atë që është e nevojshme për të hetuar dhe verifikuar të gjitha faktet dhe rrethanat lidhur me parregullsitë që i kemi konstatuar në lidhje me hartimin e këtij Raporti”, theksoi Stanisllav Stojanov, eurodeputet Bullgar.

“E  falënderoj për këtë vendim të mençur dhe të përgjegjshëm në këtë moment dhe bëj thirrje që në ditët dhe javët që kemi deri në debatin e ardhshëm, ai sërish të tregojë mençuri dhe t’i mbledhë edhe një herë raportuesit në hije, në mënyrë që të sqarohen çështjet e tjera të ndjeshme”, tha Ivajllo Vallçev, eurodeputet Bullgar.

Në mbrojtje të Vajc dolën një pjesë e socialistëve dhe liberalëve.

“Shprehim keqardhje të thellë për kushtet dhe insinuatat e drejtuara ndaj kolegut Vajc”, pohoi Naço Sançez Amor, eurodeputet i Spanjës.

“Dua të shpreh mbështetjen për propozimin e raportuesit dhe gjithashtu ta dënoj fushatën të cilës iu nënshtrua. Kjo është e papranueshme dhe nuk duhet të përsëritet”, deklaroi Dan Barna, eurodeputet i Romanisë.

Kryeministri Hristijan Mickoski së fundmi bëri thirrje që Raporti të miratohet dhe për këtë, siç shtoi, ka biseduar me politikanë europianë. Ndërsa presidentja Gordana Siljanovska Davkova tha se do të vihet në pikëpyetje kapaciteti demokratik i Parlamentit Europian nëse Raporti i Vajc nuk miratohet.